देवी सिद्धीधात्री

भांगरभूंय | प्रतिनिधी

नवरात्रां : णववी रात

नवरात्रांची निमणी माळ देवी सिद्धीधात्रीची.  ह्या दिसाक ‘नम’ अशेंय म्हणटात. णवूय रातीं मदलो नवरात्रीचो हो दीस एकदम मंगलदायक.   देवी सिद्धीधात्रीचो केतु गिऱ्या कडेन संबंध आसता आनी ती आपल्या भक्तांक जांव उपासकांक पुरायपणान नियंत्रीत करता, हाकाच लागून देवीचे भक्त शिस्तबद्ध पद्धतीन आध्यात्मीक जीण जगपाचें मार्ग आपणायतात.  देवीच्या नांवा प्रमाण तिचे आशिर्वादूय अलौकीक आनी स्फूर्त दिवपी, जिवितांतले भंय, दुख्ख पयसावपी, इत्सा, आकांक्षाची पुर्ती करपी आनी बुद्धीमत्तेचो विकास करपी देवी सिद्धीधात्री.

कांय पुराणीक साहित्या वरवीं कळता की देवी सिद्धधात्री कडेन दिव्य शक्तींची पुरवण आसता आनी ह्यो शक्ती खुबूच अलौकिक आसता.  मार्कंडेय पुराणांत देवीच्या असल्या आठ अलौकीक सिद्धींचो उल्लेख आसा. ब्रह्मावेवर्त पुराण देवीच्या अठरा दिव्य शक्तींचो उल्लेख करता, देखीक आटप, व्हड जावप, जड जावप, ल्हव जावप, सर्वव्यापी  जावप, इत्सा पुर्ती कराप, प्रभुत्व जोडप, नियंत्रण दवरपी, असल्यो आनीक कितल्योश्योच अलौकीक शक्ती देवी कडेन आसात, असो उल्लेख मेळटा.  

देवीचे रुप, प्रतिमा जरी वेगळी आसली तरी हेंय बी माता पार्वतीचें एक रूप. देवी सिद्धीदात्री साडी न्हेसून पुराय तरेन फुलिल्ल्या कमळाचेर बसल्या. हेर देवी भशेन तिका चार हात आसात. एका हातांत सुदर्शन चक्र, एका हातांत शंख, एका हातांत तोंडको आनी एका हातांत कमळ आसा. कमळार बसुनूय देवीन हातांतूय कमळ धरलां. भांगराच्या अलंकारां बरोबर गळ्यांत ताज्या फुलांची माळ घाल्ली देवी आपल्या भक्तांचेर कृपा दृश्टी दवरपी म्हूण तिच्या मोहक रुप्या वेल्यान कळता. देवीचें दुसरें नांव म्हालक्ष्मी.  देवी सिद्धीधात्री वेगळी कोणूच नासून म्हादेवाची बायल पार्वती. शीव आनी शक्तीचें रुप म्हळ्यार सिद्धीधात्री, म्हादेवाची अर्दी बाजू देवी सिद्धिधात्री आनी अर्धनारेश्वर म्हूण तिका पुजतात.  

पुराण काळांत सगळ्या संवसारांत एका प्रकारची पोकळी, रितेंपण जाल्लें. त्याच वेळार एक दिव्य असो उजवाड जालो आनी तो दिव्य प्रतिमेंत बदल्लो. तीच दिव्य प्रतिमा म्हळ्यार देवी म्हाशक्ती, ह्याच देवीन ब्रह्मा, विष्णू आनी महेश ह्या देवांची उत्पत्ती केली.  ह्या देवांक देवी म्हाशक्तीन संवसार रचप, सांबाळप आनी विद्वंस करप हीं कामां वाटून दिलीं. तांकां कांय अलौकीक शक्तींची पुरवण केली आनी अधिकार दिले. हेच देवीन खुबशे देव, दानव, गिरे, आकाशगंगा ह्या संवसारांतल्या जायत्या वस्तूंची उत्पती केली. सिद्धीधात्री देवीची तिची मना पासून उपासना करता आनी दिव्य शक्तींचो, परिपुर्णतेचो आशिर्वाद घेता. ताकाच लागून देवी सिद्धीधात्रीक परिपुर्णतेची देवी म्हणटात.

अस्तुरेच्या जिवितांतले पांवडे दाखोवपी णव राती

–

देवी शैलपुत्री :- चली भुरगें जेन्ना जल्म घेता तेन्ना तिचें पयलें रुप कोणाची तरी धूव जांव पुत्री म्हूण जाता देखून देवीचें पयलें रूप शैलपुत्री.

देवी ब्रह्मचारिणी :- चलयेचें शिक्षण घेवपाचें वय, अणभव घेवपाचें वय म्हूण हें अस्तुरेचें रुप देवी ब्रह्मचारिणीचें.

देवी चंद्रघंटा :- अस्तुरी शिकून, वेगळे वेगळे अणभव घेवन, ल्हवू ल्हवू ह्या संवसारांत जियेवपाक तयार जाता म्हूण हें अस्तुरेचें रूप देवी चंद्रघंटेचें.

देवी कुष्मांडा :- अस्तुरेचें हें रुप जेन्ना ती मानसीक,शारिरीक आनी संवसारीक अणभव घेवन आवय जावपाक तयार आसा. अंडकोशांतल्यांत ती एक नवो जीव धारण करूं शकता, तें अस्तुरेचें रूप देवी कुष्मांडेचें.

देवी स्कंदमाता :-  आवयची जबाबदारी घेवन तयार जावपी देवीचें रूप म्हणल्यार देवी स्कंदमातेचें. 

देवी कात्यायनी :- आपल्या भुरग्याचें रक्षण करपाक तत्पर आसपी अस्तुरेंचें रूप म्हळ्यार देवी कात्यायनीचें.

देवी कालरात्री :- समाजांतल्या, भायल्या, भितरल्या संकश्टांक तोंड दिवन, वायटाचेर जैत मेळोवपी देवीचें रूप म्हळ्यार देवी कालरात्री.

देवी म्हागौरी :- संकंटांक तोंड दिवन, हेर अस्तुऱ्यांक स्फूर्त दिवपी देवीचें रुप म्हळ्यार देवी म्हागौरीचें.

देवी सिद्धीधात्री :- आपल्या अलौकिक रुपान, तेजान बायलांक आत्मीक संर्घाशान सिद्धीचो मार्ग दाखोवपी रूप म्हळ्यार देवी सिद्धीधात्री.

– प्रिता परब