भांगरभूंय | प्रतिनिधी
कोंकणी लेखक अरुण साळकार हांचे साळकां हें तिसरें पुस्तक निकतेंच उजवाडाक आयलां. ‘घोडकां’ आनी ‘वावझड’ हीं तांची पुस्तकां ह्या आदीं उजवाडाक आयल्यांत आनी तांकां वाचप्यांकडल्यान बरो प्रतिसाद मेळ्ळा.
अरुणबाब हे सोशल मिडीयाचेर सामके ‘ऍक्टीव’! ते अदीं-मदीं ‘ब्लॉग’य बरयतात. ह्या ब्लॉगांनीं ते आपल्याक आयिल्ले, तशेंच हेरांकय आयिल्ले अणभव बरयतात. खंयचीय गजाल जो कोण मनस्पुर्वक करता तेन्ना ती सगळ्यांच्या काळजा मेरेन पावता. अरुणबाबाच्या लिखाणाचेंय तशेंच! सामकी सोंपी भास, खऱ्यो घडिल्ल्यो घडणुको, कसलोच पाल्हाळ ना, सगळें कशें ज्युस्ता ज्युस्त! घडये तांचो इंजिनीयरिंग फाटभुंयेचो तांकां हो फ़ायदो जाला आसतलो. आपले आनी हेरांचे अणभव वाचकां मेरेन ते बेस बरे पावयतात.
ह्या पुस्तकांत वट्ट 36 लेख आसात. हांतले लेख म्हळ्यार अरुणबाबाच्या जिवितांतल्या विंगड-विंगड पांवड्यांचेर आयिल्ले अणभव! भुरगेपणांतले, कॉलेजींतले, हॉस्टेलांतले, रासवळ जिणेंतले आदी. अशे अणभव तुमकां-आमकां सगळ्यांक आयल्यात आसतले. हे अणभव वाचतनां अरुणबाब ते बरयनांत तर ते वाचप्यांच्या म्हऱ्यांत बसुन सांगतात अशें दिसता. हांव म्हणीन हेंच ह्या पुस्तकाचें येस!
ह्या पुस्तकांतले कांय लेख हे विनोदी आसात तर कांय लेख लेखकाच्या जिणेंत घडिल्ल्या सत्य घडणुकांचेर आसात. लेखकाचो सगळ्या मळार संचार आसा. तांकां कसलोच पात्सो ना. तांकां जिणेंतल्यो सगळ्यो गजाली आवडटात. तांका फ़िल्म संगीत आवडटा, सिनेमा नाटकां आवडटात. लेखकाची रसिकताय लक्तुबायेची. विंगड विंगड गजालींचो संग्रह करपाक लेखकाक आवडटा आनी ताचेर तो लक्तुबायेन बरयताय बी. ते भायर लेखक हे गणिताचे मोगी. दत्ता नायक आनी मुकेश थळी ह्या कोंकणी लेखकांचे गणितावेलें प्रेम आनी प्रभुत्व आमी जाणात. साळकारालो ‘गणित एक प्रशिक्षक’ हो दीर्घ लेख गणित कशें सोंपेपणी समजावन शिकोवंचें हाचें एक बेस बरें उदाहरण. हो लेख सगळ्या गणित शिकोवप्यांनी मुजरत वाचचो.
म्हाका ह्या पुस्तकांतले सगळे लेख आवडले. पूण चड घोस्ताक गेले ते लेख म्हळ्यार ‘ओली कोथमीर’, ‘घर’, ‘सोर्त,’ ‘लास्ट बेंचर्स’ आनी ‘निर्हेतूक’. ‘ओली कोथमीर’ हो लेख वाचतगीर लेखकान म्हज्याच मनांतलें बरयलां अशें दिसलें. म्हाका कोथमीरेचो पालो खंयच्याच जिनसांत वा घटकांत घाल्लो आवडना. ताची म्हाका लेखका इतली एलर्जी ना. पूण कांय जिनसांनीं घाल्लो तो म्हाका अजिबात आवडना. ताका लागून हो निबंद चड घोस्ताक गेलो.
ह्या पुस्तकाची प्रस्तावना अरुणबाबाचो वर्गमित्र आनी कोंकणीचो क्रियाशील वावूरपी प्रदीप लवंदे हांणी बरयल्या. प्रदीपबाब हे अरुणबाबाचे वर्गमित्र जाल्ल्यान ह्या पुस्तकांतल्या कांय गजालींचे ते साक्षीदार आसात. म्हाका ह्या प्रस्तावनेंतलें प्रदीपबाबाचें एक वाक्य खूप आवडलें तें म्हळ्यार, ‘तरणाटीं खंय भविश्य काळांत जियेतात आनी जाण्टीं खंय भूतकाळांत’. अरुणबाबाचें हें पुस्तक आमकां नॉस्टेल्जीक करता. अरुणबाबा कडेन अश्या यादींचे आनी गजालींचें व्हड गांठवल आसा, सांठवणीचें संचीत आसा तें ताणी बेगिनूच कोंकणी वाचप्यां मुखार हाडचें. अशीं आनीकूय पुस्तकां ते वाचप्यां मुखार हाडटले हे आवंडे.
निमणे कडेन पुस्तकाच्या मुखचित्राचो मुजरत उल्लेख करिनसो दिसलो. अरुणबाबाचो पूत निखील हाणें तें मुखचित्र काडलां आनी तें सुंदर चित्र ह्या पुस्तकाक योग्य न्याय दिता. उंचाय दिता. ही साहित्याचो पनवार वाचप्यांच्या घरां-घरांत पावंची अशी मनांकाळजा सावन इत्सा!
वावझड
उजवाडावपी: अरुण साळकार
दिवचल
पयली उजवाडावणी: जून 2024
पानां: १६०, मोल: १५० रुपया
– सखाराम शेणवी बोरकार
9923306751
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
