भांगरभूंय | प्रतिनिधी
-उच्च न्यायालयाचे निरिक्षण, फुडली सुनावणी बिरेस्तारापणजी : गोंयांत मोट्या प्रमाणांत बेकायदो बांदकामां जायत आशिल्ल्याचे फाटभुंयेर मुंबय उच्च न्यायालयान ताची स्वेच्छा दखल घेतल्या. बेकायदो बांदकामांचेर कारवाय करपा खातीर आशिल्लीं दंडात्मक तजवीज प्रतिबंधीत ना, अशें निरिक्षण उच्च न्यायालयान नोंदयला. ह्या प्रकरणांत अॅडव्होकेट जनरल देविदास पांगम हांणी पणजी म्हानगरपालिका तशेंच नगरपालिका कायद्या संदर्भांत संबंदींत अभियंता आनी निरिक्षकांक कारवाय करपाचे अधिकार आसून तांणी वेळारूच कारवाय करपाची गरज आशिल्ल्याचो मुद्दो न्यायालयांत उपस्थीत केलो. ह्या प्रकरणाची फुडली सुनावणी बिरेस्तार 24 वेर जातली.
राज्यांतल्या बेकायदो बांदकामांचेर नियंत्रण दवरपा खातीर कितें उपाय येवजण्यो आंखल्यात, तशेंच कितें कायदे अंमलात आसात. हे संदर्भांत न्यायालयांत सुनावणी सुरू आसा. ह्या प्रकरणाची सुनावणी जाली तेन्ना अॅडव्होकेट जनरल देविदास पांगम हांणी रस्त्याचे कुशीक उबारपी बेकायदो बांदकामां, खाजगी जमनींत परवानगी घेनासतना उबारपी बांदकामां, सरकारी जमनीचेर जावपी बेकायदो बांदकामां, उदरगत प्रतिबंधीत क्षेत्रांतल्या बेकायदो बांदकामांचेर याचिकेची व्याप्ती थारावपाची विनवणी केली. तशेंच हे संदर्भांत पंचायत कायदो, भलायकी कायद्या संदर्भांत म्हायती दिल्ली.
ह्या प्रकरणाची बुधवारा सुनावणी जाली तेन्ना, पणजी म्हानगरपालिका आनी नगरपालिका कायद्या खाला थळावे पालिकेचे अभियंते तशेंच निरिक्षकांक कारवाय करपाचे अधिकार आसात. तशेंच बेकायदो बांदकामां आसल्यार संबंदितांक 15 हजार रुपया दंड करपाची तजवीज आशिल्ल्याची म्हायती न्यायालयांत दिली. हाची दखल घेवन कार्यरत आशिल्ली सध्याची दंडात्मक तजवीज प्रतिबंधीत ना, अशें निरिक्षक उच्च न्यायालयान नोंदयले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
