अपघातांची माळ चालूच

भांगरभूंय | प्रतिनिधी

म्हापश्यां बायलेक जाल्यार केप्यां तरणाट्याक जाग्यारूच मरणम्हापशें/केपेंः म्हापश्यां तीन बिल्डींग, पर्वरे ट्रकान दुचाकीक धपको दिल्ल्यान ट्रका पोंदा चिड्डून विजया मुरगांवकार (45, रा. चिंबल) हे बायलेक मरण आयलें. जाल्यार दुचाकी चालक हिरालाल मुरगांवकार (55) हे जखमी जाले. जाल्यार केप्यां आयतारा रातीं सुमार 10.45 वराच्या सुमाराक देवळामळ केप्यां जाल्ल्या अपघातांत तरणाट्याक मरण आयले चाल्यार एकलो गंभीर जावपाची घडणूक घडली. नेटान आयिल्ल्या स्कोडा मोटारीन रस्त्या कुशीक दुचाकी सयत उबे आशिल्ल्या तिगांक धपको दिवन 30 मिटर मेरेन फरफटत व्हेले. हातूंत अब्दुल कादर बादशाह ह्या 26 वर्सा पिरायेच्या तरणाट्याक जाग्यारूच मरण आयलें, जाल्यार सोफीयन शेख (24) हो गंंभीर जखमी जाला. ताका उपचारा खातीर गोमॅकाँत दाखल केल्या.

तीन बिल्डींग, पर्वरे ट्रकान दुचाकीक धपको दिल्ल्यान ट्रका पोंदा चिड्डून विजया मुरगांवकार (45, रा. चिंबल) हे बायलेक मरण आयलें. जाल्यार दुचाकी चालक हिरालाल मुरगांवकार (55) हे जखमी जाले.

हो अपघात सोमार 21 ऑक्टोबराक सकाळच्या 9.15 वरांचेर घडलो. जखमी हिरालाल हे आपले भावजयेक घेवन जीए 07 व्ही 5205 क्रमांकाचे ऍक्सेस स्कुटरी वेल्यान पणजेच्यान म्हापशेंचे दिकेन वताले. जाल्यार तेच वटेन मोहम्मद अफजल हो जीए 05 टी 7979 क्रमांकाचो ट्रक घेवन वतालो. हीं दोनूय वाहनां घडणुके सुवातेर आशिल्ल्या नवरत्न रेस्टॉरन्टा लागसार पावलीं तेन्ना ट्रकान दुचाकीक धपको दिलो. ताका लागून दुचाकी चालकाचें नियंत्रण गेल्ल्यान स्कुटरी फाटल्यान बशिल्ली विजया ही ट्रका पोंदा पडली आनी तिचे वेल्यान ट्रकाचे टायर गेले. गंभीर जखमी विजया हिका जीएमसींत व्हेली तेन्ना दोतोरांनी तिका मरण आयिल्ल्याचें सांगलें.

अपघाता वेळार दुचाकी चलोवपी रस्त्याचे उजवे वटेन पडून जखमी जालो.

अपघाताची म्हायती मेळटांच पर्वरी पुलीस घडणूक सुवातेर पावले. उपनिरीक्षक अरुण शिरोडकार आनी हवालदार विशाल गांवस हांणी पंचनामो केलो. पुलिसांनी ट्रक चालकाक ताब्यांत घेतला.

केप्यां जाल्ल्या अपघातांत एकल्या तरणाट्याक मरण आयलें. आयतारा रातीं सुमार 10.45 वराच्या सुमाराक देवळामळ केप्यां जाल्ल्या अपघातांत तरणाट्याक मरण आयले चाल्यार एकलो गंभीर जावपाची घडणूक घडली. नेटान आयिल्ल्या स्कोडा मोटारीन रस्त्या कुशी दुचाकी सयत उबे आशिल्ल्या तिगांक धपको दिवन 30 मिटर मेरेन फरफटत व्हेले. हातूंत अब्दुल कादर बादशाह ह्या 26 वर्सा पिरायेच्या तरणाट्याक जाग्यारूच मरण आयलें, जाल्यार सोफीयन शेख (24) हो गंंभीर जखमी जाला. ताका उपचारा खातीर गोमॅकाँत दाखल केला.

अपघांत घडिल्ल्या मोटारींत ड्रग्स सांपडिल्ल्यान घडणूक सुवाते वयल्यान मोटार ताकतिकेन क्रेन वरवीं हालयल्या. ह्या अपघाता उपरांत सोमारा सकाळीं 100 वयर ग्रामस्थांनी पुलीस स्टेशनाचेर गर्दी केल्ली. तशेंच अपघातांत दोशी मोटार चालकाचेर योग्य कारवाय करची, अशी मागणी तांणी केल्या. ह्या वेळार एल्टन डिकॉस्टा , नगरसेवक दयेश नायक, प्रसाद फळदेसाय आनी हेर हजर आशिल्ले

मेळिल्ले म्हायती प्रमाण, आयतारा रातीं कांय तरणाटे जेवणा उपरांत आपआपल्या दुचाकी वांगडा रस्त्याचे एके वटेन उबे आशिल्ले. त्या वेळार बोमनसोल ते देवूळमळचे दिशेन नेटान येवपी स्कोडा मोटारीन तांकां धपको दिलो. हातूंत रस्त्या कुशीक अाशिल्ले कांय जाण 30 मिटर मेरेन फरफटत गेले. हातूंत अब्दुल कादर बादशाह (26) हाका जाग्यारूच मरण अायलें. जाल्यार सोफीयन शेख (24) हो गंभीर जखमी जालो. ताचेर गोमॅकाँत उपचार चालू आसात. ही घडणूक आयतारा रातीं 10.45 वराच्या मजगतीं घडली.

अपघाताची म्हायती मेळ्ळे उपरांत पुलीस घडणूक सुवातेर पावले आनी तांणी पंचनामो केलो. अपघाताक कारण थारिल्ली स्कोडा मोटार वेगान वताली, हे लागसारच्या घराच्या सीसीटिव्ही कॅमेरांतल्यान जाणवताले. ते मोटारीत चालका वांगडा आनीक दोग जाण आशिल्ले, अशें थळाव्यांनी सांगलें.

मजगतीं, अपघाताचो योग्य रितीन पंचनामो करूंक ना. तशेंच ताकतिकेन क्रेनच्या मजतीन स्कोडा मोटार थंयच्यान दुसरे सुवातेर हालयली. ते मोटारींत ड्रग्स आशिल्ल्याची म्हायती मेळ्ळ्या. ते खातीर पुलिसांनी केल्ल्या पंचनाम्याची प्रत सगल्यांक दाखोवची, तशेंच संबंदितांचेर कायदेशीर कारवाय जावची अशी मागणी थळाव्यांनी केल्या.

मजगतीं, अपघातांत मरण आयिल्ल्या अब्दुल हाचे फाटल्यान घरकान्न आनी 8 म्हयन्याचें भुरगें आसा.

ह्या वेळार पुलीस स्टेशनांत केपेंचे आमदार एल्टन डिकॉस्टा , नगरसेवक दयेश नायक, प्रसाद फळदेसाय आनी हेर हजर आशिल्ले. तांणी चवकशेची मागणी केल्या.