भांगरभूंय | प्रतिनिधी
तंत्रज्ञान दिसानदीस बदलत आसता. ताचो आमी बऱ्या कामां खातीर फायदो घेवन स्वताची, राज्याची उदरगत करपाक जाय. ह्या मळा वयल्या उपकरणांची दुरुस्ती मात वेळार करपाची गरज आसता. आडनदर करीत जाल्यार तीं ऐनवेळार धोको दितात. सीसीटीव्ही कॅमेरो हें अशेंच एक उपकरण. ताचो वापर करून साबार गुन्यांवांचो घुस्पागोंदळ सुटावो जाला. निदान नेमकें कितें जालें, तें तरी पुलिसांक कळ्ळां. म्हणटकच तांकां तपासाची दिशा थारावपाक मेळ्ळ्या. अर्थांत सीसीटीव्ही कॅमेरे आसा म्हणटकच गुन्यांव कमी जाले अशांतली गजाल न्हय. तरीय ह्या तंत्रज्ञानाक भियेवन कांय गुन्यांवकार वा कायदे मोडप्यांनी स्वताचेर नियंत्रण दवरलां. मात, कॅमेऱ्यांक लागून पेडणेंच्या देवळांनी जाल्ल्या चोरयांचो तपास लागला काय ना, तें कळूंक ना. कारण आतां चोरूय तोंड कपड्यान लिपोवन चोरयो करपा इतले हुशार जाल्यात.
गोंय पुलिसांनी ‘नेत्र’ उपक्रम सुरू केला. ताचे खाला तांणी गोंयांतल्या अडेज हजार सरकारी, खाजगी सीसीटीव्ही कॅमेऱ्यांचें मॅपींग केलां. फुडाराक त्या वाठारांतल्या गुन्यांवांचो तपास करपाक ह्या कॅमेऱ्यांक लागून मजत जातली, अशें पुलिसांचें मत. खरें म्हणल्यार जंय गुन्यांव चड जातात, थंय कॅमेरे बसोवपाची सक्ती पंचायत, पालिकेक करपाक जाय. दर्यावेळो, दर्यादेगो, हमरस्त्यांचेर तर ते जायच. आतां ल्हान- व्हड वेवसायीक, आस्थापनां स्वता जावन सीसीटीव्ही कॅमेरे बसयतात. कायद्यान ते तांकां बसोवचे पडटात. ह्या कॅमेऱ्यांची सगल्यांत व्हडली अडचण म्हणल्यार ते रातदीस चलतलेच हाची खात्री ना. जायते फावटी ते बंद अवस्थेंत आसतात. म्हणटकच ते विकत घेतनाच तांचो दर्जो, वितरक, देखभाल हाचो नियाळ घेतल्यार बरें. नाजाल्यार हजारांनी रुपया खर्च करून कॅमेरे बसोवन फायदो ना.
‘नेत्र’ उपक्रमाक लागून पुलिसांची सगले कडेन नदर उरतली. कॅमेऱ्यांचें मॅपींग केल्ल्यान, तांचे धनी कोण, तांचो संपर्क क्रमांक, कॅमेऱ्याची बॅकअप तांक, कितलो वेळ घडणूक रेकाॅर्ड जाल्या, तो नेटवर्का कडेन जोडला काय ना, घडणुके वेळार तो चालू आशिल्लो काय ना…. ही सगली म्हायती पुलिसांक मेळटली. रोखडेच हे सगले सीसीटीव्ही कॅमेरे नेटवर्काक जोडटले. उपरांत पुलिसांक वॅबसायटीचेर वा अॅपाचेर ह्या कॅमेऱ्यांनी रेकाॅर्ड जाल्ली म्हायती कार्यालयांत बशिल्ले कडेन मेळटली. हो डेटा फक्त पुलिसांकूच वापरपाक मेळटलो. कारण कोणाच्याय हाताक लागल्यार ताचो गैरवापर जावं येता. येरादारीचेर नियंत्रण, गुन्यांवांचो तपास, मालमत्तेचे जावपी लुकसाण टाळप, अपघात आडावप, पुरावे एकठांय करप… अशा साबार कामां खातीर ताचो वापर करपाक मेळटलो. ह्या नव्या उपक्रमाक लागून कांय जायना पुलिसांचे नदरे पोंदच्यान राज्यांतल्यो सगल्यो घडणुको वतल्यो. राज्यांत अपघात वाडल्यात. गाडी, दुचाकी वेगान चलोवप हें ताचे फाटलें एक कारण. काय जाण रस्तो मेकळो दिसलो काय एक्स्लेटर दाबून दवरतात, तो सोडिनात. असल्या अतिउत्साही, कानांत वारें भरिल्ल्या तरणाट्यांचेर कारवाय जावपाक जाय. आयज गांवांतल्या कांय रस्त्यांचेर कॅमेरे आसात, पूण तातूंत कितें रेकाॅर्ड जालां तें कोण पळयनात. म्हणटकच कायदो मोडपी दर दिसा मस्ती करपाक मेकळे. कॅमेऱ्यांची नदर आसली तरी आतां पुलिसांचें कॅमेऱ्यांचेर लक्ष आसा, हाची खात्री पटली काय ड्रायव्हरांक इल्ली तरी भिरांत दिसतली. सीसीटीव्हीक लागून देवळांनी जाल्ल्या चोरयांचे पुरावे मेळ्ळ्यात, गांवांनी बिबटे भोंवतात, तें कळ्ळां. तेन्ना ह्या तंत्रज्ञानाचो तळागाळांत वापर जावप बरें.
पुलिसांच्या व्हाॅट्सअॅप आनी यू ट्यूब चॅनलाचेंय लोकार्पण जालें. ही जनजागृताये खातीर एकदम बरी गजाल. नागरिकांक येरादारीचे, आपत्कालीन परिस्थितीचे अॅलर्ट व्हाॅट्सअॅप चॅनला वरवीं मेळटलें. कांय रस्त्यांचेर अपघातांक लागून येरादारी ठप्प जाल्या, ताची म्हायती मेळत जाल्यार लोकांक दुसरे वाटेन वचपाक मेळटलें. गुन्यांवांचें मुखार कितें जालें ताची म्हायती मेळटली. हें यूग म्हायती, तंत्रज्ञानाचें. गुगल सर्च केल्यार बरीच म्हायती मेळटा. फक्त खरी म्हायती खंय सोदप तें मात खबर आसपाक जाय. घराघरांनी टिव्ही आसात. दरेकलो सोशल मिडियाचेर आसा. तरीय शेंकड्यांनी लोकांक म्हत्वाच्यो गजाली खबर आसनात. ते भलत्याच जगांत वावुरतात. निदान पुलिसांच्या ह्या चॅनलांक लागून तांकां सायबर सुरक्षा, रस्तो सुरक्षा, घुंवळे वखदांचें वायट परिणाम कळटले. यू ट्यूबाचेर शिक्षणीक कार्यावळी करूं येतात. पुलिसांच्यो मुलाखती, मार्गदर्शन करूं येता. कायद्यांची म्हायती, ते मोडल्यार कितें ख्यास्त जावं येता, तेंय हायस्कुलांतल्या भुरग्यांक सांगू येता. ताचोय फायदो जातलो. पुलिसांनी एक पावल मुखार मारलां. तांकां येवकार.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
