भांगरभूंय | प्रतिनिधी
-खण वेवसायाक बेगाबेग मंजुरी दिवची, रोजगार – वेवसायाक थळाव्यांचें प्राधान्यदिवचलः बार्देस म्हालांतल्या पिर्ण आनी थिवी गांवांतल्या कार्यरत 72.0544 हेक्टर क्षेत्रांत आशिल्ल्या ब्लॉक 8 थिवी – पिर्ण मिनरल ब्लॉका खातीर पर्यावरणी मंजुरी मेळोवपा खातीरची सुनावणी बिरेस्तारा दिवचले जाली. ताका भोवतेक लोकांनी पुराय समर्थन दिले. तशेंच थळाव्यांनी रोजगार तशेंच वेवसायाक चालना दिवची, अशी मागणी केली.
कांय इंटरनॅशनल प्रायव्हेट लिमिटेड हे ह्या कंपनीचे पुरस्कर्ते आसून उत्पादन क्षमता वर्साक 0.33 दशलक्ष टन आशिल्ल्याचे ह्या वेळार स्पश्ट केले. दिवचले हिराबाई झांटये सभाघरांत ही सुनावणी आयोजीत केल्ली. हे सुनावणेक अतिरिक्त जिल्होधिकारी महादेव आरोंदेकार, प्रदुशण मंडळाचे अधिकारी, उपजिल्होधिकारी रोहन कासकार, मामलेदार अभिजीत गांवकार, संयुक्त मामलेदार प्रवीण गांवस तशेंच प्रदुशण मंडळाचे अधिकारी आनी हेर मानेस्त हाजीर आशिल्ले.
खण सुनावणे वेळार लोकांनी आपले विचार मांडले. ह्या वाठारांत फाटलीं जायती वर्सा खण वेवसाय बंद आशिल्ल्यान रोजगार वेवसायाचेर परिणाम जाल्लो आसा. ताका लागून बेगिनांत बेगीन खणी सुरू करून लोकांक रोजगार तशेंच ट्रक आनी हेर माध्यमांतल्यान वेवसायाक चालना मेळाेवपा खातीर यत्न करचे, अशा प्रकारची मागणी थळाव्यांनी केली. ह्या वेळार कांय जाणांनी प्रदुशण आनी हेर बाबतींत योग्य ती जतनाय घेवपाच्यो सुचोवण्यो केल्यो. तशेंच खण कंपनी रोजगार आनी वेवसायांत थळाव्यांक प्राधान्य दिल्ल्याचे सांगतात, पूण प्रत्यक्षांत वेवसाय सुरू जातना ते बाबतींत अडचणी निर्माण जातात. अश्यो अडचणी निर्माण जावच्यो न्हय हाची जतनाय खण वेवस्थापनान घेवची. गांवांतल्या थळाव्यांक रोजगार वेवसाय मेळटलो हाची हमी आनी वेवस्था करून दिवची, अशी मागणी ह्या वेळार थळाव्यांनी केल्या. सुनावणे वेळार जायत्या जाणांनी आपले समर्थन जाहीर केलां. कांय जाणांनी तंत्रीक गजाली उपस्थीत करतना गरजेची जतनाय घेवपाची सुचोवणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
