पुलीस : देशाची शान, अभिमान

भांगरभूंय | प्रतिनिधी

जवान रातभर न्हिदनासतना शिमेची राखण करतात म्हूण आमी दुस्मानां पसून सुरक्षीत आसात. ते जागतात म्हूण आमकां न्हिदपाक मेळटा. तांचे प्रमाणूच पुलिसूय रातदीस काम करतात. खास करून शिमे वाठारांतल्या राज्यांनी. थंय तांकां जवानां सारकीच गस्तूय बी घालची पडटा. आतंकवादी, नक्षलीं पसून लोकांक वाटावपाक. ही देशसेवा करतना तांकां शहीद जावचें पडटा. फाटल्या वर्सभरांत 216 पुलिसांक कामार आसतना मरण आयलां. अर्थांत हातूंत अपघात जावन मेल्ल्यांचोय आस्पाव आसा. काल देशभरांत पुलीस शहीद वा स्मृती दीस पाळ्ळो. त्या वेळार सरकारान हो आंकडो जाहीर केला. 1 सप्टेंबर 2015 ते 31 आॅगस्ट 2016 ह्या एका वर्सांत तर 479 पुलिसांक काम करतना मरण आयिल्लें. तातूंत उत्तर प्रदेशांतल्या 116 पुलिसांचो आस्पाव आशिल्लो. पोरूं थंयचे 108 पुलीस अंतरले. हातूंत दंगली वा गर्दीचेर नियंत्रण दवरतना, शिमांचेर गस्त घालतना, रातदीस काम केल्ल्यान मरपी चड आसात. देशाक स्वातंत्र्य मेळत सावन आतां मेरेन 36,468 पुलिसांक संवसार सोडचो पडला. जें टाळूं येतालें.
मुंबय 26 नोव्हेंबर 2018 दिसा 10 पाकिस्तानी आतंकवाद्यांनी हल्लो केल्लो. अरबी समुद्रांतल्यान ट्राॅलर, पनेळ घेवन ते देंवले आनी ए के 47 रायफलां घेवन दोन हाॅस्पिटलां, टाटाचें हाॅटेल, थेटर, रेल्वे स्टेशनाचेर मेळत थंय लोकांचेर फार मारीत रावले. तातूंतल्या सगल्यांक मारपाक चार दीस लागले. एकल्याक धरलो. उपरांत ताका गोळाक लायलो. ह्या हल्ल्यांत 166 लोकांक मरण आयिल्लें, तर 300 जाण जखमी जाल्ले. तीन वरिश्ठ पुलीस अधिकारी आनी हेर णव जाण मेळून 12 पुलिसांक मरण आयिल्लें. आमच्या देशांत कांय राज्यां सोडल्यार हेर कडेन तांकां जीव मुठींत दवरुनच ड्युटी करची पडटा, अशें म्हणल्यार अतिताय थारची ना.
पुलीस शहीद दिसा निमतान केंद्रीय गृह मंत्री अमीत शाह हांणी आतंकवाद, घुसखोरी आनी धर्मीक तणावा आड हाचे मुखारूय आमचें झूज चालूच उरतलें, असो निर्धार उक्तायला. काश्मीरांत फाटल्या कांय वर्सांनी व्हडल्यो प्रशासकी घडणुको घडल्यात. मात, आतंकवाद मात्तूय उणो जावंक ना. ताचे आड केंद्र सरकाराक आनी आतां सत्तेर आयिल्ल्या थळाव्या सरकाराक खर पावलां उबारचीं पडटलीं. आतंकवादाक धर्म, जात, प्रांत, विचारसरणी लागना. आतंकवाद हो आतंकवाद. म्हणटकच तो चिड्डुपाक कोणें फाटीं फुडें पळोवप समा न्हय. समाजानूय सरकारी यंत्रणांक साथ दिवंक फावो. ह्या आतंकवादाक लागून फाटल्या 75 वर्सांनी एका काश्मीराचेर (शिमे वयल्या हेर राज्यांनी वेगळें) अब्जांनी डाॅलर (रुपया न्हय) दुडू खर्च करचो पडला. तो देशांतल्या दरेका कुटुंबाचेर खर्च केल्लो जाल्यार लोकांक घराक भांगराचे नळे घालूंक मेळपाचे. घुसखोरीय वाडल्या. आतंकवादी येतातूच, ताचे भायर पोट भरपाक गरीब वा भिकेक लागिल्ले लोकूय देशांत येतात. लिपचोरयां वा शिमे वयल्या कांय भ्रश्ट रक्षकांक लांच दिवन!! पुलीस, जवानांनी हाचेर चड बारीकसाणेन लक्ष दिवंक जाय. कारण तांच्या दळांक ह्या घडणुकांक लागून खत लागता. ही आतांची गजाल न्हय, तर 1960, 1970 च्या दसका सावन हें चालूच आसा. धर्मीक तणावूय वाडला अशें शाह हांणी सांगलें. हालींच्या वर्सांनी कांय विशिश्ट लोक विशिश्ट लोकां आड असहिश्णू जाल्ले पळोवंक मेळटात. असलें कितें घडलें काय समाजांत ताण निर्माण जाता. केंद्र सरकारान आतां हाचे आड आमचें झूज चालूच उरतलें म्हणलां. धर्मीक तणावाचो चड त्रास जाता तो निश्पाप, हाताचेर पोट आशिल्ल्या लोकांक. देश बेगीन वयर काडटलो जाल्यार सगल्यांचे हात हातांत घेवन एकवटान वावुरपा बगर पर्याय ना. सोशल मिडियाचेर पयलीं नदर दवरपाक जाय. कारण हो धर्मीक वाद, तणाव, उजो थंय स्पश्ट दिश्टी पडटा. पुलिसांचे सायबर विभाग आसात. फक्त धर्मीक भावना, श्रद्धा दुखावल्यो आनी कोणे कागाळ केलीच जाल्यार सक्रीय जावचे परस रातदीस दोळ्यांत तेल घालून लक्ष दवरल्यार हे धर्मांध, देशद्रोही लोक सोंपेपणी सांपडले. आयपी एड्रेसा वयल्यान तांकां धरप कठीण न्हय. ह्या वेळार पुलिसांनी धर्म, जात, विचारसरणी विसरून कामाक लागप आमच्या भारताच्या हिताचें.
21 ऑक्टोबर 1959 दिसा चीनी सैनिकांनी लडाखांत केल्ल्या हल्ल्यांत 10 पुलीस शहीद जाल्ले. तेन्नाच्यान हो दीस पाळटात. पुलिसांनी ह्या दिसाची शान कायम उरतली, दळाक कोणूच वांकडेपणान पळोवचो ना, बोट दाखोवचो ना, हे नदरेन वावुरपाक जाय. राजकी फुडारी, सरकाराच्या हेर यंत्रणांचो तांकां ह्या कामांत तेंको मेळ्ळ्यार दळाचे बावटे सात समुद्रां पलतडी हुबतले. दुबावूच ना.