भांगरभूंय | प्रतिनिधी
सगल्या वांगडां मनयिल्ले उत्सव यादीन उरतात. सगल्यांचो एकवट नदरेक पडटा. खरेंच हे उत्सव म्हणल्यार एकचाराचें प्रतीक.
देवळां हीं हिंदू संस्कृतायेचीं प्रतिकां. आमच्या पुर्वजांच्या तेंपा वयलीं भव्य, आकर्शक देवळां ताठ मानेन अजूनय अस्तित्वांत आसात. परंपरे प्रमाण, ते – ते तिथयेक थंय धर्मीक विधी जातात. हिंदू धर्मीय एकवटान हातांत हात घालून उत्सव मनयतात. उत्सव म्हणलो काय देवळाची रंगरंगोटी, फुलांची सजावट, विजेची रोशणाय आयलीच. विद्युत रोशणायेन देवूळ, देवळाचो वाठार सामको झगमगून वता.
आषाढी आनी कार्तिकी एकादशी तर विठ्ठल- रघुमाईच्या देवळांत व्हडा दबाज्यान मनयतात. कालूच सांखळे कार्तिकी एकादस पांडुरंगाच्या देवळांत, फोंड्यां, मडगांवां हरिमंदिरांत व्हडा उमेदीन मनयली. ते निमतान विवीध कार्यावळी आयोजीत केल्ल्यो.
सांखळेचें पांडुरंगाचे देवूळ आदल्या काळा सावन लोकप्रीय. विठुरायाची काळ्या पाशाणाची मुर्ती, वांगडा रुक्मिणी, सत्यभामा, तांकां घाल्ले अळंकार, फुलांचे हार… सजयिल्ली मुर्ती आकर्शक दिसता. कमरेचेर दोनूय हात, कपलाक गंध, गळ्यांत लांब तुळशीमाळो, विटे वयलो पांडुरंग पळोवन तान, भूक न्हिवता. खुद्द पंढरपुराचो पांडुरंगूच उबो आशिल्ल्याचो भास दरेकल्याक जाता. विठुराया कोणाची तरी उमळशीकेन वाट पळयता असो भास जाता. विठ्ठलाचें रुप मनाक भुरळ घालता. सकाळच्यान भक्तांचें दर्शन घेवप सुरू जाता. दनपरां गर्भकुडींत वचून दुदाचो अभिशेक करपाची प्रथा साखळे आसा. भावीक स्वताच्या हातांनी देवाक अभिशेक करतात. विठ्ठलाची मना पसून पुजा करतात. तुळशी हार देवाक अर्पण करतात.
दोनूय एकादशी म्हणल्यार आमकां बायलांक एक पर्वणीच. न्हावन धुवून त्यो कडक उपास धरतात. विठ्ठलाची पूजा करून त्या दिसा फक्त फराळ म्हणल्यार मुगा कण्ण, चण्याची उसळ, रोटी, उकडलेलीं कणगां हाचो निवेद्य देवाक दाखयतात. मागीर सगले देवाची प्रार्थना करतात. देवघरांतल्या धुप, उजवाती, कापराच्या सुगंधान घर पळमळटा. गायेक वाडी आनी कांवळ्याक काकोळ दाखोवन घरांतले सगले ल्हान- व्हड केळीच्या पानांचेर सगल्या जिनसांचो आस्वाद घेतात. सगले विठ्ठल विठ्ठल जय हरी विठ्ठल असो व्हडल्यान जयघोश करतात. सगलें घर दुमदुमून वता.
सगल्या वांगडां मनयिल्ले उत्सव यादीन उरतात. सगल्यांचो एकवट नदरेक पडटा. खरेंच हे उत्सव म्हणल्यार एकचाराचें प्रतीक.
सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
