भांगरभूंय | प्रतिनिधी
हॅकर्स सदांच लोकांक फटोवपा खातीर नवी युक्त सोदतात. हालींच्या एका अहवालांत धक्को दिवपी गजाल उक्ती जाल्या. तुमी जर गूगल सर्चाचेर कितेंय सोदतात जाल्यार तुमी जतनाय घेवपाची गरज आसा. फकत गूगलाचेर कितेंय टायप करप आनी सोदप तुमकां म्हारग पडपाक शकता.
‘न्यूयॉर्क पोस्ट’ प्रमाण, सायबर सिक्युरिटी फर्म सोफोसान इंटरनेट वापरप्यांक शिटकावणी दिल्या. तांणी म्हणलां, चुकून लेगीत Are Bengal Cats legal in Australia? हें गुगल सर्चाचेर सोदपाचो यत्न करूं नाकात.
हॅकर्सांनी अशें कांय फटीचे लिंक्स तयार केल्यात, तांचेर क्लिक केल्यार तुमची वैयक्तीक म्हायती हॅकर्सांच्या हातांत पडटा. ह्या कामाक हॅकर एसईओ पॉयझनिंग तंत्र वापरतात. गुगलाचेर दिसपी ह्या धोक्याच्या लिंकांचेर क्लिक केल्यार तुमी तुमची सुरक्षा आनी गुप्तताय दोनूय धोक्यांत घालतात.
एसईओ पॉयझनिंग म्हणल्यार कितें?
एसईओ पॉयझनिंग हें एक तंत्र जातूंत हॅकर्स सर्च इंजिन ऑप्टिमायझेशनांत घुस्पागोंदळ करतात, जाका लागून अशे धोको दिवपी लिंक्स गुगल सर्च परिणामांच्या वयर दिसतात. तुमी ह्या लिंकांचेर क्लिक करतात आनी सायटीक भेट दितांच, तुमची वैयक्तीक म्हायती, बँक तपशील आनी लॉग-इन आयडी आनी पासवर्ड ही म्हत्वाची म्हायती चोरतात.
हॅकर्स पसून वाटावपाक कितें करचें?
घटमूट पासवर्ड: सगळ्यां खात्यां खातीर घटमूट पासवर्ड वापरात. पासवर्डांत अक्षरां (अप्परकेस आनी लोअरकेस दोनूय), आंकडो आनी विशेश चिन्नांचो आसपाव आसतलो. तशेंच पासवर्ड नेमान बदलात.
टू फॅक्टर ऑथेंटिकेशन वापरात: तुमकां ज्या ऍपांत हे विशिश्ट्य मेळटलें, त्या अॅपांत हे विशिश्ट्य वापरपाची खात्री करात.
अनवळखी लींक आनी भौशीक वाय-फाय: दुबावीत ईमेल, लिंक वा संदेशांचेर क्लिक करूं नाकात. तशेंच भौशीक वाय- फाय नेटवर्कचेर बँकींग म्हायती वा पासवर्ड शेअर करूं नाकात.
अँटीव्हायरस सॉफ्टवेअर वापरात: तुमच्या सिस्टमाचें संरक्षण करपा खातीर अँटीव्हायरस सॉफ्टवेअर घालात आनी तें नेमान अपडेट करात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
