भांगरभूंय | प्रतिनिधी
म्हापशेंः गोवा हावसींग बोर्डाचो अधिकृत अधिकारी आशिल्ल्याचे सांगून गृहमंडळाचो प्लॉट तशेंच लेखा खात्यांत सरकारी नोकरी दिवपाचें हांयस दाखोवन नेवरा पिलारच्या एका बायलेची 5.50 लाखांची फटवणूक केल्ले प्रकरणांत मोहम्मद सादीक शेख (भाटले, पणजी) हाका पणजी पुलिसांनी फटवणुकेच्या गुन्यांवा खाला अटक केल्या. विशेश म्हणल्यार दुबावितान फिर्यादीक बोगस प्लॉट वांटपाची पावती आनी नोकरेचें नेमणूक पत्र लेगीत दिलें.
ही फटवणुकेची घडणूक जुलय 2021 त ताळगांवां घडिली. ह्या प्रकरणांत फिर्यादी नसरीन बानू शेख मझरली हांणी पणजी पुलिशेंत मंगळारा कागाळ दाखल केल्या. दुबावीत आरोपी मोहम्मद शेख हांणें फिर्यादीक आपूण गोवा हावसींग मंडळाचो अधिकृत व्यक्ती आशिल्ल्याचे सांगलें आनी तिका पर्वरे सर्वे क्रमांक 84, 85, 86, 88, 89 त प्लॉट करीत अशिल्ल्याचे सांगून 3.30 लाख रुपया घेतले आनी प्लॉट वांटपाची पावती दिली. तशेंच तिका लेखा संचालनालयांत कारकुनाची नोकरी दिवपाचें हांयस दाखयले.
हे नोकरे खातीर निर्यादी कडल्यान 2.20 लाख रुपया रक्कम घेतली. तशेंच तिका नोकरेचे नेमणूकपत्र लेगीत दिले. उपरांत दुबावितान दिल्ले भूखंड वांटप पत्र आनी नोकरेचे नेमणूक पत्र बोगस आशिल्ल्याचे कळ्ळ्ळे. दुबावितान तिची 5 लाख 50 हजारांची फटवणूक केली.
ह्या प्रकरणांत पणजी पुलिसांनी दुबाविता आड गुन्यांव नोंद करून ताका अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
