भांगरभूंय | प्रतिनिधी
पणजी: अंदूं गोंयांतूच न्हय तर भारतांत बरोच पावस झडलो. लुकसाणूय सोंसचें पडलें. फाटल्या चार वर्सांची टक्केवारी पळयल्यार अंदूं ८ टक्क्यांनी चड पावस पडला, हें स्पश्ट जालां. २०२० वर्सा भारतांत १०८ टक्के पावस पडलो. मजगतीं, पावस येवचे पयलीं लेगीत हवामान खात्यान अंदूं पावसाच्या हंगामांत सरासरी परस चड पावस पडटलो असो अदमास काडिल्लो. अंदूं बरो पावस पडिल्ल्यान खरीप पिकांची लागवड करपी शेतकारांक ताचो फायदो जातलो. ताचो फायदो शेतकी क्षेत्रांत दिसतलो.
माॅन्सुनाच्या पावसाचेर आदारून जून आनी जुलयां खरीपाची लागवड करतात. ऑक्टोबर -नोव्हेंबर म्हयन्यांत ताची कापणी करतात. त्या म्हयन्यांनी रबी (वायंगणें) पिकां लायतात आनी जानेवारींत कापणी करतात. गिमाळीं पिकां रब्बी आनी खरीब हंगामांत घेतात. कड्डणां, भरडधान्य, ऊस, तेलबियो हांचे लागवडींत फाटलीं कांय वर्सां वाड पळोवपाक मेळटा. हें अशेंच चालू उरल्यार येवपी काळांत कडधान्यांच्या वाडपी किंमतीचेर नियंत्रण येतलें.
सरासरी परस चड पावस पडल्यार खरीप पिकांकच न्हय तर येवपी रबी पिकांकय फायदो जातलो. भारतांत खरीप हंगामांत परंपरेन केल्ली शेती माॅन्सुनाच्या पावसाचेर आदारून आसता. खरीप पिकाची लागवड फाटल्या वर्सा १०८८.२२ लाख हेक्टर जमनीचेर जाल्ली. अंदूं ११०८.५० लाख हेक्टर जमनीचेर खरीप पिकाची लागवड जाल्या. तेच प्रमाण २०२२ वर्साच्या तुळेंत फाटल्या वर्सा खरीप लागवडींत १.९ टक्क्यांनी वाड जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
