भांगरभूंय | प्रतिनिधी
प्लांट बंद दवरपाची वेळ; पावस सोंपतकच कामाक येतली गती
पणजी: भौशीक बांदकाम खात्याच्या (पीडब्ल्यूडी) प्लांटा सयत रस्तो कंत्राटदारांचे गोंयांतले सुमार बाराय हॉटमिक्स प्लांट सुरू केल्यात. तशेंच कांय वाठारांतल्या रस्त्यांचें हॉटमिक्स डांबरीकरण लेगीत सुरू केलां. पूण, अदीं मदीं पडपी पावसाचो हॉटमिक्स प्लांट आनी रस्त्यांच्या डांबरीकरणाक फटको बसत आसा. पावस पुरायपणान थांबतकच हॉटमिक्स डांबरीकरणाक गती दितले अशें ‘पीडब्ल्यूडी’चे प्रधान मुखेल अभियंते उत्तम पार्सेकार हांणी आयतारा ‘भांगरभूंय’ कडेन उलयतना सांगलें.
अंदूं गोंयांत गोंय मुक्ती सावनच्या विक्रमी पावसाची नोंद जाली. जून आनी जुलय ह्या दोन म्हयन्यांत पडिल्ल्या उटंगाराच्या पावसाक लागून कांय म्हयन्यां पयलीं बांदिल्ले रस्ते व्हांवन गेले. कांय वाठारांतल्या रस्त्यांचेर मोटीं मोटीं फोंडकुलां पडिल्ल्यान ताचो फटको वाहन चालकांक सोंसचो पडलो. हाचे वेल्यान थळाव्या लोकांनी आनी वाहन चालकांनी तिडक उक्तावपाक सुरवात केले उपरांत मुख्यमंत्री डॉ. प्रमोद सावंत आक्रमक जाले. तांच्या आदेशा प्रमाण ‘पीडब्ल्यूडी’न 27 कंत्राटदारां सयत 30 अभियंत्यांक कारणां दाखय नोटीस जारी केल्ल्यो. पावस सोंपतकच राज्यांतल्या खूबशा सुवातां वेल्या रस्त्यांचें हॉटमिक्स डांबरीकरण सुरू करपाचो निर्णय घेवन ‘पीडब्ल्यूडी’न कामां सुरू केल्लीं. ते खातीर स्वता कडेन आशिल्ल्या हॉटमिक्स प्लांटा सयत कंत्राटदारां कडले सुमार बारा प्लांटूय सुरू केल्ले. पूण मॉन्सून हंगाम सोंपले उपरांतूय गोंयांत अदीं मदीं पावस पडत आशिल्ल्यान ताचो फटको प्लांट आनी डांबरीकरणाक बसत आसा. पावसाक लागून कांय प्लांट परतून बंद दवरल्यात. पावसाचें प्रमाण उणें जातकच सगल्या प्लांटा वेलें काम सुरू जातलें आनी रस्त्यांच्या डांबरीकरणाक गती दितले अशें पार्सेकार हांणी सांगलें.
मजगतीं, गोंयांतल्या सगल्याच वाठारांतले मुखेल आनी भितरल्या रस्त्यांची अवस्था सामकी बाबत जाल्या. ताका लागून येरादारी कोंयडे सयत अपघातांचेंय प्रमाण वाडत चल्लां. ताका लागून फुडल्या म्हयन्यांत अशा सगल्या रस्त्यांचें हॉटमिक्स डांबरीकरण पुराय करपाचें निश्चीत करून सरकारान ते नदरेन कामय सुरू केलां. ज्या कंत्राटदारांक पेड्ड्यार जाल्ल्या रस्त्यां विशीं कारणां दाखय नोटीस दिवन कारवाय केल्ली. तांच्या कामाचेर विशेश लक्ष दवरपाचे निर्देश मुख्यमंत्री डॉ. प्रमोद सावंत हांणी ‘पीडब्ल्यूडी’क दिल्ल्याची म्हायती गोपांनी दिली.
‘कारणां दाखय’तल्या कंत्राटदारा कडल्यानूय कामां सुरू
‘पीडब्ल्यूडी’न ज्या 27 कंत्राटदारांक कारणां दाखय नोटीस जारी केल्ली, तांकां तांणी केल्ल्या रस्त्यांची दुरुस्ती आनी हॉटमिक्स डांबरीकरण स्वताच्या खर्चान करून दिवपाचे निर्देश सरकारान दिल्ले. ते प्रमाण संबंदीत कंत्राटदारांनी काम सुरू केलां. पूण तांच्याय कामांत पावसाची आडखळ येत आसा. ह्या सगल्या कंत्राटदारां कडल्यान तांणी पयलीं केल्ल्या रस्त्यांची कामां रोखड्या रोखडीं करून घेतले अशेंय उत्तम पार्सेकार हांणी नमूद केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
