भांगरभूंय | प्रतिनिधी
पणजीः जानेवारीच्या तिसऱ्या सप्तकांत सर्वोच्च न्यायालयांत म्हादय प्रस्नाची सुनावणी जातली. हे विशीं बुधवारा सुनावणी जावपाची आशिल्ली. पूण मुखेल न्यायाधीश संजीव खन्ना हांच्या फुडारपणा खाला तीन न्यायाधीशांच्या खंडपिठान जानेवारीच्या तिसऱ्या सप्तकांत सुनावणी घेवपाचो निर्णय घेतला.
म्हादय न्हंयेच्या उदकाच्या प्रस्नाचेर उदक तंटो लवादान निमाणो निकाल दिले उपरांत गोंय, कर्नाटक आनी महाराष्ट्र ह्या तीन राज्यांनी सर्वोच्च न्यायालयांत धांव घेतल्या.
फाटलीं कांय वर्सां सुप्रीम कोर्टांत सुनावणी चालू आसा. फुडली सुनावणी बुधवारा जावपाची आशिल्ली. ते खातीर गोंया कडल्यान निनाद लौद आनी अभय अंतुरकार हे फकत दोन, कर्नाटका कडल्यान पांच, जाल्यार महाराष्ट्राचो एक आदोगाद हजर आशिल्लो. ही सुनावणी सरन्यायाधीश संजीव खन्ना हांच्या अध्यक्षते खाला पंकज मिठाल आनी संजय कुमार ह्या तीन वांगड्यांच्या खंडपिठा मुखार जातली.
सरन्यायाधिशांनी ही सुनावणी जानेवारींत तिसऱ्या सप्तकां मेरेन फुडें धुकलिल्ल्यान सर्वोच्च न्यायालय हे विशीं कितें निर्णय घेता, हाचे कडेन सगल्यांच्यो नदरो लागल्यात.
मजगतीं, उदका तंटो लवादाच्या आदेशा उपरांत कर्नाटकान म्हादयचें उदक बेकायदो घुंवडावपाचें सुरूच दवरला. ते खातीर गोंय सरकारान सर्वोच्च न्यायालयांत अवमान याचिका दाखल केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
