भांगरभूंय | प्रतिनिधी
-स. भिकू पै आंगले जल्मशती सुवाळ्यांत उलोवपमडगांवः योग्य गुरू मेळप हे व्हड भाग्य. आपणाक भिकू पै आंगले हांचे सारके म्हान गुरू लाबले. तांणी आपणाक बरे शिक्षण दिले. तांचे कडल्यान तितले शिकपाक मेळटा तितले शिकपाचो आपणें यत्न केलो. तांचे कडल्यान शिकपाक मेळ्ळे, हे म्हजें भाग्य, अशें नामनेची नाट्य कलाकार नयना आपटे हांणी सांगलें. ज्येश्ठ शिक्षणकर्मी, नाट्यकर्मी आनी शिक्षक स. भिकू पै आंगले हांच्या जल्मशती वर्सा निमतान मडगांवां रवीन्द्र भवनांत सुवाळ्याचे आयोजन केल्ले. ह्या वेळार त्यो उलयताल्यो.
नाटकांत अभिनय करतना तुमचे कडेन कितेंच नासले तरी उपकारता, पूण अभिनय तांक मात गरजेचीं. काम करपाची तांक आसत जाल्यार चंद्रकांत गोखले हांचे सारके कलाकार पिरायेच्या 85 वर्सां मेरेन काम करपाक शकतात, अशें नयना आपटे हांणी आपल्या भाशणांत सांगलें.
ह्या कार्यावळी खाला नाट्य कलाकार नयना आपटे हांचो उद्देजक अवधूत तिंबलो हांचे हस्तुकीं शाल, श्रीफळ, मानचिन्न आनी भेटवस्तू दिवन भोवमान केलो.
ते उपरांत नामनेचे नाटककार वसंत कानेटकर लिखीत ‘संगीत मत्स्यगंधा’ ह्या फामाद नाटकाचो पयलो प्रवेश सादर केलो. हातूंत डॉ. व्यंकटेश हेगडे (पराशर), नयना आपटे (सत्यवती ), कपील नायक (राजा देवव्रत), हेमंत आंगले ( धीवर ), चंदू पै काणे (चंडोल), योगन कोसंबे (प्रियदर्शन) हांणी आपल्या अभिनयान प्रेक्षकांची मनां जिखलीं.
ते उपरांत भिकू पै आंगले हांच्या दिग्दर्शना खाला काम केल्ले अक्षदा पुराणीक तळावलीकार, पृथा कुंकळयेंकार, युगा सांबारी, डॉ. प्रदीप बोरकार, ऋतुजा रायकार, आश्वेक शानभाग हांणी सवेश नाट्यसंगिताच्या अभिनयाच्या सादरीकरणान उपस्थीत रसिकांचेर मोनेळ घातली.
कार्यावळीचे निमाणे ‘कट्यार काळजात घुसली’ ह्या संगीत नाटकाचो प्रवेश सादर केलो. हातूंत डॉ. प्रदीप बोरकार आनी साथी कलाकारांनी वांटो घेतिल्लो.
सुरवातीक ‘दामोदरा नमन पायी तुझ्या’ ही नांदी सादर केली. दिलीप धारवडकार, प्रवास नायक हांचें हस्तुकीं कलाकारांक तशेंच पड्ड्या फाटल्या कलाकारांक मानचिन्न आनी फुलांतुरो भेटोवन तांचो भोवमान केलो.
कार्यावळीचे सूत्रसंचालन राजीव शिंक्रे हांणी केले. महेश पै काणे हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
