भांगरभूंय | प्रतिनिधी
गोंयांतले चडशे तरणाटे तशे धडपडी. कितें ना कितें करीत आसतात. उच्च शिक्षण घेतलें तरी बेकार रावचे परस थोडे उण्या पगाराच्यो नोकऱ्योय करतात. थोडे तात्पुरत्या तत्वाचेर सरकारी नोकऱ्यो करतात. एक ना एक दीस कायम जातले, अशी तांकां आस्त. गोंयांत म्हारगाय चड. म्हणटकच पोट भरपाक हात, पांय हालोवचेच पडटात. पांयार पांय उडोवन बसप सगल्यांकूच शक्य ना. तरीय गोंयांत बेकारीचें प्रमाण देशांत सगल्यांत चड आसा. 8.5 टक्के. केरळांतूय तें 7.2 इतलें आसा. मजा म्हणल्यार देशांतलीं हीं सगल्यांत सुदारिल्लीं, चड साक्षरताय आशिल्लीं राज्यां. कामगार सर्व्हे वरवीं ही आंकडेवारी मेळ्ळ्या. आमचें गोंय पर्यटना खातीर लोकप्रीय. म्हणटकच हांगा नोकरेच्यो चड संदी. भायल्या राज्यांतले शेंकड्यांनी लोक हांगा येतात आनी मेळटा त्यो नोकऱ्योे, वेवसाय करतात. कांय जाणांक यशूय मेळ्ळां. गोंयकारांनी सोडिल्ल्या मळांचेर तर तेच दिसतात. प्लंबर, गंवडेकाम, टायल्स बसोवप, मिठाय, फळां- भाजी विक्री, केंस कापप, ट्रक ड्रायव्हर, कंडक्टर आनी हेर जायत्या कामांचेर नदर मारल्यार थंय कितले गोंयकार आसात, हें प्रत्यक्ष पळोवपाक मेळटलें.
कुशळटाय उदरगत खात्यान कांय आंकडे जाहीर केल्यात. तातूंत एक आगळेंपण आसा. धावेंत 70 टक्के गूण मेळयिल्ल्या 300 तर 60 टक्के मेळयिल्ल्या 1,044 जाणांनी आयटीआयंत प्रवेश घेतला. बारावी पास जाल्ले 55 विद्यार्थी अंदूं आयटीआयक गेल्यात. पोरूं परस हो आंकडो चड आसा. आदल्या तेंपार धावेंत नापास जावपी वा शिकपाक हुशार नाशिल्ले विद्यार्थीच आयटीआयंत वताले. आयज ते दीस उरूंक नात. गोंय सरकारान कुशळटाय उदरगतीक दिल्ली उर्बा आनी सुरू केल्ले नवे अभ्यासक्रम हाका लागून हो नवो पायंडो पडला, अशें जाणकारांचें मत. आनीक एक गजाल आसा, ती म्हणल्यार बरी, चड पगाराची, उण्या कश्टाची नोकरी मेळटलीच हाची खात्री ना. तातूंत गोंयांत म्हारगाय आनी उंचेल्या राहणीमानाक लागून 15- 20 हजार रुपयांत तीग जाणांचें कुटुंब चलोवप कठीण. शेजाऱ्यां मदली सर्त, शिक्षण, मनोरंजन हाचे खातीर दरेकलो चडांत चड पगाराची नोकरी सोदता. सगलेच रिणांच्या चपक्यांत सांपडल्यात. बेगीन नोकरी मेळटली जाल्यार आयटीआयंतले कुशळटाय अभ्यासक्रम केल्यार बरे, अशेंय भोवतेकांक दिसता आसतलें. आयटीआय हो आतां पर्याय म्हूण उरूंक ना. फाटल्या कांय वर्सां सावन आयटीआयक प्रवेश घेवपाक सर्त लागता. हातूंतच सगलें आयलें.
आयटीआय शिकून पुराय जातकच विद्यार्थ्यांनी स्वताचे उद्देग, वेवसाय सुरू केले जाल्यार राज्या खातीर तें हिताचें थारतलें. चीनांत घराघरांनी लघुउद्देग आसात. तांच्या अर्थीक यशाचें हेंवूय एक कारण. पयलीं आयटीआयंत टर्नर, फिटर, वेल्डर, प्लंबर, इलेक्ट्रिशीयन अश्या थारावीक ट्रेडींचें प्रशिक्षण मेळटालें. मात आतां बदलपी काळा प्रमाण सरकारान नवे अभ्यासक्रम सुरू केल्यात. 3 डी प्रिंटींग, ई- व्हेईकल मेकॅनीक, ड्रोन टेक्निशीयन, घरगुतीं उपकरणां दुरुस्ती अशे जायते. समाजांत ज्या कामांक मागणी, गरज आसा, अशे अभ्यासक्रम तज्ञांनी सुचोवपाक जाय. गोंयांत टिव्ही येवन 42 वर्सां जालीं. संगणक येवन 30 वर्सां जायत आयलीं. तरीय आपरोजगार म्हूण ते दुरुस्त करपाचें काम करपी तंत्रज्ञ सोदचे पडटात. नाजाल्यार शोरुमांत वच्चें पडटा. फुडल्या पांच वर्सांनी डिजिटल मळाक बरे दीस येवपाचे आसात. ते नदरेनूय अभ्यासक्रम सुरू करूंक जाय. एआय परस समाजान जित्या जिव्या मनश्यांक प्राधान्य दिवंक जाय. ‘स्वयंपूर्ण गोंय 2.0’ येसस्वी करतलो जाल्यार आयटीआयंत शिकपी तरणाट्यांनी आपरोजगाराक प्राधान्य दिवचें पडटलें. सरकारान ते खातीर सगली मजत करपाची तयारी दवरल्या, ही बरी गजाल.
आयज व्हडल्यो कंपनीं आयटीआयंत शिकिल्ल्यांक प्राधान्य दितात. पूण, गोंयांत शिकयतात, तसलें काम आशिल्ले कारखाने, कंपनीं हांगा येवपाक जाय. उद्देग मंत्र्यांच्या मतान, भायल्या उद्देगांनी हांगा येवचे पयलीं प्रकल्पाची येवजण करतनाच थळाव्यांक चडांत चड रोजगार कसो मेळटलो हाचो विचार करूंक जाय. ते तरेचें प्रशिक्षणूय दिवंक जाय. सरकार तांकां सगले तरेच्यो सवलती, अनुदानां दितात. म्हणटकच ती तांची लागणूक. जायते फावटी सरकार उद्देगांक परवानगी दिता. मागीर कळटा की ते खातीर लागपी मनीसबळ गोंयांत ना. मागीर भायल्या राज्यांतल्यान तें हाडचें पडटा. थोडे गोंयांत मेळटात तरीय भायल्यान कामगार, कर्मचारी हाडटात, ही चुकीची गजाल. हालींच भायल्या राज्यांनी जायराती दिल्ल्यो. ताचेर मागीर वाद जाल्लो. ती कर्मचारी भरती मागीर जाली काय?
आयटीआय कडेन पळोवपाचो विद्यार्थ्यांचो दिश्टीकोन बदल्ला, ही शिक्षण मळा खातीर बरी गजाल. रोजगार मळाकूय ताचो फायदो जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
