भांगरभूंय | प्रतिनिधी
आयज काल चडशे लोक नुस्त्याच्या जेवणा परस शिवराक जेवण चड पसंत करतात. शीत, दाळ, सार, पालेभाजी, सालाद, पापड, लोणचें आनी पेलोभर सोलाचें तांबडेंगुज तिवळ मेळ्ळे म्हणटकच ते तृप्त जातात. शिवराक जेवणान तांकां प्रोटिन्स मात्शें कमी मेळटा, हें खरें. पूण हळडुवीच मुगदाळ ही प्रथिनाचो मुख्य घटक जावन आसा. एक कप मुग दाळींत सुमार १५ ग्राम प्रोटीन्स आसता. हे कुडीच्या स्नायूंची वाड करपाक मजत करता. शिवराक जेवण जेवप्यांनी मुग दाळीचो चड वापर करपाक जाय. सदांच आहारांत मुग दाळीचो वापर केल्यार आमचे स्नायू बळिश्ट जातात. कुडीक गरजेची आशिल्ल्या बाकी प्रथिनांचो उणाव ती भरून काडटा.
मुगाचे दाळीचो लोक खुब जिनसां खातीर उपेग करतात. हे दाळीचें वरण करतात. दाळ बरी भिजोवन पीठ करून तातूंत किशिल्लें गोड, नाल्लाची सोय, बदाम, काजुबियांचे कुडके, वेलची पावडर घालून रुचीक लाडू करतात. सणा – परबेक मुग दाळ भाजून ती बरी शिजोवन तातूंत नाल्लाचो आपरोस, किशिल्लें गोड, काजू, बदाम घालून पुश्टीक कण्ण करतात. उपास करपी दोन- तीन पेले हें कण्ण पियेतात.
मुगाची दाळ पचपाक बरी. हे दाळींत फायबर्स आशिल्ल्यान पचन क्रिया सुरळीत जाता. पोटाचे विकार जायनात. मुगाची दाळ खाल्यार गॅस्टिक समस्या ना जातात. हे दाळींत कमी कॅलरी, फॅट आसतात. ताका लागून वजन सारकें उरता. हे दाळींत भरपूर विटामिन्स आसतात. खनीजूय भरपूर आसतात.
पुश्टीक आहाराचो मुगदाळ ही एक घटक म्हणल्यार जाता. तातूंत फाॅलिक अॅसिड, पोटेशियमूय आसता. दाळीन काळजाक फायदो जाता. तातूंत अॅण्डीआॅक्सिडंट, फायबर्स आसतात. ताका लागून आमचो ब्लड प्रेशर सारको उरता. सदांच मुगदाळ इल्ली इल्ली भाजून खावपाची. तिचो प्रत्येक भाजयेंत वापर केल्यार काळजाचो आताक येवपाचो धोको उणो जाता. ल्हान भुरग्यांक मुगदळ भाजून, तिचो पिठो करून, दूद, गोड घालून दिवप बरें. भुरगीं आवडीन तें खातात.
– सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
