एकवटाचे वटेन वतना

भांगरभूंय | प्रतिनिधी

हालींच दत्ताबाब नायकांची राजभास कायदो आनी साहित्य अकादेमीक बरोवपाचीं पत्रां हाचेर केल्लीं टिपणां येत सावन
कोंकणी समाज बरोच उचांबळ जाला.
समाजीक मळार काम करतल्याक खबर नासतना ताचे फाटलावदार आसतात. तीं जें काम करतात वो जें उलयतात तें तांचे खूबशे फाटलावदार विचार करिनासतना आपणायतात देखून असल्या फुडाऱ्यांचेर उलयतना वो वागतना एके तरेची नैतीक जापसालदारकी आसूंक जाय.
दत्ताबाबान केल्लीं टिपणां आयच्या विघटक समाजाचे फाटभुंयेर वितरागून केल्यांत. पूण वेव्हाराचें भान दवरिनासतना वितरागून केल्ल्या टिपणांक कांयच दळ नासता. एके घडयेक अशें मानून घेतलें, दत्ताबाब म्हणटा तितलेंय केलें जाल्यार समाजांत आशिल्ली फूट ना जातली हाची हमी दत्ताबाब दिवंक शकतात?
राजभाशा ही त्या त्या राज्याची चडांत चड उलोवपी लोकांची भास आसता, जाका लागून अशिक्षितांक लेगीत सरकारी वेव्हार करूंक सोंपें जावचें. हें सगलें सोडून दिवन जरी मराठीक राजभास केली तरी आयचे घटकेक गोंयांतल्या मराठी लोकांक मेळटा ताचे परस आनीक चड फायदो जावचो ना, वयल्यान गोंयकारांक तें मारक थारतलें. जेन्ना मराठी राजभास जातली त्या वेळार नोकरेक अट घालतना ती एक तर “कोंकणी आनी मराठी कळप गरजेची” अशी घालची पडली. तशें केल्यार पुराय क्रिस्तांव समाज सरकारी नोकरे पसून पयस उरतलो. जर “कोंकणी किंवां मराठी कळप गरजेची” अशी अट घाली जाल्यार पुराय महाराष्ट्रा मुखार गोंयकार तरणाटीं थंय तिगूंक शकतलीं? वयल्यान आतांचीं पयशे घेवन नोकरी दिवपाचीं प्रकरणां पळयल्यार गोंयकार फाटींच उरतले.
राजभास कायद्यांत मराठीक सुवात नासली तरी मराठींतल्यान बरयिल्ल्या पत्राक मराठींतल्यान जाप दिवपाची तजवीज राजभास कायद्याक अनुसरूण काडिल्ले अधिसुचोवणेंत आसा. राजभाशा संचालनालय मराठीचेंय प्रशिक्षण घेता. मराठी अकादमीक सरकार अनुदान दिता. कायदो बदलून मराठी लोकांक सरकारा कडल्यान आनीक कितें मेळटलें?
मराठी लोकांक फावो नासतना चड मेळ्ळां. संवसारभर आवयभाशेंतल्यान शिक्षण दिवंक जाय ही मान्यताय आसतना लेगीत मगो पक्षान गोंयच्या कवळ्या मनाच्या भुरग्यांचेर फक्त आपले विचारसरणेक लागून मराठी लादली. बाबडीं भुरगीं अजून ताचीं फळां भोगतात. गोंयांत समग्र शिक्षा अभियानाक जें अनुदान येता तें कोंकणी शिक्षणाक वापर नासतना महाराष्ट्रांत जाल्लें मराठीचें काम परत गोंयांत करूंक आनी पयशांची भुती सोडोवन मराठीचीं भुतां थंड करूंक वापरप जाता. गोंया भायलीं आस्थापनां गोंयांत येवन मराठी दिसाळीं चलयतात जातूंतलीं कांय दिसांळीं कोंकणी राजभास आसून लेगीत आपलो खप वाडूंक जाय म्हण कोंकणीची बातमी छापून हाडिनासतना वयल्यान कोंकणीक खेपतात. राजभाशे संबंदांत उलयतना हे गजालींचेर कित्याक विचार जायना? गोंय सरकारान मराठी अकादमी घडयली तेन्ना कोंकणी लोकांनी बोवाळ केलो? कोंकणी लोकांचो मराठी भाशेक विरोध ना, फक्त मराठी राजभास करपाक आसा हें मतींत धरूंक जाय. मराठीक इतलेंय मेळटा आसुनूय आनी तांचे वांगडा गोंयचो तरणाटो नासुनूय मराठी साहित्य संमेलनांनी दिंडी, पालखी सारखीं हिंदुत्वाचींच प्रतिकां वापरून फक्त समाजांत फूट घालपी जड्ड्या मराठी लोकांक मागता तें दिवपाचें?
