भांगरभूंय | प्रतिनिधी
हांव तुज्या जी पेयचेर पयशे घालूंक सांगतां. दोन दिसां उपरांत ते म्हाका आॅनलायन दिल्यार जाले. हांवे म्हणलें नाका रे बाबा. म्हाका असल्यो भानगडी नाकात. तर म्हणूंक लागलो, आतां कितें करूं? तुज्या अकावंटार पयशे पावले. म्हाका कशेय करून परते धाड. हांवें विचारलें, तूं आतांच म्हजे कडल्यान परवानगी मागतालो, पयशे घालूं काय म्हूण आनी आतां घाले कशे म्हणटा? तर म्हणूंक लागलो, ‘चुकून पावले ते. आतां कितें करूं?’
हांवें सांगलें एक काम कर, तुवें म्हज्या घराक टायल्स बसयल्यात म्हणजेच तुका म्हजें घर खबर आसा. तूं म्हज्या घरा यो. हांव तुका बँकेंत व्हरतां, थंय आमी पयशे अकावंटार आयल्यात काय ना तें पळोवंया आनी आयल्या जाल्यार बँके कडल्यान परते व्हर. ताचें तोंड बंद. तरी आॅनलायन धाड न्ही हें पालुपद चालूच. आतां कितें करप असल्या लोकांक? हांव मात्सो सादूर आसलों म्हणून वाटावलों. जे पयशे म्हज्या अकावंटांत पावलेच ना ते पयशे हाका धाडप तरी कशे? तातूंत असो कोण शाणो आसतलो जो आपल्याक येणे आशिल्ले दुडू एका अनवळख्याच्या अकावंटार घालतलो? चुकून पयशे तुज्या अकावंटार पावल्या म्हणप आनी कोणूय सादो मेळ्ळो तर वेवस्थीत ताचें खेत्र करप हेंच असल्या फटिंगांचें काम.
कोणाचें खेत्र करचें हेंय हांकां सारकें बरें खबर आसता. जे कोण सिनियर सिटिझन्स आसा तांकांच मामा करप सोपें आसता. कारण सिनियर सिटिझन्सांक आॅनलायन वेव्हार सारके बरे जमनात. कशे जमतले? आमच्या वेळार हे मोबायल बी खंय आसले. ते इल्ले उसरां आयले. तरी लोक कशेतरी हो वेव्हार शिकले. पूण पुर्णपणान ते सगळें शिकूंक पावनात आनी हाचोच फायदो हे लोक घेतात. फकत आॅनलायनूच न्ही जाल्यार आॅफलायनूय जाणटेच त्रासांत पडिल्ले दिसतले.
वाटेर वतना कोणतरी पुलिसेच्या भेसांत येता. आपूण जाणट्यांक मदत करताशें दाखयता आनी कांय वेळा उपरांत तांकां कळटा हे आपणांक फटोवन गेले. कोणाचें भांगर, कोणाचे दुडू दिसा धवळ्या चोरले म्हणपाचें आयकूंक येता. लोकांनी पातयेवप तरी कोणाक आनी कशे? बँकेच्या एटिएमार गेल्यार होच अणभव मेळटा. कोणतरी थंय घुसपल्लो आसता. कोणूय जाणटो भितर सरतासो दिसलो म्हणजे तो घुटमळपी मनीस ताचे फाटोफाट भितर येता. कोणाकूय दिसपाचें हो त्या जाणटेल्या वांगडाच आयला. तो भितर सरता आनी जाणटेल्याक मदत करताशें दाखयता. गरज ना म्हूण सांगल्यारूय आयकना. ताचें कार्ड आपूण हातांत घेवन वेव्हार करूंक पळेता. जावं हो आपणाक मदत करता, घेवंया ताची मदत अशें जर चितलें तर त्रासांत पडलेच म्हणून समजुपाचें. तुमचें कार्ड बदललेंच म्हणून समजात. हांव जाल्यार असलो कोणूय भितर सरलो जाल्यार ताका भायर वचूंक सांगतां वा हांवूच भायर सरून वतां. कोणाक जाय हे शेळ्या आंगार फुगांव? आमी आयकतात न्ही आज हाका लुटलो आनी फाल्यां ताका. आपणें सादूर रावप शाणपणाचें.
