भांगरभूंय | प्रतिनिधी
-पावस उणो, पूण दर्यात वादळ आशिल्ल्यान नुस्त्यांचो उणावपणजीः श्रावण सोंपलो, गणपती पावयले, आतां गोंयकार नुस्त्याचेर घोस्त काडपाक तयार रावल्यात. पूण गोंयकरां खातीर होय म्हयनो श्रावण नासतना सुको वतलो अशें दिसता. पावस सोंपला पूण जाळांक नुस्ते फारावना. आयज मेळ्ळ्यार फाल्यां कांय ना अशी नुस्तेकारांची गत जाल्या, अशी कागाळ थळावे नुस्तेकार करतात. पुराय म्हयन्यांत पावसान खवदळ घातिल्लो देखून नुस्तें पयस धांवून गेल्ले.
नुस्तेमारी बंदी सोंपून लेगीत नुस्तें मेळनाशिल्ल्यान लोकांक खाऱ्याचेर भागोवचे पडटाले. पूण तेन्ना श्रावण म्हयनो आशिल्लो. चडशें गोंयकार नुस्तें खायनाशिल्ले. पूण पयर णव दिसांचे गणपतीचे विसर्जन जावन फाल्यां 11 दिसांच्या गणपतीचें विसर्जन जातले. अडेज म्हयन्यां उपरांत नुस्त्यांचेर घोस्त काडपाक वाट पळोवपी गोंयकरांक निर्शवणेची खबर आसा.
पावस उणो जाला खरो पूण दर्यात अजून वादळी ल्हारां मारतात. दर्यात वादळ आशिल्ल्यान नुस्तें उदकात वयर येयना, अशें अखील गोंय ट्रॉलर धनी संघटणेचे अध्यक्ष जुझे फिलीप डिसोझा हांणी सांगलें.
दर्या अजून थंड जांवक ना. आमकां नुस्तें कांय प्रमाणांत मेळटात. पूण एक दीस बांगडो पडल्यार दुसरे दीस कांयच ना, तिसरे दिसा सुंगटा लागल्यार चौथे दिसा दुकळ. केन्ना चुकून इसवण पडटा. पूण सदांच नुस्तें मेळप कुस्तार जाला, अशें डिसोझा हांणी सांगलें.
सध्या नुस्त्यांचो धंदो सामको जाग्यार बसूंक ना. दर्यांत नुस्तें मारतलो जाल्यार वारो बरो आसपाक जाय. ओसाडी मारपाक जायना. पूण आमकां आस्त आसा की फुडें वातावरण बरे जावन दर्यांत नुस्तें मेळटले, अशें डिसोझा हांणी म्हणलें.
सध्या कामगार नाशिल्ल्यान लाँची बंद आसात. फक्त 70 ते 80 टक्के लाँची दर्यात वतात हेर 20 टक्के नांगरून उरल्यात. पूण सगळ्यांक नुस्तें मेळटले हाची कसलीच अास्त ना. 100 बोटी जर दर्यात गेल्यो जाल्यार फक्त 10 बोटींक नुस्तें मेळटात. सगळ्यां बोटींक जेन्ना नुस्तें मेळटले तेन्नाच धंदो बरो आसतलो, अशें मत डिसोझा हांणी मांडलें.
नुस्तें उणें आसून लेगीत आमकां दर बरे मेळटा. मिडीयम बांगडे किलाक 60 रुपयां प्रमाण 20 बांगडे विकतात. जाल्यार व्हड बांगडे रु. 160 दर किलान विकल्यात. तातूंत 6-7 बांगडे मेळटात. इसवण आनी सुंगटा मेळ्ळ्यार आमी ताची पावणी करतात आनी जो बाजार भाव आसा तोच आमकां मेळटा, अशी म्हायती डिसोझा हांणी दिली.
जाल्यार निर्लाचे नुस्तेकार ज्योकीम वाझ हांणी सांगलें, केन्ना केन्ना बांगड्याची रास मेळटा पूण जाय तेन्ना काटो लेगीत जाळ्यांक फारावना. कोण नुस्तेकार वाऱ्याचो अदमास घेवन वता तशे ताच्या जाळ्याक नुस्तें फारावतात.
हाल्लीच बरेच व्हड बांगडे फारावल्ले आनी ते आमी रुपया 100 क 12 बांगडे विकले. पूण हे फक्त एक दोन दिसां खातीर. सुंगटा पयलीं लागताली, आतां सुंगटाचे जाळे मारल्यार कायच लागना. फक्त केन्ना कळवेचो वा बांगडो आतां लागता, अशें वाझ हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