दत्ताबाब रोमी लिपयेक राजभास कायद्यांत आनी शिक्षणांत हाडची अशें मागतात. तांचो हेतू जरी एकवटाचो आसलो तरी तांची ही मागणी हिंदू – क्रिस्तांव भुरग्यां मदीं वेगळोचार करतली हाचेर तांणी विचार केल्लो दिसना. रोमी लिपयेचे मोगी हीं कोंकणीच. तीं राजभास कायद्याक हात लायनाका म्हणप्यांचींच भावंडां हातूंत अजिबात दुबाव ना. क्रिस्तांव लोकांचें कोंकणीक योगदान सगलेच मान्य करतात. पूण जेन्ना राजभाशेंत रोमी लिपी येतली तेन्ना राजभाशा म्हण हक्कान शिक्षणांत येतली. जेन्ना खंयचेंय भुरगें कोंकणी विशय शिकूंक वतलें तेन्ना कोंकणी वेंचतना सरासरी क्रिस्तांव भुरगें रोमी लिपयेंतल्यान कोंकणी घेतलें आनी हिंदू भुरगें देवनागरी लिपयेंतल्यान. हाचोच अर्थ क्रिस्तांव भुरगीं वेगळीं बसतलीं आनी हिंदू भुरगीं वेगळीं बसतलीं. आनी अशें मानतात, जें भुरगेपणांत तकलेंत गेल्लें भायर वचपाक बरीच तकालस घेवची पडटा. सामान्य मनीस तकालस घेवन हें करना. देखून ज्या एकवटाची भाशा दत्ताबाब करतात ती पुरायेन असफळ थारता. वयल्यान ज्या राष्ट्रीय स्वयंसेवक संघाचे मानसीकतायेच्या विचारांच्या विरोधांत दत्ताबाब झगडटा, ताका तांचे हे विचार पुरक थारतात. रोमीचें म्हत्व मुखार हाडूंक दत्ताबाब ज्या नेमाळ्यांचो खप खूब आसा अशें म्हणटात तीं नेमाळीं खप नासून बंद पडूंक पावल्यांत ही वस्तुस्थिती. एका रोमीच्याच बाजून बातम्यो छापपी दिसाळ्यान एक पान रोमी लिपयेंतल्यान सुरू केल्लें. वाचक नाशिल्ल्यान तांकां तें बंद करचें पडलें हिवूय वस्तुस्थिती.
कोंकणीच्या साबार लिपयेंतल्या साहित्याक साहित्य अकादेमीचे पुरस्कार फावो जावचे हें जरी जायत्या जाणांक मनांतल्यान दिसलें तरी तें वेवहार्य ना. ज्या थरांचेर पुरस्कारांच्या पुस्तकांची शिफारस जाता त्या सगल्या थरांच्या परिक्षक मंडळाचेर पांचय लिपयो कळपी परिक्षक आसचे पडटले. जे कशेच मेळचे नात. जे ही मागणी करतात तांची पर्याय म्हण एक मागणी आळीपाळयेन सगल्या लिपयांक पुरस्कार दिवपाची आसा. ज्या प्रमाणांत एके लिपयेंतल्यान साहित्य निर्मणी जाता त्याच प्रमाणांत सगल्या लिपयांतल्यान जायना ही एक गजाल. दुसरी गजाल दर्जाची. सगल्या लिपयांतल्या साहित्याचो दर्जो सारखो आसता? तिसरी गजाल पात्रतायेची. साहित्य अकादेमीच्या पुरस्कारा खातीर एकाद्रें पुस्तक फक्त तिनूच वर्सां पात्र आसता. एके लिपयेची जेन्ना पाळी येतली. तेन्ना बऱ्या दर्जाचीं दोन पुस्तकां आसल्यार दुसऱ्या पुस्तकाक पुरस्कार मेळचोच ना आनी एकाद्रे लिपयेंतल्या पुस्तकांक दर्जो नासल्यार लेगीत ताका पुरस्कार मेळटलो.
