भांगरभूंय | प्रतिनिधी
भा रत हो तरणाट्यांचो देश आसा. संवसारांत सगल्यांत चड तरणाटे भारतांत आसात. देशाचे वट्ट लोकसंख्ये पैकीं 40 टक्के लोकसंख्या ही तरणाट्यांची आसा. आयज आमी ह्याच तरणाट्यांच्या बळार महासत्ता जावपाचे सपन पळयतात. भारताचे आदले राष्ट्रपती आनी नामनेचे शास्त्रज्ञ डॉ. ए. पी. जे अब्दुल कलाम हांचो तर तरणाट्यांचेर खूब विस्वास आशिल्लो. ह्या तरणाट्यां मदीं खूब उर्जा आसा. तरणाट्यांचे हे उर्जेचो वापर जायत जाल्यार भारताक महासत्ता जावपा पसून कोणूच आडावंक शकना असो ठाम विस्वास डॉ. ए. पी. जे. अब्दुल कलाम हांकां आशिल्लो.
डॉ. ए. पी. जे. अब्दुल कलाम हांच्या सारक्या द्रश्ट्या व्यक्तीन जें वळखलें तें आयच्या राज्यकर्त्यांक मात वळखूंक आयलें ना अशें दुर्दैवान म्हणचें पडटलें. कारण आयच्या तरणाट्यांचो उर्जेचो, तांच्या गुणवत्तेचो उपेग सरकाराक करून घेवंक येना वा सरकार हेतुपुरस्सर ताचे कडेन आडनदर करता. हाचो पुरावोच स्टेट ऑफ वर्कींग इंडिया 2023 च्या अहवालांतल्यान पळोवंक मेळ्ळो. ह्या अहवालांतल्यान देशांतल्या बेरोजगारीचे समस्येचें भिरांकूळ वास्तव मुखार आयलां. ह्या अहवाला प्रमाण देशांत तरणाटे पदवीधर बेरोजरीचो दर 42.3 टक्क्यांच्या उंचेल्या पांवड्यार आसा. जाल्यार उणे शिकिल्ल्या लोकांच्या बेरोजगारीचो दर 8 टक्के आसा. 25 ते 30 वर्सा पिराये गटांतले पदवीधर वा उच्च पात्रतायधारक तरणाट्यांचो बेरोजगारीचो दर 22.8 टक्के आसा. उच्च माध्यमीक पांवड्या वेली पात्रता आशिल्ल्या आनी 25 वर्सां परस उणे पिराये गटांतल्या तरणाट्यां मदीं बेरोजगारीचो दर 21.4 टक्के इतलो आसा. हाचोच अर्थ उणे शिकिल्ल्या पसून पदवीधर आशिल्ल्या तरणाट्यां मेरेन सगल्यांकूच बेरोजगारीचो प्रस्न भेडसायत आसा. ही आंकडेवारी हुस्क्याची आसा.
देशांतल्या 40 टक्क्यां परस चड तरणाटे जर बेरोजगार आसत जाल्यार त्या तरणाट्यांची मानसीकता कितें आसतली हाचो विचार न केल्लोच बरो.
शिक्षण आसा, पदवी आसा, काम करपाची इत्सा आसा, कुटुंबा खातीर, देशा खातीर कितेंय तरी करून दाखोवपाची इत्सा आसा, पूण नोकरी ना अशी अवस्था तरणाट्यांची आसा. नोकरी नाशिल्ल्यान तरणाट्यां मदीं सुमारा भायर निरशेवणी आयल्या. आपूण इतलो शिकून लेगीत आपल्या शिक्षणाचो उपेग जायना. ताका लागून तरणाटे सुमारा भायर अस्वस्थ आसात. सरकार सद्दां नवें परिपत्रक काडून तरणाट्यांचो रोजगार झोमून घेता. सद्या तर खाजगीकरणाक ओतो आयला आनी ताका लागून सरकारी नोकरी मेळोवपाचें तरणाट्यांचें सपन सपनूच उरतलें. वास्तवीक फाटल्या खूबशा वर्सां सावन सरकारी नोकर भरती जाल्ली ना. नोकर भरती खातीर सरकार जायरात काडटा. हजारांनी रुपया परिक्षा फी घेवन तरणाट्यांची परिक्षा घेता. पूण प्रत्यक्ष नोकरी काय दिना. केन्ना पेपर फुटीचें जाल्यार आनीक कसलेंय कारण दिवन भरती मुखार धुकलतात. शिक्षकांची भरती हें ताचें एक बरें उदाहरण.
आयज सरकाराच्या सगल्याच खात्यांनी कर्मचाऱ्यांचो उणाव आसा. एक लिपीक चार चार टेबलां सांबाळटा. एक शिक्षक चार चार वर्ग शिकयता. फाटलीं खूबशीं वर्सां पदोन्नती जाल्ली ना. जर सरकारान सरकारी नोकऱ्यांचें खाजगीकरण करपाचो निर्णय रद्द करून भरती केली जाल्यार देशांतली बेरोजगारी कांय प्रमाणांत काय जायना उणी जातली. पूण सरकाराक तरणाट्यांच्या रोजगाराचें कांयच देणें घेणें ना. नोकरी मागपाक गेल्ल्या तरणाट्यांक राजकी फुडारी भजीं तळांत अशें म्हणून तांची फकांडां करतात. शिक्षण आसून नोकरी ना, शेती आसून शेतांत कांय पिकना. नोकरी ना, शेतूय बेभरवंशाचें जालां. स्वताचो वेवसाय करचो अशें म्हणत जाल्यार भांडवल ना. ताका लागून आयचो तरणाटो सुमारा भायर अस्वस्थ आसा. ह्या अस्वस्थेचो उद्रेक केन्नाय जावंक शकता. जर तरणाट्यांच्या अस्वस्थेचो उद्रेक जायत जाल्यार व्हडल्या व्हडल्यांक नाका पुरो जातलें, म्हणूनच सरकारान तरणाट्यांच्या हातांत रोजगार दिवचो. तांचे मदीं आशिल्ले उर्जेचो राष्ट्रीय कार्या खातीर उपेग करून घेवचो. देशांतली बेरोजगारी उणी करपा खातीर सरकारान ठोस यत्न करचे.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
