भांगरभूंय | प्रतिनिधी
लेबनानः मंगळारा दनपारां लेबाननांतल्या हिजबूल्ला वांगड्यांच्या पेजरांचे स्फोट जाले. ह्या स्फोटांत 11 जाणांक मरण आयलें. मरण आयिल्ल्या लोकां मदीं हिजबूल्लाचे 8 वांगडी आनी 1 चली आसा.
ह्या हल्ल्यांत 4 हजारां परस चड लोक जखमी जाले आनी तातूंतल्या 400 जाणांची स्थिती गंभीर आसा. जखमी लोकां मदीं लेबनानांतले इराणाचे राजदूत आसात. हे घडणुके फाटल्यान इझ्राएलाचो हात आसा असो दावो करतात. ह्या स्फोटाची जापसालदारकी हिजबूल्लान घेतल्या.
हे विशीं इझ्राएलान अजून कसलेंच विधान करूंक ना. मेळिल्ले म्हायती प्रमाण पेजर हॅक करून स्फोट केल्यात.
पेजर म्हळ्यार संदेश धाडपा खातीर आनी घेवपा खातीर वापरतात तें वायरलेस साधन. चड करून तातूंत ल्हान स्क्रीन आनी मर्यादीत कीपॅड आसता. ताच्या मजतीन संदेश वा शिटकावणी बेगीन मेळटा.
————–
हिजबुल्लान आपल्या वांगड्यांक दिल्ले पेजर
मेळिल्ले म्हायती प्रमाण हालींच हिजबूल्लान आपल्या वांगड्यांक वापरपा खातीर स्फोट केल्ले पेजर जारी केल्यात. गाझा झूज सुरू जाले उपरांत हिजबूल्लान आपल्या वांगड्यांक मोबायल फोन वापरपाचेर बंदी घाली. इझ्राएलांतल्यान जावपी कसलोच हल्लो जावचो न्हय म्हूण हो सल्लो दिल्लो.
जुलयांत हिजबूल्लाचो फुडारी हसन नसरल्लान लोकांक मोबायल डिव्हायस आनी सीसीटीव्ही वापरप बंद करपाक सांगिल्लें. कारण इझ्राएल एजन्सी तांकां हॅक करपाक शकता असो भंय आशिल्लो.
————-
हिजबुल्लाह म्हणल्यार देवाचो पक्ष
हिजबूल्ला ह्या उतराचो अर्थ देवाचो पक्ष असो जाता. ही संस्था स्वताक शिया इस्लामी राजकी, लश्करी आनी समाजीक संघटणा अशें वर्णन करता. हिजबूल्ला हो लेबाननांतलो एक बळिश्ट गट. अमेरिकेंत आनी जायत्या देशांनी ही संघटणा आतंकवादी संघटणा जाहीर केल्या.
1980 च्या सुमाराक इझ्राएलान लेबानन घेतलो तेन्ना इराणाच्या आदारान हें बांदलें. 1960-70 च्या दशकांत लेबाननांत इस्लाम धर्माच्या पुनरुज्जीवनाच्या काळांत ल्हवू ल्हवू ताची मुळां रुजली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
