‘नो हॅल्मेट, नो पॅट्रोल’

भांगरभूंय | प्रतिनिधी

धोरण सासणाचें दवरपाचो येरादारी खात्याचो प्रस्ताव

भांगरभूंय । प्रतिनिधी

पणजी : अपघातांचेर नियंत्रण दवरपा सयत दुचाकीचालकांचे सुरक्षे खातीर ‘नो हॅल्मेट, नो पॅट्रोल’ धोरण सासणाचें दवरपाचो प्रस्ताव आसा. येरादारी खात्याच्या गोपां कडल्यान ही म्हायती मेळ्ळी. उत्तर गोंयांत रस्तो सुरक्षा सप्तकांत ‘नो हॅल्मेट, नो पॅट्रोल’ धोरणाची कार्यवाय करपाचो आदेश जिल्होधिकाऱ्यांनी जारी केला.

गोंयांत 14 ऑक्टोबर सावन रस्तो सुरक्षा सप्तकाक सुरवात जाली. मुख्यमंत्री डॉ. प्रमोद सावंत हांचे हस्तुकीं रस्तो सुरक्षा सप्तकाचें उक्तावण जालें. रस्तो सुरक्षे विशीं जागृताय करपी तरेकवार कार्यावळी चालू आसा. हॅल्मेट घालिनाशिल्ल्या दुचाकी चालकांक तालांव दिवप चालू आसा.

मजगतीं, दुचाकी चालकाक हॅल्मेट घालूक ना, जाल्यार ताका पॅट्रोल दिवचें न्हय, असो आदेश उत्तर गोंय जिल्होधिकाऱ्यांनी जारी केला. आदेशाच्या कार्यवायेचो अहवाल 30 ऑक्टोबर मेरेन येरादारी खात्याक सादर करप बंधनकारक आसा. जिल्होधिकाऱ्यांनी आदेशाच्यो प्रती मामलेदारां सयत भारत पॅट्रोलियम, हिंदुस्थान पॅट्रोलियम, इंडियन ऑयल कंपन्यांच्या मुखेल वेवस्थापकांक धाडल्या. हो आदेश ह्या रस्तो सुरक्षा सप्तकाचे कार्यावळीचो वांटो आसा. पॅट्रोल पंपवाल्यांनी हॅल्मेट ना, जाल्यार पॅट्रोल ना, असो बोर्ड लावप गरजेचो आसा. पॅट्रोल घातल्या उपरांतूच दुचाकी वा हेर गाडी चलोवप शक्य जाता. दुचाकी चालकांक हॅल्मेट घालपाची सक्ती आसा. सक्तीक लागून आतां 90 टक्के दुचाकी चालक हॅल्मेट घालपाक लागल्यात. तरी लेगीत सगळ्या रस्त्यांचेर हॅल्मेटाची तपासणी शक्य जायना. हाका लागून हॅल्मेट ना, जाल्यार पॅट्रोल ना, अशें धोरण पॅट्रोल पंपवाल्यांनी चालीक लायलें जाल्यार हॅल्मेट सक्तीची आपसूक कार्यवाय जातली, अशी म्हायती येरादारी खात्याच्या अधिकाऱ्यान दिली. नो हॅल्मेट, नो पॅट्रोल ह्या धोरणाक कसो प्रतिसाद मेळटा तें पळोवन धोरण सासणाचें करपाचो प्रस्ताव आसा. पॅट्रोल पंप संघटणे कडेन पयलीं चर्चा जातली, उपरांत कार्यवाय करप शक्य जातलें, अशें तांणी सांगलें.

‘नो हॅल्मेट, नो पॅट्रोल’ धोरणाक येवकार : ठाकूर

‘नो हॅल्मेट, नो पॅट्रोल’ हेर राज्यांतल्या कांय जिल्ह्यांनी आसा. कायद्यान दुचाकी चालकाक हॅल्मेट घालपाची सक्ती आसा. हाका लागून ‘नो हॅल्मेट, नो पॅट्रोल’ धोरण लागू करपाक कसलीच हरकत ना, अशें अखील गोंय पॅत्रोलधनी संघटणेचे अध्यक्ष नरहर ठाकूर हांणी सांगलें. दिसान दीस अपघातांचें प्रमाण वाडत आसा. हॅल्मेटा खातीर दुचाकी चालकाचो जीव खूबश्या प्रमाणांत सुरक्षीत उरता. हाका लागून ‘नो हॅल्मेट, नो पॅट्रोल’ धोरण पॅट्रोल पंपाचेर लागू केल्यार हॅल्मेट सक्तीचे कार्यवायेक बळगे मेळटलें, अशेंय तांणी म्हणलां.