भांगरभूंय | प्रतिनिधी
मूत्रपिंडाचें म्हणल्यार किडनी दुयेंस जाल्ल्याचे योग्य वेळार कळ्ळें जाल्यार योग्य उपचार करुं येतात. वायट आहार आनी चुकीचे जिणे पद्दतीचो परिणाम कुडीचेर जाता. मूत्रपिंडाच्या लुकसाणेचीं जायतीं लक्षणां कुडींत दिसूं येतात. हीं लक्षणां वेळार वळखून आनी योग्य उपचार आनी जतनाय घेवन मूत्रपिंड भलायकी बरी दवरुं येता.
मूत्रपिंड अपेशी जावपाचीं लक्षणां…
१. मुतांत जाल्लो बदल: मुताच्या रंगांत, प्रमाणांत वा वासांत बदल जाल्यार मूत्रपिंडांतल्या समस्यांचें लक्षण आसूं येता. जशें मुतांत फेस येवप, रगत येवप वा चड वा उणें मुतपाक जावप.
२. सुज : पांय, धोंपरा वा तोंड सुजप हें मूत्रपिंडांत द्रव सांठोवपाचें लक्षण आसूं येता.
३. थकवो आनी दुबळेंपण: मूत्रपिंड सारके काम करीना तेन्ना कुडींत रगताचो उणाव येवंक शकता आनी ताका लागून थकवो येवप आनी दुबळेपण जाणवता.
४. उच्च रगतदाब : रगतदाब नियंत्रीत करपाक मूत्रपिंडाची म्हत्वाची भुमिका आसता. मूत्रपिंड सारके काम करीना जाल्यार रगतदाब वाडूंक शकता.
५. मळमळ आनी ओंकारे: मूत्रपिंडाच्या दुयेंसाक लागून मळमळ आनी ओंकारे सारकिल्ल्यो समस्या जावंक शकतात.
६. घुंवळ येवप : मूत्रपिंडाच्या दुयेंसाक लागून रगतांत विखारी पदार्थांचें प्रमाण वाडूंक शकता, जाका लागून भूक उणी जावंक शकता. हाका लागून कुडींत दुबळेपण येता आनी मागीर ताका लागून घुंवळ येवपाक शकता.
७. कातीक खाज येवप: मूत्रपिंडाच्या दुयेंसाक लागून कातीक खाज येवपाक शकता.
मूत्रपिंड निरोगी दवरपाचे उपाय…
१. रगतदाब नियंत्रीत करप: रगतदाब चड आशिल्ल्यान मूत्रपिंडांचें लुकसाण जावं येता. देखून रगतदाब नियंत्रणांत दवरप खूब गरजेचें.
२. गोडेंमूत नियंत्रणांत दवरात : गोडेंमूत हें मूत्रपिंड दुयेंसाचें म्हत्वाचें कारण. देखून रगतांतली साकर नियंत्रीत करप खूब गरजेचें.
३. वजन नियंत्रणांत दवरचें: मोटसाणीक लागून मूत्रपिंडांचेर चड ताण पडटा. देखून निरोगी वजन सांबाळप म्हत्वाचें.
४. व्यायाम: नेमान व्यायाम केल्यार रगतदाब, वजन उणें जावप आनी मूत्रपिंडाची भलायकी नियंत्रीत करपाक मदत जाता.
५. भरपूर उदक पियेवप: भरपूर उदक पियेल्यार मूत्रपिंडांतले विखारी पदार्थ भायर काडपाक मजत जाता.
६. धूम्रपान करूं नाकात: धूम्रपान केल्यार मूत्रपिंडांक लुकसाण जावंक शकता.
७. दोतोरान सांगिल्ले प्रमाण वखदां घेवचीं: कांय वखदां मूत्रपिंडांक इबाडूंक शकतात. देखून सदांच फकत दोतोराच्या सल्ल्या प्रमाण वखदां घेवचीं
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
