भांगरभूंय | प्रतिनिधी
फाल्यां ग्रामसभेंत खर विरोध करपाचो लोकांचो निर्णय
भांगरभूंय । प्रतिनिधी
पेडणें : मोरजेच्या कान्नायकवाडो आनी टेंबवाडो मजगतीं काळोबा देवस्थान वाठारांत परप्रांतीयां वतीन एक सात मजली कॅसिनो इमारत उबारपाच्यो हालचाली सुरू आसात, अशें कळटा. मोरजेचे आयतारा जावपी ग्रामसभेंत तिका खर विरोध करपाचो निर्णय गांवकारांनी घेतला. आमदार जीत आरोलकार हांणीय हे इमारतीक जाहीर विरोध केला. मोरजे पंचायत वाठारांत पयलेच खेप इतली उंच इमारत उबी जावपाची आसा.
हे इमारतीक विरोध करपाक तरणाट्यांनी सह्यांची मोहीम सुरू करून पंचायतीक निवेदन सादर केलां. तसो थारावूय पंचायतीक दिला. आठ दिसां पयलीं काळोबा देवळांत चाळीस वर्सां उपरांत बंद पडिल्ली सत्यनारायण म्हापूजा सुरू जाली. त्या वेळार आमदार आरोलकार हाजीर आशिल्ले. लोकांक नाका जाल्यार आपलोय हे इमारतीक विरोध आसा, अशें तांणी सांगलें. तांणी इमारत उबारपाक दिल्ले परवाने फाटीं घेवचे अशें पत्र मुख्यमंत्री दो. प्रमोद सावंत हांकां दिलां.
हांगाच्या एकल्यानूय कॅसिनोची मागणी करूंक ना, इमारती बांदपा संबंदी गांवकार, पंचायत, थळावे आमदार हांकां कोणेच विस्वासांत घेवंक ना. मागीर असले प्रकल्प कशे हांगा येतात, कोण ते हाडटात, असो प्रस्न मोरजेच्या कांय तरणाट्यांनी ह्या प्रतिनिधी कडेन उलयतना केलो.
सरपंच पवन मोरजे हांणी सांगले, इमारत बांदकामाक लोकांचो विरोध आसल्यार आमी थाराव मंजूर करून तो संबंदीत खात्याक धाडपाक शकतात. फुडले कारवाये खातीर आमी जाणकारांचो सल्लो घेतले. फाल्यांचे ग्रामसभेंत हे इमारती वयल्यान वातावरण तापपाचें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
