भांगरभूंय | प्रतिनिधी
-दिसा उजवाडा लोकवसणुकेंत पिस्तूल दाखोवन धमकावपाचो प्रकारमडगांवः आकें -मडगांवां बुधवारा सकाळीं तीन अनवळखी व्यक्तींनी मडगांवचे रहिवासी कुणाल रायकार हांकां पिस्तुल दाखोवन धमकावपाचो यत्न केलो. तशेंच तांकां जबरदस्तीन मोटारींत बसोवन तांचे अहपरण करपाचो डाव आशिल्लो. पूण त्या वेळार थंय जाल्ल्या बोवाळाक लागून थळाव्यांनी गर्दी करपाक सुरवात केल्ल्यान त्या तिगांय दुबावितांनी थंयच्यान पळ काडलो. हे घडणुकेन मडगांवांतल्या लोकांमदीं भिरांत पातळ्ळ्या. मडगांव पुलिसांक हे विशीं म्हायती दिले उपरांत तांणी त्या अवळखी दुबावितांचो सोद घेवपाक सुरवात केल्या.
बुधवारा सकाळीं आठ वराच्या सुमाराक मडगांवचे कुणाल रायकार हे अापल्या भुरग्यांक शाळेंत पावोवपा खातीर पांडव चॅपेला कुशीच्या बेबी ब्लॉसम शाळेंत आयिल्ले. भुरग्यांक शाळेंत पावयले उपरांत घरा वचपा खातीर ते आपल्या मोटारी कडेन आयले. ह्या वेळार तीन अनवळखी व्यक्तींनी कुणाल हांकां आडायले. तशेंच तांकां पिस्तूल दाखोवन धमकी दिवन तांकां अोमनी मोटारींत बसपाची सक्ती केली.
ह्या वेळार कुणाल आनी त्या तिगांय अनवळखी दुबावितां मदीं जाल्ले लटाफट जाली. हातूंत कुणाल हांकां किरकोळ जखम जाली. मात, व्हड आवाज आयकून थंय लोक जमा जावपाक लागले. हे पळोवन दुबावितांनी थंयच्यान पळ काडलो. तांचो कुणाल हांच्या अपहरणाचो डाव फसलो. ह्या वेळार जाल्ले लटाफटींत दुबावितांच्या हातांतल्या पिस्तुलांतल्या गुळयांचे मॅगझीन थंयच जमनीचेर पडलें.
हे विशीं मडगांव पुलिसांक घडणुकेची म्हायती मेळटकूच मडगांव पुलिसांनी थंय धांव घेतली. पुलिसांनी घडणूक सुवाते वयल्यान गुळयांचे मॅगझीन जप्त केले. तशेंच ह्या प्रकरणाची कुणाल रायकार हांचे कडल्यान सविस्तर म्हायती जाणून घेतली.
कागाळदार कुणाल रायकार हांणी पुलिसांक दिल्ले म्हायती प्रमाण, दुबावीत म्हूण रूबेन वेर्णेकार हाचें नांव घेतला. ताचे कडेन मालमत्तेच्या प्रकरणां वयल्यान वाद आशिल्ल्याचे सांगलें. तांच्या कागाळे प्रमाण मडगांव पुलिसांनी गुन्यांव नोंद केलो. सध्या दुबावितांची वळख पटोवपाचें काम पुलिसां कडल्यान चालू आसा.
मजगतीं, रायकार हे ज्वेलर्स वेवसायीक आसून तांकां दुबावितांनी पिस्तूल दाखोवन कित्याक धमकी दिली. हाचे फाटल्यान रायकार हांच्या अपहरणाचो डाव आशिल्लो वा मालमत्तेच्या वादांतल्यान हो प्रकार घडलो वा आनीक कितें कारण आसा हाची मडगांव पुलीस चवकशी करतात.
——————–
गोंयांत गुन्यांवकारी घडणुको वाडत आसून कायद्याचो धाक कोणाकूच उरूंक ना. कायदो सुवेवस्था इबाडिल्ल्याचीच ही घडणूक आसा. आकें-मडगांवां दिसा उजवाडा लोकवसणुकेंत पिस्तूूल दाखोवन धमकावपाचो आनी अपहरण करपाचो दुबावितांचो यत्न आशिल्लो. हाचे वयल्यान गुन्यांवकारांक कायद्याचो धाक उरूंक नाशिल्ल्याचे दिसून येता, अशें विरोधी पक्षफुडारी युरी आलेमांव हांणी सोशल मिडियाचेर ट्विट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
