भांगरभूंय | प्रतिनिधी
गोंय विशयांचेर दरवर्सा दरेका दिसाळ्यांत चार अग्रलेख, आठ लेख आनी कितल्योशोच खबरो, पत्रां येतात, असो विशय म्हणल्यार येरादारी…. आनी ह्या विशयाक अजून तरी मरण ना. आमच्या सुपुल्ल्या गोंयांत वर्साक उणेच 300 ते 350 लोक अपघात जावन मरतात. फाटल्या 25 वर्सांनी कितले मेल्या आसतले, कितले जखमी जाल्या आसतले, हाचो अदमास वाचकांनी काडचो. म्हणटकच हें कितलें भिरांकूळ प्रकरण तें कळटलें. येरादारीची कोंयडी ही अशीच मनस्ताप दिवपी, भोव मोलादीक वेळ व्हगडावपी समस्या. आतां गांवांनी पसून ती सतावपाक लागल्या. गोंयांत कांय थारावीक वाठारांनी येरादारी ठप्प जाता. आयज न्हय, फाटलीं कितलींशींच वर्सां, पूण ताचेर कोणाकूच उपाय काडपाक जमलो ना. आतां येरादारी सुरळीत करपाक, अपघातांचेर नियंत्रण दवरपाक येरादारी पुलीस विभागान ‘ट्रॅक’ नांवाची यंत्रणा सुरू केल्या. ती येसस्वी जातली हाचो सरकाराक विस्वास आसा. पळोवया.
आल्तिना वयल्या येरादारी पुलीस मुख्यालयांत ही यंत्रणा बसयल्या. ती राज्यांतल्या थारावीक रस्त्यांचेर जावपी येरादारी कोंयडेचेर नदर दवरून आसतली. गाडयो आडकून उरल्यो काय यंत्रणेचो नियंत्रण विभाग येरादारी पुलिसांक कळयतलो. मागीर पुलीस बेगोबेग त्या जाग्यार वचून येरादारी सुरळीत करतले. आयज जंय- जंय गाडयो मुयेचे गतीन चलतात वा पांच – पांच मिणटां एकाच जाग्यार उब्यो राविल्ल्यो आसतात, थंय एकाक तीन पुलीस आसतात. मात, येरादारीची कोंयडी सुटना. सिग्नलांक लागून पसून गाडयांच्यो रांको लागतात. ताका लागून कांय सिग्नल बंद दवरचे पडटात. आतां पणजी- पर्वरी म्हामार्गाचेर येरादारी तुंबपाची शक्यताय आसा. ताची सुरवात जाल्या. सर्व्हीस रोड हे मातयेंत मदीं मदीं डांबर ओतून केल्ले सारके दिसतात. तातूंत पावसाक लागून फोंडकुलां, भितर उदक…..! सर्व्हीस रोड सारके नाशिल्ल्यान येरादारीची चड कोंयडी जाता. तेच जर हॉट मिक्स पद्दतीन डांबरी करीत, थोडे रुंद करीत जाल्यार येरादारी आडकून उरची ना. सादें एक ल्हानशें फोंडकूल पळोवन मोटारीचो वेग उणो केल्यार म्हामार्गांचेर अर्द मिणटां भितर गाडयांची रांक लागता. येरादारी, बांदकाम खात्यान हाचो विचार करपाक जाय.
ज्या शाराच्या दिशेन गाडयो चड वतात, थंय वचपाचे शॉर्ट कट मार्ग सोदून ते गुळगुळीत आनी शक्य तितले रुंद करपाक जाय. देखीक पणजे शारांत दिवचल, मुळगांवच्यान लोक येतात. तांकां हळदोण्यां, बिठ्ठोणा, मयें, चोडणेंच्यान येवं येता. पूण मदले रस्ते अशीर, भिरांकूळ देंवती, चडटेचे, मागीर फेरीबोट…. देखून चडशे गाडयेकार थिवी, पर्वरी रस्त्यानूच यो- वच करतात. पर्वरी उड्डाण पुलाक लागून पेन्ह द फ्रान्स, हळदोणें पंचायतींक विस्वासांत घेवन येरादारीचेर उपाय काडपाचे आशिल्ले ताचे कितें जालें? चडश्यो गाडयो ह्यो सरकारी कर्मचार्यांच्यो आसतल्यो. कारण शेनवार, आयतार रस्ते हेर दिसांचे तुळेन मेकळे आसतात. तेन्ना तांच्या कार्यालयाचो वेळ थोडो बदलीत जाल्यार रस्त्या वयलो येरादारीचो ताण उणो जावं येता. अवजड वाहनां दीसभर बंद केल्यांत, ती बरी गजाल. मदीं कोणाची गाडी बंद पडली जाल्यार ती 15-20 मिणटां भितर कुशीक काडपाची यंत्रणा गोंय पुलिसां कडेन आसा? मागीर येरादारी कोंयडेची म्हायती मेळून फायदो कितें? पणजे शारांत आतां ई- बसी सुरू केल्यात. तांकां डॉन बॉस्को हायस्कूल, 18 जून रस्तो, कोर्तीन, पोरणो पाटो पूल वाठार, अटल सेतू लागसार सदांच येरादारीची कोंयडी सोंसची पडटा. ताचेर पयलीं उपाय
काडपाक जाय.
गाडयो वाडिल्ल्यान आनी त्यो चलोवपी येरादारी नेम पाळिनाशिल्ल्यान अपघातांचो आंकडो वाडला. सोरो पियेवन गाडी चलोवपीय खूब जाण आसतात. सकाळीं फुडेंच ते तायट आसतात. अल्कोमिटरा वरवीं तांकां तपासून 5 हजार रुपया तालांव घालीत जाल्यार नशेंत गाडी चलोवपाचें प्रमाण देंवतलें. आतां एआयचेर चलपी यंत्रणा आसा. मात ती सगलेच कडेन ना. नेमको हाचोच गैरफायदो कांय ड्रायव्हर घेतात. वेगान गाडी चलोवची न्हय, हे खातीर खास करून दुचाकी चालकांचेर लक्ष दवरपाचो वेळ आयला. वाटेर गोरवां बसतात, लायट आसना, रस्तो फोंडकुलांचो, दुचाकीचो वेग हाका लागून अपघात घडटात. गाडी वेगान चलयतात, तोच मर्द अशी कांयशी तरणाट्यां मदीं भावना निर्माण जाल्या. निदान हे ‘ट्रॅक’ यंत्रणेक लागून अपघात उणें जातले असो सकारात्मक विचार करुंया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
