भांगरभूंय | प्रतिनिधी
श्रीहरीकोटा, खबरां संस्था ः लडाखांतल्या लेहच्यान भारताचें पयलें ॲनालॉग अंतराळ मिशन सुरू जालां. इस्रोन (इंडियन स्पेस रिसर्च ऑर्गनायझेशन) हें मिशन सुरू केलां आनी फुडल्या अंतराळ मिशनाची येवजण येसस्वीपणान चालीक लावपा खातीर ॲनालॉग मिशन वापरतले अशें म्हणलां. चंद्र आनी मंगळ ह्या सारक्या मिशनांचें निरिक्षण आनी अभ्यास करप हो ॲनालॉग मिशनाचो हेत आसा.
ॲनालॉग स्पेस मिशन म्हळ्यार धर्तरेचेर भौतिक नदरेन अत्यंत अंतराळ वातावरणासारके आशिल्ल्या सुवातींनी केल्ल्यो चांचण्यो. अंतराळ उड्डाण संशोधनांत येवपी समस्या सोडोवपाक ह्यो चांचण्यो म्हत्वाचो वांटो घेतात. ॲनालॉग स्पेस मिशनां खातीर लडाखाची खासा निवड केल्या. हाचें कारण म्हळ्यार लडाखांतले थंड, सुकें हवामान, नापीक जमीन आनी उंचाय ह्या सगळ्या गजालींचो विचार करून ही सुवात निवडल्या अशें म्हण्टात. हे संबंदी ‘टायम्स ऑफ इंडिया’न खबर दिल्या.
मजगतीं, फुडल्या गिऱ्यांचो सोद घेवपा खातीर वैज्ञानिक आनी अंतराळवीरांक प्रशिक्षण दिवपा खातीर ह्या सुवातेर चांचणी घेतले. अंतराळयान आनी अंतराळवीर निवास तंत्रगिन्यानाची हांगा चांचणी घेवं येता. मजगतीं, ह्युमन स्पेसफ्लाइट सेंटर, एएकेए स्पेस स्टुडिओ, लडाख विद्यापीठ, आयआयटी बॉम्बे आनी लडाख ऑटोनॉमस हिल डेव्हलपमेंट कौन्सिल अशा जायत्या संघटनांच्या सहकार्यान इस्रोन हें मिशन सुरू केलां. ऑक्टोबर सावन सुरू जाल्ली ही मोहीम एक म्हयनो चलतली. हे खेपे मिशनांत कॉम्पॅक्ट, इन्फ्लेटेबल वस्ती “हब-1” चांचणी करतले. हाचे संबंदी म्हायती इसरोन अधिकृत एक्साचेर (ट्विटर) दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
