भांगरभूंय | प्रतिनिधी
नवी दिल्ली, खबरां संस्था ः वर्ल्ड स्ट्रोक ऑर्गनायझेशन (WSO) प्रमाण संवसारभर दर वर्सा 1 कोटी 22 लाखां परस चड लोकांक स्ट्रोकचो त्रास जाता. तांतूतल्या सुमार 65 लाख लोकांक दर वर्सा मरण येता.
संवसारांतल्या 10 कोटी परस चड लोकांक केन्ना ना केन्ना स्ट्रोक येता. पिराये प्रमाण ताचो धोको चड वाडटा. डब्ल्यूएसओच्या म्हणण्या प्रमाण आतां हो धोको इतलो वाडला की पिरायेच्या 25 वर्सां उपरांत दर 4 जाणांतल्या 1 मनशाक जिणेंतल्या खंयच्याय एका वेळार स्ट्रोक जावपाची शक्याताय आसता.
नॅशनल लायब्ररी ऑफ मेडिसीनांत उजवाडाक आयिल्ल्या एका अभ्यासा प्रमाण, भारतांत काळजाच्या दुयेंसां उपरांत स्ट्रोक हें मरण येवपाचें दुसरें मुखेल कारण. देशांत दर चार मिण्टांनी स्ट्रोक जावन एकल्याक मरण येता. दर वर्सा सुमार 1 लाख 85 हजार दुयेंतींक स्ट्रोक येता. हाचो अर्थ देशांत दर 40 सेकंदाक एका मनशाक स्ट्रोक येता.
ग्लोबल बर्डन ऑफ डिजीजान (GBD) दिल्ली आंकडेवारी भारता खातीर खूब भिरांकूळ आसा. जीबीडीच्या म्हणण्या प्रमाण भारतांत 1990 सावन 30 वर्सांत स्ट्रोक जावपाचें प्रमाण 51% वाडलां. दर वर्सा स्ट्रोकाचे दुयेंती नेटान वाडत आशिल्ल्यान अमेरिकन हार्ट असोसिएशन (एएचए) आनी अमेरिकन स्ट्रोक असोसिएशन (एएसए) हांणी अद्ययावत मार्गदर्शक तत्वां जारी केल्यांत. प्रतिबंधात्मक उपाय आनी जिणे पद्दतींत बदल केल्यार स्ट्रोक जावपाचो धोको कसो उणो करूं येता तें तातूंत स्पश्ट केलां.
तातूंत अशें म्हळां की खंयच्याय जिवाक धोको निर्माण करपी दुयेंस आडावपा खातीर तपासणी हो सगळ्यांत बरो उपाय. स्ट्रोक जावचो न्हय म्हूण रगतदाब, कोलेस्टेरॉलाची पातळी, रगतांतली साकर आनी मोटसाण वेळावेळार तपासप गरजेचें. तांकां नियंत्रणांत दवरल्यार स्ट्रोक जावपाचो धोको उणो जावं येता. ते भायर हेर जतनाय घेतल्यारुय हो धोको उणो जावं येता.
निरोगी खाणां-जेवण आनी पेयां घेयात
वजन नियंत्रणांत दवरचें
नेमान शारिरीक क्रियाकलाप करात
सिगरेट आनी सोरो पियेवंक नाकात
वैजकी स्थितीचेर नियंत्रण दवरप
कोलेस्टेरॉलाची पातळी तपासत रावचें
रगतदाब नियंत्रणांत दवरात
गोडेंमूत नियंत्रणांत दवरात
वखदां वेळार घेवचीं
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
