भांगरभूंय | प्रतिनिधी
अादले राष्ट्रपती, शिक्षणतज्ञ डॉ. सर्वेपल्ली राधाकृष्णन हांची आयज जयंती. शिक्षक दीस म्हूण ती मनयतात. गोंयच्या कांय शिक्षकांक राष्ट्रीय, राज्य पुरस्कायूय आयज भेटयतले. समाजाक वाट दाखोवपी ह्या पवित्र पेशाक खत लावपी घडणूक कामुर्लेच्या विद्येची देवी सरस्वतीचें नांव लावपी एके खाजगी शाळेंत घडल्या. दोगी शिक्षिकांनी चवथे यत्तेंत शिकपी एका भुरग्याक स्टिलाचे पट्टेन बरोच मार घालो. घरा सांगशीत जाल्यार मारतलीं, अशी शिटकावणी ताच्या भावाक दिली, असो आरोप आसा. तांकां निलंबीत केल्यांत. शिक्षण खातें, पुलीस चवकशी करतात. दोशी सिद्ध जायत जाल्यार तांकां नोकरी सोडची पडटली, अशें दिसता. प्रसार माध्यमांक लागून परिस्थिती कितली गंभीर तें लोकांक कळ्ळें. त्या भुरग्याच्या पांयांचेर, हातार, भुजांचेर माराचे वळ आसात. बायलेचें काळीज हरशी मायेस्त अशें म्हणटात, पूण ह्यो इतल्यो निश्ठूर कित्याक जाल्यो, तें कळना. घडये वड्याचें तेल वांयंग्याचेर काडलां आसुये. तो भुरगो ट्युशनाक वतालो, हो हे घडणुके फाटलो राग अशें थोड्यांचें मत. मुळावे खबरे प्रमाण, त्या भुरग्यान पुस्तकाचीं पानां पिंजलीं हे तिडकीन ही घडणूक घडल्या. तरीय इतलो मार घालपा सारको हो गुन्यांव न्हय. चवथेचो भुरगो तो केदो आनी ताका मारप तो कितलो? मुखार हें प्रकरण आपणाक बादतलें हाची भिरांत त्या शिक्षिकांक दिसूंक ना काय?
मुख्यमंत्र्यान कामुर्ली प्रकरणाचेर प्रतिक्रिया दितना शिक्षकांक समुपदेशनाची खर गरज आसा अशें सांगलें. तातूंत तथ्य आसा. हालींच्या काळांत विद्यार्थ्यांक शिक्षकांनी बडोवपाच्यो तीन घडणुको उजवाडांत आयल्यात. येवंक नाशिल्ल्योय आसतल्यो. विद्यार्थ्यांक मारपेट कित्याक जाता, हाचोय विचार जावप गरजेचें. हें सर्तीचें यूग. जो तो पयशां फाटल्यान धांवता. तो जाय तितलो मेळना, आपल्याकूय ‘ढ’ मनीस मुखार गेलो काय थोड्यांक तिडक येता. घराघरांनी तणाव वाडल्यात. शिक्षकांक शिकोवपा परस हेर कामां चड करचीं पडटात, नव्या शिक्षण धोरणा प्रमाण अभ्यासक्रमांत बदल जाल्ल्यान शिक्षकांक अश्टताशी जावचें पडलां…. अश्या जायत्या कामांक लागून थोड्या शिक्षकांक कसल्याय कारणांक लागून राग येवंक लागला. मागीर मुखार कोण सांपडलो काय सगलो राग ताचेर काडटात. कांय जाण नोकरी, पगारा खातीर शिक्षक जाल्ले आसतात. तांकां शिकोवपाची आवड, पासियेंश नासता. तेन्नाय असल्यो घडणुको घडटात. थोड्यांच्या सभावातूंच तिडक आसता. तांकां सगल्यांनी आपले सारकें वा आपल्या परस हुशार, कामसू, उमेदी आसचें अशें दिसता. तसो कोण दिसना जाल्यार मागीर तांची सटकता. तिडक, दुस्वास, असुया….. अशे गुण आशिल्लेय मनीस आसात. तेन्ना शिक्षकांच्यो समस्या जाणून घेवन त्यो सोडोवपाचो यत्न समुपदेशकाचे मजतीन जावप सामकें गरजेचें.
एका काळार आदर्श घेय सारके शिक्षक आशिल्ले. आयजूय तसले थोडे आसतले. सध्या बायलेच्या, भावाच्या नांवाचेर ट्युशन क्लासी चलोवपी शिक्षक आसात. वर्गांत वयले वयर शिकोवन ट्युशन क्लासांत मन लावन शिकोवपीय आसात. एका तेंपार विद्यार्थ्यांक शाळेंत ज्यादा वर्ग घेवपी, फांतोडेर स्वताचे पॅत्रॉलाचे दिवे पेटोवन विद्यार्थ्यांचे क्लास घेवपी, व्यायाम शिकोवपी, तांकां च्या- पाणीय दिवपी शिक्षक आशिल्ले. अर्थांत तो काळूच वेगळो आशिल्लो. आयज ह्या मळाचेर वेवसायिकताय आयल्या. विद्यार्थ्यांक भरपूर बडोवपी मारकुटे शिक्षक त्या काळारूय आशिल्ले. पूण, त्या मारा फाटल्यान, तापोवणे फाटल्यान मोग आसतालो. तळमळ आसताली. आपलो विद्यार्थी जिल्ह्यांत, राज्यांत पयलो येवचो, ताका स्कॉलरशीप मेळची, हो हेतू आसतालो. मारलो तरी वळ येयसर ते मारिनाशिल्ले. कामुर्लें घडलें तें विपरितूच. नेमको कसलो राग त्या शिक्षकांक आयलो, ताचो तपास जावंक जाय. तांची कितें समस्या आसल्यार ती सोडोवपाक जाय.
हो विद्यार्थी पिरायेन ल्हान. मात, कॉलेजींतले तरणाटे विद्यार्थी मस्ती करतात. ह्या विद्यार्थ्यांक कोण सहसा हात लायनात. मागीर तांचीं कर्तुबां वाडटात, जीं हायर सेकंडरी, कॉलेजीक बदनाम करून वतात. दिसाळ्यांनी खबरो आयल्यो नात, तरी संबंदीत शिक्षण संस्थेंत शिकपी दरेका विद्यार्थ्यांच्या पालकांक, तांच्या सोयऱ्यांक त्यो कळटातूच. कारण कांय गजाली कितल्योय धांपून दवरल्यो म्हूण लिपून रावनात. तेन्ना विद्यार्थ्यांनीय शिक्षकांक तिडक येय सारकें वर्तन करपाक जायना. कामुर्ली घडणुकेक लागून (ताचे पयलींय) शिक्षक विद्यार्थ्यांक मारपाक वच्चे नात. हालींचे पालक रोखडेच कागाळ करतात, अशें शिक्षक म्हणटात. पूण हाका लागून विद्यार्थी बेशिस्त जावंक फावना. शिक्षण खात्यान हाचेरूय विचार करचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