हाका उपाय एकूच. लिप्यांतर. पूण रोमी आनी कन्नड लिपयेंतल्यान बरोवप्यांक हें नाका. कोंकणी अकादेमीची येवजण आसा ताचो कोणूच लाव घेना. कित्याक तर तांकां फक्त धोशी घालपाच्यो आसात. तांकां राजकारण करून तांचो सुवार्थ सादपाचो आसा. रोमी लिपयेची मागणी करप्यांचें व्यक्तीगत आचरण पळयलें जाल्यार हें लक्षांत येता.
अखील भारतीय कोंकणी परिशदेचें धोरण एक भास, एक समाज, एक लिपी अशें जरी आसलें तरी तें इतल्या ल्हान विचारांचें न्हय हेंय समजून घेवंक जाय. हेर लिपयांचें साहित्य एके लिपयेंत येवचें आनी तें चडांत चड लोकां मेरेन पावचें हो उदात्त हेतू ताचे फाटल्यान आसा. एक देश, एक भाशा हें एकत्व लादपाचें खूब जाणांक मान्य ना आनी आसुंकूय फावना अशें म्हुणून आमी जाती, धर्म हें मानपाक लोकांक प्रोत्साहीत करतले? अखील भारतीय कोंकणी परिशद आपलें संमेलन वा अधिवेशन ज्या वाठारांत घडोवन हाडटा तेन्ना त्या वाठाराचे लिपयेकूय आपले माचयेर सुवात दिता हेंवूय मतींत धरूंक जाय. परिशदेन कन्नड लिपयेंतलें एक पुस्तक देवनागरींत हाडलां. फाटल्या संमेलनांत आनी अंदुंच्या अधिवेशनांत लिप्यांतराक म्हत्व दिवन वावर करपाचे थाराव आसात. जेन्ना अखील भारतीय कोंकणी परिशद आपल्या ब्रीदवाक्यांत “एक समाज” म्हणटा तेन्ना धर्म, जात, कात ह्या वेगळेचारांतल्यान भायर येवन कोंकणी समाज असो ताचो अर्थ जाता.
सद्याच्या वादा फाटलें राजकारण दत्ताबाबान समजून घेवंक जाय. सगलेच क्रिस्तांव रोमी वापरनात. देवनागरी शिक्षणांत येवन चाळीस वर्सां वयर जाल्यांत. क्रिस्तांव समाजाच्या नवे पिळगेक देवनागरी बरी येता. तांची दोतोन्न वाचतना कितलिंशींच जाणां देवनागरी लिपयेंतल्यान बरयिल्ले दोतोन्नीचो आगरो धरतात. ग्लोबल कोंकणी फोरमाच्या निमंत्रकान अधिकृत सांगलांच, कोण एकलो दुबयच्यान येता, आमी रोमी खातीर कितेंय करूंक जाय म्हणटा, दुबयच्या पयशांचेर ग्लोबल कोंकणी फोरम घडटा आनी गोंयांतली शांतिकाय बिगडायता. हाचे फाटलें राजकारण कोणाक कळनाशें बी?
दत्ताबाबाचें म्हणणें असल्या राजकारणाक बळ दिता. तांचें म्हणणें एकवटायना जाल्यार वेगळायता. म्हणटकच एकवटाचो विचार करुनूय वितरागून केल्लीं टिपणां कोंकणी समाजाक फक्त उचांबळ करतात, तातूंतल्यान आनी कांयच साध्य जायना. कोंकणींतले दोन म्हालगडे जेन्ना एकामेकांचेर वयक्तीक आरोप करतात तेन्ना तातूंतलो कोणच जिखना आनी कोणच हारना, हारता फक्त थतरवितर जाल्लो कोंकणी समाज.

चेतन आचार्य
9422389290
(कार्याध्यक्ष, अखील भारतीय कोंकणी परिशद)