भांगरभूंय | प्रतिनिधी
-गोंयांत इंडिया आघाडीचेर प्रस्नचिन्न, व्हेन्झी आक्रमकपणजीः गोंयांत चलिल्ल्या जमीन रुपांतरण भानगडीक आम आदमी पक्षान एक नवे मोडण दिलां. ह्या सगळ्या घोळाक आदलो सत्ताधारी पक्ष काँग्रेसच जापसालदार आसा आनी आतां ताचो लाव सध्याचे सरकार घेता असो सणसणीत आरोप आम आदमी पक्षाचे आमदार व्हेन्झी व्हिएगस हांणी केला. आमी काँग्रेसी बरोबर आघाडीत आसात हे खरे, पूण तुमी केल्ली पातकां आमची न्हय. काँग्रेसीक आमचे वांगडा युती तोडपाक मेकळीक आसा, असो आरोप व्हेन्झी हांणी केलो.
आम आदमी पक्षान बिरेस्तारा दनपारां नगर नियोजन खात्याच्या मुखेल नगर नियोजक राजेश नायक हांकां निवेदन भेटयलें. जमीन रुपांतर कलम 17 (2) आनी 39 (अ) रद्द करचें आनी नवो प्रादेशीक आराखडो चालीक लावपाची मागणी ह्या वेळार शिश्टमंडळान केली. निवेदन भेटयले उपरांत व्हेन्झी व्हिएगश हांणी पत्रकारां कडेन उलयतना जमीन रुपांतर विशया वेल्यान आपल्याच आघाडी पक्ष काँग्रेसीचेर फोग काडलो आनी गोंयांतल्या इंडी आघाडीचेर खर टिका केली.
2010 वर्सां पयलीं सगळीं कागदपत्रां तयार करपाची प्रक्रिया जाल्ली. हातूंत राजपत्र अधिसुचोवणी, जमीन रुंपांतरण, भाटां विकून ताची कागदपत्रां तयार करप हे सारिकिल्ल्यो गजाली पुराय जाल्ल्यो. आतां सध्याच्या सरकारान तांची अंमलबजावणी करून दोंगर कातरपाक आनी शेतां पुरपाक सुरू केली, असो आरोप व्हेन्झी हांणी केलो.
2007 ते 2011 वर्सा मजगतीं, काँग्रेस सरकार सत्तेर आसले, हातूंत लिपोवपा सारकें कांय ना. काँग्रेसीन हीं पातकां केल्यांत. सध्या आमची तांचे वांगडा युती आसा ही गजाल हांव मान्य करतां. पुण युती आसा म्हण हाचो अर्थ असो न्हय, तांणी केल्ल्या पातकांत आमी वांटेकार आसात. जर काँग्रेसीक दिसता आमचे वांगडा युती तोडची जाल्यार तांणी ती तोडची, अशी शिटकावणी वेन्झी हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
