भांगरभूंय | प्रतिनिधी
नवी दिल्ली, खबरां संस्थाः भारतीय हवाई क्षेत्रांत 3 हजार मीटर उंचायेचेर पावल्या उपरांत विमानांत इलॅक्ट्रॉनीक उपकरणा वापरपाची परवानगी आसतली तेन्नाच विमानांतल्या प्रवाशांक वायफाय वरवीं इंटरनॅट सेवा वापरुंक मेळटली अशें केंद्र सरकारान सांगलें.
सरकारा कडल्यान हें स्पश्टीकरण नवीन उड्डाण आनी सागरी कनेक्टिव्हिटी (सुदारणा) नेम, 2024 खाला आयलां. ताचे आदीं 2018 वर्सा विमानांत मोबायल सेवा सक्रिय करपाक तेन्नाच मेळटली जेन्ना विमान उण्यांत उणें 3 हजार मीटर उंचायेचेर पावता, जाका लागून मोबायल नेटवर्कांत हस्तक्षेप जावचो ना. आतां नव्या नेमा प्रमाण हे उंचायेचेर पावल्या उपरांत लेगीत इलेक्ट्रॉनीक उपकरणांचो वापर करपाक परवानगी दितले तेन्नाच वायफाय वरवीं इंटरनॅट सेवा दितले.
फ्लायटांत वायफाय चालू वा बंद करपाचो अधिकार कॅप्टनाक…
विमानाच्या कॅप्टनाक वायफाय चालू वा बंद करपाचो अधिकार आसतलो. तशेंच विमान स्थिर गतीचेर आसतना वाय-फाय सुरू जातलो. तेच बरोबर टेक ऑफ वा लँडिंग करतना तो बंद करचो पडटलो.
विमान मळाचेर इंडिगोचो चड वांटो…
ऑगस्ट २०२४ च्या आंकडेवारी प्रमाण, इंडिगो ही देशांतली सगळ्यांत व्हडली विमान कंपनी आसून तिचो विमान येरादारी क्षेत्रांत 62.4% वांटो आसा. मजगतीं, एअर इंडिया दुसरे सुवातेर आसा, विस्तारा तिसरे सुवातेर आनी एआयएक्स कनॅक्ट चवथें सुवातेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