मदीं आनीक एके पद्दतीन लोकांक लुट्टाले. कुरियर आयलां म्हणून सांगप आनी लुटप. कोणेतरी गिफ्ट धाडलां पूण कुरियरचे पयशे दिवन तें घेवपाचें. कुरियरचे पयशे व्हडले नासताले. शंबर, देडशें रुपया. पूण ते कार्ड वापरुनूच फारीक करपाचे. कॅश दिल्यार घेनासले. आनी कार्ड स्वेप केलें म्हणजे उपरांत कितले पयशे वताले ताचो हिशोबूच नासतालो. बरें आमकां तें गिफ्ट नाका म्हणलें तरी तें कॅन्सल करात नासल्यार आमकां पयशे मेळचे नात म्हणपाचें सांगून एक लींक दिताले. त्या लिंकार बोट मारलें म्हणजे बोट मारपी शेणलोच म्हणपाचो. अशेतरेन जायते लोक फटवल्यात आनी फटवताय बी. दर दिसा तर हेंच वाचूंक मेळटा न्ही.
फेसबुकार तर दर दोन दिसांनी कोणाच्या तरी नांवांन अकावंट उगडून ताच्या नांवान पयशे मागप हें सर्रास चल्लां. कोणूय वळखीचो अडचणींत सांपडला आनी ताका पयश्यांची गरज आसा म्हूण कोणूय सहज ताका मदत करता आनी फटवता. आपूण फटवलों म्हूण कळटकूच कितें जावपाचें? परत जर कोणूय खर्यांनीच अडचणींत असलो तरी ताका कोणूच मदत करचो ना. कारण आमकां तींय फटींगपणांच दिसतलीं. एकदां भोगलां न्ही! हांव जाल्यार वळखीचो आसलो तर ताका फोन करून खर्यांनीच गरज आसा काय हाची खात्री करून पळेतां आनी दर वेळार कोण अडचणींत ना तर तांच्या नांवान कोणेतरी फटींगपणां केल्यांत म्हणपाचें कळटा.
आतां तर आॅनलायन खेत्र करपाची एक नवी पद्दत आयल्या. खंयच्यान तरी फोन येता, तुजें एक पार्सल धरलां. तातूंत ड्रग्स आसात. खंयच्याय खिणाक तुज्या दारांत पुलीस पावूंक शकतात. तुका बंदखण चुकची ना. हें सांगून भेश्टायतात आनी हांतल्यान सुटचे खातीर पयशांची मागणी करतात. भियेल्लो मनीस तांची मागणी मानून घेता आनी ताणीं सांगिल्ल्या अकावंटार पयशे धाडटा. उपरांत ताका कळटा आपूण फटवलों. सद्याक तर जायते जाणांक मॅसेजी येतात. तुमी भुरग्यांचे पोर्न चित्रां पळेतात म्हणपाचें आमचे नदरेक आयलां. तुमकां खंयच्याय खिणाक अटक जावं येता. तुमचें म्हणणें मांडूक अमक्या नंबराचेर फोन करात वा दिल्ल्या लिंकार वचून तुमचें म्हणणें मांडात. आतां तांकां फोन केलो वा दिल्ल्या लिंकार गेल्यार कितें जातलें तें सांगचेली गरज आसा? हांचे कडेन दुर्लक्ष करपूच बरें. दारांत पुलीस पयलीं येवं दी उपरांत कितें तें पळोवपाचें. आमी जर कसलेंच वायट काम करूंक ना तर असल्या धमक्यांक कित्याक भियेवपाचें? हांव तरी असल्या आॅनलायन खेत्राक बळी पडूंक पळेना. तुमीय पडचे न्ही हीच इत्सा.
अभयकुमार वेलिंगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
