भांगरभूंय | प्रतिनिधी
गणपती कोणाक आवडना? ताची तुस्त, सेवा करप कोणाक आवडना? असो कोणूय मेळप कठीणूच. म्हाकाय गणपती खूब म्हळ्यार खुबूच आवडटा आनी ही आवड ल्हानपणा सावनूच आसा. म्हयन्यात एकदां येवपी विनायक चतुर्थी हो दीस आमच्या घरांत खूब म्हत्वाचो आसतालो आनी आजुनूय बी आसा. ह्या दिसा सदांच म्हजी आवय गणपतीची पुजा करताली. ती करपाक आमगेर एक जाण्टेलो पुजारी येतालो. ताका आमी सगळीं मामा म्हणटाली. गणपतीची पुजेची तयारी करतना पुजेक लागपी सामुग्री गणपतीचे आवडीचीं फुलां, पत्री, नेवेद्य ह्याय गजालींचें गिन्यान एकठांय जालें. गणपतीक दुर्वा आवडटा तर दुर्वा कित्याक आवडटाच, ताचे फाटली काणी, गणपतीचें वाहन हुंदीर, ताचे फाटली काणी, गणपतीचें तोंड हतयाचें कित्याक ताचें फाटलें कारण अश्यो जायत्यो गजाली आत्मसात जाल्यो. गणपती बुद्धीचो देव हें सगळ्यांक खबर आसा, पूण ह्याच गणपतीची म्हयन्यातले विनायकेची तयारी करताना म्हजे बुद्धींत जायती भर पडली.
हालींच चवथीचो सण घरांनी जांव भौशीक मंडपांनी मनयलो. सगळ्यांच्या आवडट्या देवाची म्हणजेच श्रीगणेश, म्हजे आवयचो सिद्धिविनायक, गणपती संबंदान आशिल्ली थोडी विद्या म्हाकांय वाचप्यां मुखार दवरीन दिसता.
ल्हानपणां सावन गणेश संकटनाशक स्तोत्र जायते फावटीं म्हणपूय जातालें. तातूंत येवपी गणपतीचीं बारां नांवां, खंय आसात काय त्या बाराय गणपतिचीं थळां हाचो केन्नाच विचार केलो ना. श्री देव नारदान रचलेलें हें गणेश संकट नाशन स्तोत्र. तातूंत जीं गणपतीचीं बारा नांवां येतात, त्या बाराय गणपतीचीं थळां श्री समर्थ रामदासान सोदून काडून तांचें दर्शन घेतिल्लें अशें म्हणटात.
संकट नाशन स्तोत्र –
पयलें वक्रतुंण्ड , एकदंतच दुसरें
तिसरें कृष्णपिंगाक्ष, गजवक्र चवथे
लम्बोदर पांचवें, सवें विकटमेव च
सातवें विघ्नराजेंद्रं, ध्रुमवर्ण तथाअष्टमम्
णववें भालचन्द्रं च, धावो तू विनायकम्
इकरावें गणपती बारावो तू गजाननम्
1. वक्रतुण्ड- तामिळनाडूंत कन्नूर लागीं,
2. एकदन्त- अस्तंत बंगालांत कोलकाता लागीं
3. कृष्णपिंगाक्ष- तामिळनाडूंत कन्याकुमारी लागीं
4. गजवक्र- ओरिसांत भुवनेश्वरांत
5. लंबोदर- हाची दोन थळां (रत्नागिरींत गणपतीपुळे आनी मध्य प्रदेशांत ओंकारेश्वर ज्योतिर्लिंगा लागीं आसपी पंचमुखी गणपती.
6. विकट- हिमालयाच्या पायां कडेन हृशिकेश हांगा.
7. विघ्नराजेंद्र – कुरुक्षेत्रांत कौरव- पांडव झुज जाल्ल्या जाग्यार.
8. धूम्रवर्ण- हाचींय दोन थळां (दक्षीणेंत केरळांत कालिकता लागीं आनी तिबेटांत ल्हासा पासून 15 मैलांचेर.
9. भालचन्द्र – धनुष्यकोडी रामेश्वरम.
10. विनायक- काशी क्षेत्रांत अन्नपुर्णा देवळा लागीं धुण्डिराज गणेश.
11. गणपती- गोकर्ण महाबळेश्वर द्विभूज महागणपती.
12. गजानन- हिमालयांत निमणे तिर्थस्थान पांडुकेसर हांगा मुंडकटा गणेश. गौरी कुंडा कडेन आसलेली ही गणशमुर्त तकले शिवाय आसा.
(नामनेचे जोतिशास्त्रज्ञ आनंद पिंपळकरांचे ‘आनंदी वास्तू’ ही वास्तू शास्त्राचेर आदारून आशिल्ली दिनदर्शिका पळेतना ही सगळी म्हायती मेळ्ळी आनी ती कोंकणी मनशा मेरेन पावोवपाचो हो यत्न.)
प्रिता परब
9921382375
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
