भांगरभूंय | प्रतिनिधी
पणजीः गोंयांत 80 टक्के विद्यार्थी गोंय लोकसेवा आयोग आनी स्पर्धात्मक परिक्षा दिनात हो एक हुस्क्याचो विशय जावन आसा. गोंयांत महाविद्यालयांचो दर्जा सुदारपाचो आसत जाल्यार हाचे फाटले कारण सोदप गरजेचें आनी हे परिक्षे विशीं जागृताय गरजेची, अशें मत मुख्यमंत्री डॉ. प्रमोद सावंत हांणी मांडलें.
गोंय विद्यापिठांत सायन्स ब्लॉक ईत बुधवारा गोंय विद्यापीठ संसोधन पार्क युनिटाचे (गुरू) मुख्यमंत्री प्रमोद सावंत हस्तुकीं उक्तावण जाले. शिक्षण सचीव प्रसाद लोलयेंकार, गोंय विद्यापिठाचे उप कुलगुरू प्रा. हरिलाल मेनन आनी हेर मानेस्त हजर आशिल्ले.
उक्तावणा उपरांत विद्यार्थ्यांक मार्गदर्शन करतना मुख्यमंत्र्यांनी सांगलें, गोंय विद्यापीठ हे राज्यांतले एकमेव आनी अग्रणी विद्यापीठ. पूण हाचे रँकींग देंवता कित्याक हो म्हाका प्रस्न पडला. सध्याचे घडयेक आमी संसोधन क्षेत्रांत फुडे वतात. देखून गोंय विद्यापिठाचे रँकींग देंवपाक जायना अशें म्हाका दिसता. पूण जेन्ना हांव विद्यार्थ्यां वांगडा चर्चा करता तेन्ना 50 टक्के भुरग्यांक जीपीएससी आनी
स्पर्धात्मक परिक्षा किते ते खबर नासता. 50 टक्के विद्यार्थ्यांक हाची म्हायती आसता, ते आपुण नापास जायत म्हण ह्यो परिक्षा दिनात, अशी खंत मुख्यमंत्र्यांनी उक्तायली.
गोंयचे 80 टक्के भुरगे स्पर्धात्मक परिक्षांक तोंड दिवपाक तयार नासतात. हे कित्याक? हो म्हाका व्हड प्रस्न पडला. आमी एके वटेन संशोधन करपा खातीर विद्यार्थ्यांक तयार करता आसतना आमी भुरग्यांक स्पर्धात्मक परिक्षेक तोंड दिवपांक तयार करपाची गरज आसा, अशें मत मुख्यमंत्र्यांनी मांडलें.
आमी खंय फाटीं पडल्या हाचे फाटले कारण गोंय विद्यापीठ आनी ताका सलग्न आशिल्ल्या म्हाविद्यालयांनी सोदून काडपाची गरज आसा. जर तशे केले ना जाल्यार फक्त 2 ते 3 टक्के विद्यार्थी संशोधक जातले आनी 50 टक्क्या परस चड सामान्य श्रेणीच्या सकयलच उरतले. देखून म्हजी विनवणी आसा, भुरग्यां मदीं स्पर्धात्मक परिक्षा विशीं जागृताय करची आनी पदवी शिक्षण पांवड्यार सावन ताची तयारी सुरू करची, असो उलो मुख्यमंत्र्यांनी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
