भांगरभूंय | प्रतिनिधी
हें डिजीटल यूग. म्हणटकच विज्ञान, तंत्रज्ञानान आमकां दिल्ल्या सुविधांचो वापर आमी करूंक जाय. कळना जाल्यार शिकून घेवंक जाय. मोबायला वयले इंटरनेट, वॅबसायटी, अॅप, सोशल मिडिया आमच्या फायद्या खातीर आसा, हें आमी मतींत घेवंक जाय. ताचो बरो उपेग करपाक जाय, न्हय दुरुपेग! मोबायल फोन आतां जाण्ट्या – नेण्ट्यांच्या हातांत पावला. सगलेच जाण इंटरनेट वापरतात. म्हणटकच म्हायती दिवपाक, घेवपाक ताचो वापर जाताच. पूण, अजून बरीच म्हायती, कळोवण्यो ताचे वरवीं लोकांक कळपाच्यो आसात. देखीक सरकारी सुविधांच्यो. हालींच भौशीक बांदकाम खात्या वतीन मोबायल अॅपाचेर लोकांक पिवपाच्या उदकाच्या पुरवणे विशीं, दुरुस्ती संबंदी कळोवण्यो, म्हायती दिवपाचो निर्णय घेतला. ही एकदम बरी गजाल!!
गोंयांत उदकाची समस्या ही सदांचीच. धरणांनी दोन ते तीन म्हयने पावतलें इतलें उदक आसा, अशी खबर एप्रीलांत येता. पूण कांय वाठारांतले नळ ताचे आदीं मार्चांतूच फक्त आवाज करतात. उदकाचो थेंबोय पडना. अचकीत उदक गायब, जाता तेन्ना जांचे कडेन तें सांठोवन दवरपाक आयदनां नात, बांय ना, उदक टांकयेंत चडोवपाक पंप ना तांचेर आकांत येता. कांय वेळान घरांत जाण्टीं मनशां आसतात. तांकां बांयचें उदक काडप शक्य नासता. ताका लागून उदक केन्ना नासतलें, ताची म्हायती एक दीस पयलीं मेळत जाल्यार लोकांक सादूर रावपाक मेळटा. उदकाच्या पायपांची दुरुस्ती केन्ना करतले, उदक कित्याक ना, खंय पायप फुटलां, लोकांक कितल्या वरांनी उदक मेळटलें, हाची म्हायती आसल्यार लोक उदका पुरवण विभागाच्या नांवान बोटां मोडटात, गाळी संवतात, तें बंद जातलें. पूण मुख्य गजाल म्हणल्यार लोक उदक भरून दवरतले.
उदका प्रमाण, आनीक एक म्हत्वाची गजाल म्हणल्यार लायट. ती केन्ना वता, केन्ना येता, तें कोणूच सांगपाक शकना. लायट फोंडें- थिवीच्यान गेल्या काय गांवांतूच समस्या आसा, दुरुस्ती खातीर लायट केन्ना बंद दवरतले, ताचीय म्हायती कोणाक नासता. दिसाळ्यांनी आयज लायट ना, अशी बारीकशी खबर येता तितलीच. पूण ती सगल्याच वाचकाचे नदरेक पडटाच अशें ना. लायटीचीय म्हायती लोकांक मेळ्ळ्यार बरें. कदंब म्हामंडळान पसून फाल्यां खंयची बस आसची ना, तें प्रवाशांक कळोवं येता.
व्हाॅट्सअॅप आतां पोस्टमनाचें काम बेसबरें करता. उदका विभाग, वीज खात्यान अॅपाचेर म्हायती दिवचीच, पूण व्हाॅट्सअॅप ताचे परस प्रभावी थारतलो. सरकारी विभागान दरेका शार- गांवांतल्या वा मतदारसंघांतल्या हजारभर लोकांचो (आमदार, सरपंच, नगराध्यक्ष, पंच, नगरसेवक, पत्रकार, ब्लाॅगर, देवस्थान समिती, क्लब, शिक्षणीक संस्था, हाॅस्पिटलां, महिला मंडळांच्यो मुखेल जाळवणदार) ग्रुप केल्यार लायट वा उदक ना, ती म्हायती खिणा भितर सगल्याक पावोवप कठीण न्हय. प्रत्येक सरकारी विभागान ह्यो कळोवण्यो फाॅरवर्ड करपाक स्वताचे ग्रुप, पेजी करूं येतात. आतां सोशल मिडियाचेर गांवांच्या नांवांचे ग्रुप, पेजी आसात. थंय त्या- त्या गांवांतल्यो घडामोडी वाचूंक, पळोवपाक मेळटात. व्हाॅट्सअॅपाचेर जें कितें येता, तें सगले रोखडेच वाचतात. ती कळोवणी तांकां तांच्या वळखीच्या लोकांक फाॅरवर्ड करपाक सांगपाचें. म्हणटकच ती अॅपा परस वेगान व्हायरल जातली. लोकांक, खास करून उदक, लायटी कडेन थेट संबंद आशिल्ल्या बायलांक हाचो फायदो जातलो. तांचे कश्ट, मानसीक त्रास उणे जातले.
पायपलायनीची दुरुस्ती, देखभालीच्यो सुचोवण्यो मोबायल अॅपा वरवीं पंचायती, नगरपालिकांक दितले. म्हणल्यार तांणीय व्हाॅट्सअॅप ग्रुप वा फेसबूक पेज करूं येता. कोणे केल्ली दिसूंक ना. स्वराज्य संस्थांच्यो साबार येवजण्यो आसतात. कळोवण्यो तर शेंकड्यांनी. त्यो थेट नागरिकांक कळोवंक मेळटल्यो. सोशल मिडियाची आवड आशिल्ल्याक अधिकृतपणान हें काम दिल्यार, तोय पोटाक लागतलो. नागरिकां कडेन संपर्क जाल्ल्यान तांचीं मतां पालिका प्रतिनिधींक कळटलीं, तो डाटा घेवन सुधारणा, उदरगतीचीं कामां करपाक मेळटलीं. सरकारी यंत्रणांक वा भितर काम करपी कर्मचाऱ्यांक हें काम म्हणल्यार लश्कराच्यो भाकऱ्यो भाजपा सारकें दिसता जाल्यार गांवांतल्या पत्रकारांक त्यो कळवण्यो लोकांक धाडपाक सांगू येतात. तांचे स्वताचे ग्रुप आसात, चॅनल, वॅबसायटी आसात, तांचीं दिसाळीं, खबरां चॅनल सोशल मिडियाचेर आसात. होय उपाय वायट ना. सगल्योच कळोवण्यो पणजेच्यान कळोवचे परस प्रत्येक मतदारसंघांतल्या, तालुक्यांतल्या लोकांक कांय वरां भितर त्यो कळोवं येतात.
लोकां वांगडा सदांच संपर्कांत येवपी सरकारी खात्यांनी तंत्रज्ञानाचो लाव घेवन गरजेची म्हायती लोकां मेरेन पावोवची. ही खरी समाजसेवा थारतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
