भांगरभूंय | प्रतिनिधी
दिल्लींत राजकी घडणुकांक नेट, केजरीवाल आयज मेळटले नायब राज्यपालांकनवी दिल्लीः दिल्लीचे मुख्यमंत्री अरविंद केजरीवाल हांणी आयतारा राजिनामो जाहीर करून राजकी मळार खवदळ निर्माण केला. दोन दिसांनी मुख्यमंत्री पदाचो राजिनामो दितले अशें तांणी जाहीर केलां. देखून दिल्लींत चर्चांक ओतो आयला. एके वटेन ताचे विरोधक हें सगळें नाटक असो आरोप करतात, पूण ताचे इश्ट ताच्या निर्णयाक तेंको दितात. केजरीवालांचो हो निर्णय व्हडली राजकी खेळी काय लुकसाण हें स्पश्ट जावचे पयलीं आतां राजधानी कोणाच्या हातांत? हाचेर चर्चा सुरू जाल्या. हाचे खातीर आम आदमी पक्षाचीं कांय नांवांय मुखार येवंक लागल्यात. हातूंत केजरीवाल हांची घरकान्न सुनिता तशेंच राखी आनी आतिशी हांचीय नांवां चर्चेत आसात.
मुख्यमंत्री अरविंद केजरीवाल हांणी आपलो राजिनामो जाहीर केले उपरांत ताचे सुवातेर मुख्यमंत्री म्हणून कोण येतलो? हे संबंदीं दिल्लीच्या राजकी मळार आप कडल्यान कांय नांवां विशीं खर चर्चा सुरू जाल्या. हातूंतलीं तीन नांवां वयल्या पांवड्यार आसात. तातूंत आप सरकाराची मंत्री अतिशी, गोपाळ राय आनी कैलाश गहलोत हांचो आस्पाव जाता. हे जापसालदारके खातीर पक्षांतलो कोणूय वा मंत्रीमंडळांतलो कोणूय वेंचून काडूं येता, पूण ह्या तीन नांवांचेर चड चर्चा जाता अशें सूत्रांनी सांगलें
दिल्ली सरकारांतल्या चडशा खात्यांचो कारभार आतिशी सांबाळटात. सद्या हेर कांय खात्यां वांगडा शिक्षण, अर्थ, महसूल, कायदो ह्या सारक्या म्हत्वाच्या विभागांचो प्रभार तिचेर आसा. हालींच अरविंद केजरीवाल हांणी अतीशीक 15 ऑगस्टाक ताच्या गैरहाजेरींत ध्वज उबारपाचो अधिकार दिल्लो. पूण राज्यपालान ताका परवानगी दिवंक नाशिल्ल्यान कैलाश गेहलोत हांणी ध्वज उबारलो.
मजगतीं, अतिशीक प्रशासनाचो बरो अणभव आसा. आनी कामां कशीं करचीं तें तांकां खबर आसा. तेच प्रमाण येरादारी, गृह आनी बायलां आनी बाल कल्याण विभागाचे प्रभारी कैलाश गेहलोत पक्षाच्या वावरांत सदांच प्रभावी आसतात. प्रशासना कडेन फरक पडटा तेन्ना लेगीत ते आपल्या खात्याचें काम करतात, अशेंन एका अधिकाऱ्यान सांगलें.
————–
प्रकल्प, बदल्यो आडखळ्ळे
बंदखणींत गेले उपरांत अरविंद केजरीवाल मुख्यमंत्री म्हणून जापसालदारकेचेर कांय प्रमाणांत परिणाम जाला. जायतीं कामां थांबल्यात आनी प्रकल्पांक मान्यताय दिवपाची गरज आसा. जी व्यक्ती मुख्यमंत्री पदाचेर येतली ताका मंत्रीमंडळा कडेन प्रलंबीत आशिल्ल्या जायत्या प्रकल्पां खातीर वाट मेकळी करूं येता अशें एका अधिकाऱ्यान सांगलें.
मुख्यमंत्री हाजीर आशिल्ल्यान बदल्यो आनी नेमणुकां विशीं निर्णय घेवपी नॅशनल कॅपिटल सिव्हिल सर्व्हिसेस अथॉरिटीची बसका आपोवंक मेळटा अशेंय प्रशासनान सांगलां. ह्या मंडळाची निमाणी बसका सप्टेंबर 2023 त जाल्ली. ह्या तीन वांगड्याच्या मंडळाचे अध्यक्षपद राज्याचे मुख्यमंत्री आसतात. हाचे भायर राज्याचे मुखेल सचीव आनी अतिरिक्त मुखेल सचीव हे हे समितीचे हेर वांगडी आसात.
मुख्यमंत्र्यांची निवड जाले उपरांत जायते आयएएस अधिकारी आनी डीएएन आयसीए अधिकाऱ्यांच्याे नमिणुको जाल्यो. अरविंद केजरीवालाच्या गैरहाजेरीक लागून जायत्या खात्यांतल्या हेर अधिकारी काम करतात आनी कांय अधिकाऱ्यांक अतिरिक्त जापसालदारक्यो दिल्यात अशें एका वरिश्ठ प्रशासकीय अधिकाऱ्यान म्हायती दिली.
—————
जायत्यो येवजण्यांक मेळटली चालना
आम आदमी पार्टी सरकाराची महत्वाकांक्षी येवजण म्हळ्यार ‘महिला सम्मान राशी येवजण’य सुरू करूं येता. ही येवजण निमाण्या पांवड्यार आसा. ती बेगीन चालीक लावंक मेळटा. हे येवजणे खाला 18 ते 60 वर्सां पिरायेच्या दिल्लीच्या बायलांक दर म्हयन्याक एक हजार रुपया दितले.
———————
मजगतीं, ह्या नांवां परस केजरीवाल हांचे उपरांतचे सगल्यांत वयले नांव म्हणल्यार उपमुख्यमंत्री मनी सिसोदिया. पूण स्वता सिसोदिया हांणीच आपूण हे चर्चेत नाशिल्ल्याचे स्पश्ट केले. आपूण अरविंद केजरीवाल हांचे वांगडा प्रामाणीकपणाच्या अादाराचेर मतां मागतलो. ते मेरेन कसलेच पद स्विकारचो ना, अशें तांणी सांगलें.
गोपाळ राय हांचेय नांव चर्चेत
अातीशीच्या नांवान गोपाळ राय हांच्या नांवा विशीं मंत्रीमंडळांत चर्चा सुरू आसा. गोपाल राय हे आम आदमी पक्षाचे वरिश्ठ फुडारी. इतलेंच न्हय जाल्यार मंत्रीमंडळांत एक वरिश्ठ मंत्रीय आसात. देखून मुख्यमंत्री पदा खातीरय तांचें नांव विचारांत घेवंक शकता असो अदमास पक्षाच्या एका कार्यकर्त्यान उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
