भांगरभूंय | प्रतिनिधी
राज्यांची उदरगत जावंक ना, जंय बेकारी चड आसा, बऱ्या पगाराची नोकरी मेळपाची संद ना…. थंयचे तरणाटे दुसऱ्या राज्यांनी वतात. पोटा खातीर घर, गांव सोडटात. ते चड करून दिल्ली, मुंबय, बंगळुरू, कोलकाता सारक्या व्हडल्या शारांनी रावतात. स्थलांतर करप्यां मदीं मानायपण, कश्टाचीं कामां करपी लोक चड आसतात. कारण म्हानगरांनी, गोंय, दिल्ली सारक्या राज्यांनी आतां कश्ट करपी थळाव्या लोकांचो आंकडो नेटान देंवपाक लागला. बरी नोकरी मेळिल्ल्यांक ताची गरजूय ना. थोड्यांनी परंपरीक वेवसाय, धंदे सोडल्यात. म्हणटकच तीं कामां करपाक दुसऱ्या राज्यांतल्यान लोक येतलेच. आमच्या गोंयांत पसून हीच परिस्थिती आसा. गोंयांत बऱ्या पगाराच्यो, पदाच्यो नोकऱ्यो करपाक दुसऱ्या राज्यांतले लोक आयल्यात, हांगा स्थायीक जाल्यात. तशेंच बारीक- सारीक कामां, वेवसाय करपाकूय हजारांनी लोक आयल्यात. एका अदमासा प्रमाण हो आंकडो वाडटा. म्हणटकच, आनीक धा वर्सांनी मूळ गोंयकारां परस परप्रांतीयांची लोकसंख्या चड जावं येता.
भारतीय कायद्या प्रमाण कोणाकूय खंयूय वचून रावपाचो, काम करपाचो अधिकार आसा. मात, भायल्यांचो आंकडो वाडटा तेन्ना थळाव्यां मदीं अस्वस्थताय निर्माण जाता. तातूंत तांकां सरकारी नोकऱ्यो मेळत जाल्यार थळाव्याचें चाळवता. दुसरे वटेन ह्या परप्रांतीयांच्या खुस्तार जायत्या जाणांनी वेवसाय सुरू केल्यात. तातूंतलो एक म्हणल्यार बिराडाक दवरप. कांय जाणांनी ल्हान- ल्हान कुडी बांदून त्यो बिराडाक दिल्यात. ताचेर म्हयन्याक 20- 25 हजार जोडपी गोंयकार आसात. ज्या परप्रांतीयांनी पयसो केला, तांणी स्वता घरा बांदून बिराडाक दिल्यांत. एकगठ्ठा मतां खातीर तांकां जमीन दिवपी, तांच्यो काॅलनी उबारपाक मजत करपी लोकप्रतिनिधीय आसात. हाचे आड फाटीं आरजी पक्षान आंदोलनूय केल्लें. जांणी कोणी बिराडां दिल्यांत, तांणी तातूंत रावप्यांची म्हायती पुलिसांक दिवची, असो उलो सरकारान वर्सभरा पयलीं मारिल्लो. पूण चडश्यांनी तो काना- मनार घेतलो ना. परतून एकदां आवाहन केल्लें. तेंय तांणी भायर मारलें. आतां बिराडकार, घरधनी म्हायती दिनात जाल्यार तांचे खर कारवाय करपाची शिटकावणी खुद्द मुख्यमंत्र्यान दिल्या. म्हणटकच सगल्यांच्याच पोटांत कुळकुळ्ळां. दरेका पुलीस स्टेशनार घिट्टी पडल्यात. नांव नोंद करपाची मुजत सरकाराक वाडोवची पडटली, इतले लोक दीसपट्टे येवपाक लागल्यात.
दुसऱ्या राज्यांतल्यान येवपी व्यक्ती कोण, ताची म्हायती घरधनया कडेन आसप गरजेचें. कारण हाचे पयलीं खांपे गुन्यांवकार, गँगस्टर, चोर, नागाेवणें, खुनी पसून गोंयांत येवन लिपल्यात. बिराडाक रावल्यात. पुलिसांच्या मतान, बिराडाक रावप्यां कडल्यान खून, फटींगपणा, चोरी करप, चलयेक घेवन पळून वचप असले प्रकार घडल्यात, म्हूण ही नोंदणी. सगलेच हें करता अशें कोण म्हणचो ना. पूण बेफिकीर रावल्यार बोल्सांत इंगळे वचूंक शकतात. देखून बिराडाक रावता तो नेमको कोण हाची म्हायती घरधनयाक आसपाकूच जाय. पुलिसांनीय ती म्हायती बिराडकाराच्या राज्यांतल्या पुलिसां कडेन तपासपाक जाय. हो जमानो इंटरनेटाचो, डिजिटल. म्हणटकच हें काम सोंपें जातलें. प्रत्येकाचें रेशनकार्ड, आधारकार्ड, मतदान कार्ड तपासून पळोवचें. कोणूय मतदान करपाक गेलो काय, ताच्या मतदान कार्डा वयलो नंबर टायप करतकच ताचें ताच्या राज्यांत कार्ड आसा काय ना, तें खिणा भितर कळपाक जाय. कारण दोन कडेन मतदान करपाचे प्रकार घडटात, असो जाणकारांचो दावो. हाचे मुखार दुसऱ्या राज्यांतलो कोणूय येतकच घरधनयान ताच्या सरकारी कागदांची फोटोप्रत घेतल्यार बरी. कागदां नात जाल्यार ताका बिराडूच दिवपाक जायना. सगलीं कागदां मागीर पुलिशेंत सादर करचीं. जर कागदां नासतना ताणें बिराड दिलें जाल्यार ताचेर खर कारवाय जावची. बिराडकारांची नोंदणी आतां 100 टक्के सक्तीची केल्या. मात एक आसा, थळावे लोकप्रतिनिधी हातूंत हस्तक्षेप करून आपापल्या मतदारांक कसलोच त्रास जावचो ना, हाची जतनाय घेवपाक शकतात.
गोंयकार घरधनयांचें बरें आसा. ज्या परप्रांतीय घरधनयांनी बिराडां करून तातूंत गांवभावांक हाडून दवरल्यात तांचें कितें? बिराडकारांची म्हायती एकठांय करतकच ती फायलींत वा संगणकांत बंद करून दवरूंक फावना. ती खरी काय फट ताची तपासणी जावप गरजेचें. जाल्यारूच ह्या वावराचो पुलिशेक फायदो जातलो. गोंय हें पर्यटन राज्य. हांगां ड्रग्स, खून, सोरो पियेवन बोवाळ घालप, मारामारी करप, चोरयो, विनयभंग वाडल्यात. सरकार ताकाच लागून बिराडकारांची म्हायती एकठांय करता. गोंयाक ह्या बिराडकार नोंदणेचो फायदो जावन गुन्यांवांचेर नियंत्रण येवं, अशेंच सगल्यांक दिसता आसतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
