भांगरभूंय | प्रतिनिधी
नोकरी भानगडीच्या प्रकरणाचो आंवाठ आतां वाडत आसा. फटवल्ले लोक जितले मुखार येतले, तितले नवे- नवे ठकसेन सांपडत रावतले. तातूंत बायलोच मुखार आसात, अशें दिसून आयलां. आतां मेरेन 4- 5 बायलांक धरल्यांत. भुरग्यांचो फुडार घडोवपाची जापसालदारकी आशिल्ले शिक्षकूय हातूंत आसात. मजा म्हणल्यार नोकऱ्यो विकतात, असो जांचेर सर्रास आरोप जाता वा जाच्या हातांत नोकरी दिवपाचो निमाणो निर्णय आसता, तातूंतलो मात एकलोय अजून सांपडूंक ना. काय तांचीं नांवां सांगून भलतेच लोक सरकारी अधिकाऱ्यांक हाता कडेन धरून हें कर्म करताले? आपलो वावुरपी हातूंत सांपडल्यार, ताचेर कडक कारवाय करतले, अशें भाजपान आयज स्पश्ट केलां. पक्ष सत्तेंत आशिल्ल्यान दुबावाची सूय तांचे वटेन आसप सभावीक.
रामदास स्वामींच्या मारुती स्तोत्रांत कोटीच्या कोटी उड्डाणे… अशी एक ओळ आसा. गोंयांतल्या नोकरी भानगडींत हेंच जालां. हीं पयशांचीं उड्डाणां. दोगी बायलांचेर कोटी- कोटी घेतिल्ल्याचे आरोप जाल्यात. सगल्यांत चड रक्कम 40 लाखांची. इतले पयशे दिवन नोकरी विकत घेवपाक गोंयकार एका पांयाचेर तयार आसात, पूण तातूंतले अर्दे खर्च करून वेवसाय घालपाची मात तांची तयारी ना…. आनी हे इतले पयशे दिवन नोकरी मेळटकच, ते वसूल करपाक ती व्यक्ती भ्रश्टाचार करची ना कित्या वयल्यान? स्वताच्या कर्तृत्वाचेर नोकरी मेळोवचे परस लांच दिवन ती सरळ मेळोवं येता, अशें सगलेच उलयताले. ताचेर ह्या प्रकरणान म्होर मारल्या, अशें म्हणचें पडटलें. आतां फुडले पिळगेन तसोच विचार करचो न्हय, हे खातीर पावलां उखलचीं पडटलीं.
एका निवृत्त सरकारी अधिकाऱ्याच्या मतान, बोगस कागदां तयार करून (जमीन विकपाक केल्लीं तशीं) ह्या ठकसेनांनी नोकरी सोदपी लोकांक फटयल्यात. हें जर खरें आसत जाल्यार भयंकरूच म्हणचें पडटलें. पूण, ह्या ठकसेनांनी थोड्यांक नोकरी दिल्ल्याचें पुलीस तपासांत दिसून आयलां खंय. मागीर नोकरेक रुजू जावपाच्या दिसा अधिकाऱ्यांक ताचें नेमणूक पत्र, ताका धाडिल्लीं पत्रां बोगस हें कशें कळूंक ना? सरकारी अधिकारी हातूंत वांटेकार आसपाची शक्यताय चड! सरकारी नोकरेक लागता ते दाखले, प्रमाणपत्र, वैजकी तपासणी करप आनी नेमणूक पत्र दितना उरिल्ली रक्कम घेवप…. मागीर गायब जावप. पयशे दिवपी चडूच फाटल्यान लागल्यार थोडे पयशे दिवप, असो प्रकार ठकसेन आनी तांचे हस्तक करताले, असो दुबाव कांय जाण उक्तायतात. पूण, सरकारी नोकरेची प्रक्रिया अशी आसना हें उमेदवारांक खबर ना? सरकारी वा खाजगी पदाची कायद्यान दिसाळ्यांनी, आपले वॅबसायटीर दिवप बंदनकारक आसता. मागीर लेखी परिक्षा, चांचण्यो, तपासण्यो बी जातात. पूण ठकसेनांनी उतर दिल्ल्या नोकऱ्यांची जायरात पसून येवंक ना खंय. म्हणजे खंयचेय परिस्थितींत, कायदो माड्डुन, मेळटा त्या मार्गान नोकरी मेळोवप इतलीच उमेदवारांची मोख आसतली! आतां सरकारी नोकरी कशी निर्माण जाता, ती मेळोवपाचे कायदेशीर मार्ग कितें, कसलीं प्रमाणपत्रां, दाखले दिवचे पडटात…. हाची सगली म्हायती सरकारी यंत्रणांनी तरणाट्यांक सांगपाचो, जागृताय करपाचो वेळ आयला. दिसाळीं वाचपी लोक उणे जाल्यात, ताचो हो परिणाम न्हय मूं? जायरात केन्ना आयली, नोकरे खातीरचें शिक्षण कितें हें पसून थोड्यांक खबर नासता. तांकां सगलें दुसऱ्यांनी सांगचें पडटा.
जे ठकसेनांच्या हातांतल्यान फटवल्यात, त्या सगल्यांक वेळ पडल्यार ठकसेनांची मालमत्ता विकून पयशे परत दितले, अशें सरकारान म्हणलां. म्हणटकच चडांत चड लोकांनी कागाळ करपाक मुखार आयल्यार बरें. ह्या ठकसेनांनी पयशे घेवन जर कोणाक नोकरी मेळोवन दिल्या, जाल्यार तांचींय प्रमाणपत्रां, दाखले तपासून पळोवचें. पुलीस तपासांत आतां मेरेन नांवां भायरूय सरल्यांत आसतलीं. काय तांणी कोणाकूच नोकरी दिवंक ना? सगल्यांकूच पयशे घेवन फटयल्यात? पोरूं कांय लोकप्रतिनिधींनी लोकप्रतिनिधींचेरूच नोकरी विकिल्ल्याचे जाहीर आरोप केल्ले. कांय नोकऱ्यो थारावीक वाठारांतल्या उमेदवारांकूच मेळटात, खातें ज्या लोकप्रतिनिधी कडेन आसता, तातूंत ताच्या मतदारसंघांतलेच उमेदवार कामाक लागतात, तें खातें दुसऱ्या लोकप्रतिनिधी कडेन वता, तेन्ना ताच्या वाठारांतल्या लोकांक त्या खात्यांत नोकऱ्यो मेळटात. लोक अशें सर्रास उलयतात. तें खरें? हय जाल्यार धरिल्ल्या ठकसेनां कडेन ताचो संबंद बी आसा, हाचोय तपास पुलिसांक करचो पडटलो. ह्या ठकसेनांचो आदलो इतिहास- भुगोल खणून पळयल्यार हें कळूं येता. रोजगार प्रक्रिया, गोंयचें नांव घाणावपाचो हो सगलो प्रकार. सरकारान गंभीरपणान ताचीं पाळांमुळां खणून काडचीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
