भांगरभूंय | प्रतिनिधी
-तीन हजार शेतकारांक मेळटले 3.75 कोटीपणजीः अंदूं जून आनी जुलय ह्या दोन म्हयन्यांत पडिल्ल्या उटंगाराच्या आनी वादळी पावसाक लागून पिकांचीं लुकसाणी जाल्ल्या सुमार तीन हजार शेतकारांक फाल्यांच्यान लुकसाण भरपाय दिवपाक सुरवात जातली अशें कृशी संचालक संदीप फळदेसाय हांणी सोमारा आमच्या प्रतिनिधी कडेन उलयतना सांगलें.
चवथी मेरेन शेतकारांक लुकसाण भरपाय दिवपाचे निर्देश मुख्यमंत्री डॉ. प्रमोद सावंत हांणी दिले. कांय दिसां आदीं कृशी खात्याक निर्देश दिले उपरांत खात्याच्या अधिकाऱ्यांनी राज्यांत भोंवडी करून पिकांच्या लुकसाणाचो नियाळ घेवपाक सुरवात केली. जून आनी जुलय ह्या दोन म्हयन्यांत पडिल्ल्या वादळी पावसाक लागून राज्यांतल्या सुमार तीन हजार शेतकारांच्या पिकांचें 3.75 कोटी रुपयाचें लुकसाण जाल्ल्याचें उक्तें जालें. चवथी पयलीं ह्या शेतकारांक लुकसाण भरपाय दिवपाची प्रक्रिया खात्यान सुरू केल्ली. मंगळारा मेरेन ही प्रक्रिया पुराय जातली आनी बिरेस्तारा सावन भरपायेची रक्कम शेतकारांच्या बँक खात्यांत जमा जातली अशेंय फळदेसाय हांणी सांगलें.
मजगतीं, चवथ ही गोंयांतली सगळ्यांत व्हडली परब. ह्या काळांत थळाव्या शेतकारां कडल्यान भाजयांची मोट्या प्रमाणांत मागणी जाता. पूण व्हड पावसाक लागून शेतकारांच्या भाजयांचें लुकसाण जालें आनी चवथ कशी मनोवची हो प्रस्न आशिल्लो. पूण कृशी खात्यान वेळार भरपाय दिवपाचो निर्णय घेतिल्ल्यान शेतकारांक आशिल्ली व्हडली समस्या सोडोवपाक मजत जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
