भांगरभूंय | प्रतिनिधी
पेनकिलर वखदांचो वापर चड पुराय संवसारभर जाता. हांतूत ओव्हर-द-काउंटर पर्याय ते प्रिस्क्रिप्शन वखदांचो आस्पाव आसा आनी हीं वखदां तकली दुखप, स्नायू दुखप, आनी दीर्घकाळ वेदना अशा विंगड विंगड समस्यां पसून रोखडीच सुटका दिता. पूण पेनकिलर वखदांचो चड वापर वा अयोग्य पद्दतीन वापर केल्ल्यार भलायकेक जायते त्रास जावंक शकतात. खास करून पोट आनी मूत्रपिंड हांचे संबंदीत गंभीर भलायकी समस्या निर्माण जावंक शकतात.
पेनकिलर वखदांचो मुखेलपणान दोन प्रकार आसात. नॉन-स्टेरॉयडल अँटी-इन्फ्लेमेटरी वखद (NSAIDs) आनी ऑपिओयड्स (opioids). एनएसएआयडी दाह उणो करता आनी कुडींतली वेदना, दुखणे उणे करपाक मजत करतात. जाल्यार ओपिओयड खर वेदना उणी करपाक मजत करतात. पूण हांचो चड वापर केल्यार कुडीचेर गंभीर परिणाम जाव येता.
पोटाचे भलायकेचेर परिणाम
एनएसएआयडीचो दीर्घकाळ वापर केल्यार पचनसंस्थेशी संबंदीत (गॅस्ट्रोइंटेस्टाइनल-GI) समस्या निर्माण जावंक शकतात.
० गॅस्ट्रायटिस (पोटाची सूज) : पोटाच्या आंतकड्यांक सूज आयल्यार दुखप, मळमळ आनी उलटी जावंक शकता.
० पेप्टिक अल्सर : पोटाचेर वा ल्हान आंतकड्यांच्या वयल्या भागाचेर जखम जावन पोटांत दुखप, फुगप आनी अपचन जावप अशें त्रास जातात.
० गॅस्ट्रोइंटेस्टिनल रक्तस्राव : पेनकिलर वखदांचो चड काळ वापर केल्यार पोटांतल्यान रगत येवंक शकता, जाका लागून जिवाक धोको निर्माण जावं येता. काळो वा रगत आशिल्लो मल, रगताची उलटी जावप वा दुबळेपणाची जाणविकाय जावप अशी ताची लक्षणा आसात.
मूत्रपिंडाचे भलायकेचेर परिणाम
रगतांतल्यान कोयराचे पदार्थ काडून उडोवपाक आनी द्रव समतोल दवरपाक मूत्रपिंडांची म्हत्वाची भुमिका आसता. दीर्घकाळ पेनकिलर वखदांचो वापर केल्यार मूत्रपिंडांचेर ताण येवंक शकता, जाका लागून भलायकेच्यो वेगवेगळ्यो समस्या निर्माण जावंक शकतात.
० मूत्रपिंडाची तीव्र जखम (Acute Kidney Injury): पेनकिलर वखदांचो चड वापर केल्यार मूत्रपिंडांचें अचकीत लुकसाण जावंक शकता. जाका लागून ताची फिल्टरिंग तांक उणी जाता. हाका लागून रगतांत कोयर एकठांय जाव येता, जे धोक्याचे थारूंक शकतात.
० क्रॉनिक मूत्रपिंड दुयेंस (Chronic Kidney Disease): पेनकिलर वखदांचो दीर्घकाळ वापर केल्यार मूत्रपिंडांचें काम ल्हव ल्हव उणें जावन मूत्रपिंड अपयशी जावपाचो धोको वाडटा. खास करून ज्या लोकांक पयलींच मूत्रपिंडाची समस्या वा गोडेंमूत, उच्च रक्तदाब आसा तांकां हाचो धोको चड आसता.
० द्रव सांठोवप (Fluid Retention) : पेनकिलर सारकिल्ल्या वखदांक लागून कुडींत द्रव सांठोवन उरता, जाका लागून रगतदाब वाडटा आनी मूत्रपिंडांचेर चड ताण पडटा.
पोटांत खर दुखप, आंतकड्यांनी बदल जावप, पांय वा पांयाच्या ढोपरांनी सुज येवप, थकवा येवप अशीं लक्षणा दिसल्यार रोखडोच दोतोराचो सल्लो घेवचो. ते भायर कसलोय दुयेंस आसल्यार सरळ पेनकिलर न घेता दोतोराच्या सल्ल्या प्रमाण वखदां घेवप.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
