भांगरभूंय | प्रतिनिधी
मुख्यमंत्रीः कार्बन उत्सर्जन उणें करपाक ई-बस सुरू करपाचो यत्नपणजीः स्मार्ट सिटी खाला पणजे कदंब इलेक्ट्रीक बस सेवेक बरो प्रतिसाद मेळपाक लागला. फुडल्या कांय दिसांनी पुराय गोंयांत इलेक्ट्रीक बशी सुरू करपाची येवजण आसा अशें मुख्यमंत्री डॉ. प्रमोद सावंत हांणी सांगलें. शेनवारा कदंब म्हामंडळाच्या 44व्या वर्साच्या निमतान आयोजीत केल्ल्या कार्यावळींत ते उलयताले. ह्या वेळार आमदार उल्हास तुयेंकार, नारायण नायक, पुंडलीक खोर्जुवेंकार, कृतेश गांवकार, उज्ज्वला नायक आनी हेर मानेस्ता हाजीर आशिल्ले.
सध्या पणजे कदंबाच्यो 48 ई बशी लोकांक सेवा दितात. हाका लागून प्रवाशांची बरी वेवस्था जाल्या. कार्बन उत्सर्जन उणें करपा खातीर राज्यभर ई-बस सुरू करपाचो आमी यत्न करतात. कदंब अध्यक्ष आनी हेर पदाधिकारी हे खातीर ते खातीर यत्न करतात. सध्या कदंब म्हामंडळान सेवा डिजिटल करपाचें काम हातांत घेतलां. तशेंच ई-तिकेट सुविधेचो आनीक विस्तार केल्यार प्रवाशांचो आंकडो वाडूंक शकता अशें, मुख्यमंत्र्यांनी सांगलें
कदंब अंत्योदय सेवा दिता. चड करून वाळपय ते पणजी मार्गाचेर फकत तीन ते चार प्रवाशांची सेवा करची पडटा. कॅन्सर, एच.आयव्ही वा 40 टक्क्यां परस चड दिव्यांग आशिल्ल्यांक कदंब फुकट प्रवासाची वेवस्था करता. कदंब समिक्षकांनी ह्या गजालींचो विचार करपाची गरज आसा. ‘म्हजी बस’ येवजण सुरू जाली तरी हें म्हामंडळ केन्नाच बंद जावचें ना. बरे वेवस्थापनाक लागून म्हामंडळाक फायदो जावंक शकता, अशें मुख्यमंत्र्यांनी म्हणलें.
फुडल्या कांय दिसांनी कदंबाक शंबर पोरण्यो बशी काडून उडोवच्यो पडटल्यो. ताका लागून कांय मार्गां वयल्या सेवेचेर ताचो परिणाम जावंक शकता. ते खातीर सरकारान आमकां नव्यो बशी दिवप गरजेचें आसा. सध्या आमी 150 ईव्ही बशींक मंजुरी दिल्या. तातूंतल्यो 87 बशी आमच्या नियंत्रणा खाला आयल्यात आनी डिसेंबर मेरेन आमकां 63 बशी मेळटल्यो. हाचे भायर 50 डिझेल बशी मेळ्ळ्यात. तरी लेगीत मंडळा कडेन 250 बशींचो उणाव आसा.
——————
7 व्या वेतन आयोगाचो फरक बेगिनूच
कदंब कर्मचाऱ्यां खातीर 7 वो वेतन आयोग आमी चालीक लायला. सातव्या वेतन आयोगाचो फरक फुडल्या दिसांनी टप्प्या टप्प्यान दितले. हाचे भायर आमी कदंबाक नव्यो बशी दिवपाचो विचार करतात. सरकार सदांच म्हामंडळाक तेंको दितलें, अशें मुख्यमंतत्र्यांनी सांगलें.
———————–
भौशीक येरादारी वेवस्थेचो वापर करचो
लोकांनी भौशीक येरादारी वेवस्था चड वापरपाची गरज आसा. हाका लागून रस्त्यार दोन चाकी वा चार चाकी वाहनांचो आंकडो उणो जावन प्रदुशण उणें करपाक मजत जातली. तशेंच हाका लागून रस्त्यार जावपी अपघातांचो आंकडो उणो जावंक शकता अशें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
