भांगरभूंय | प्रतिनिधी
तरणाट्यां कडेन अशी शक्त आसा जाची आमच्यांनी कल्पना करूं नजो. खुद्द तांणी स्वता विशीं आपणाक केन्नाच कमी
समजुचें न्हय. तरणाट्यां मुखार कसले रोल मॉडेल हारशे कशे उबे करचे तें आमकां कळपाक जाय. अशीच ही एक देखदिणी उर्बादेणी गजाल.
ठाणे मुंबयचो अर्जून देशपांडे ह्या तरणाट्यान एक सपन आंवडेलें आनी ताणें सपनांक पांखां लायलीं आनी तो यशस्वी जालो. संवसारीक नामनेक पावलो. गरिबांक वखदां घेवपाक परवडनात हें ताणें पळेलें. संवसारांतलो सगल्यांत ल्हान उद्देजक म्हूण तो नामनेक पावला. आंकडेवारी प्रमाण भारतीय वखदां बाजारांत वखदांचो दर हिसपा भायर चड आशिल्ल्यान सुमार 60% भारतियांक आपलीं दीसपट्टीं वखदां विकतीं घेवपाक परवडनात. बाजारांत सुमार 90% वखदां जेनेरीक आसतात. पूण ब्रँडींग आनी मार्केटींग हाका लागून वखदां म्हारग जातात. देखून गिरायकांक चड दरान म्हळ्यार नायलाजान म्हारग वखदां विकतीं घेवचीं पडटात.
अर्जून देशपांडे 16 वर्सां पिरायेचो आशिल्लो तेन्ना ताणें गरिबांक मोटीं दुयेंसां जातकच वखदां घेवपाक पयशे नात हें पळेलें. तांची आवतिकाय पळोवन तो कळवळ्ळो. तांचे चुरचुरे पळोवन तांचे खातीर कितें तरी करचें अशें ताका दिसलें. सोमतोच कामाक लागलो. ताणें जेनेरीक आधार हो उपक्रम सुरू केलो. एक बी रोयिल्ली, ताचो रोपुलो जावन आज एक मोटो रूख जाला. अर्जूनान सेवा भावनेची केदी व्हड देख आज घालून दिल्या पळेयात. ताका जपाना सारक्या देशान मजत दिवपाक सुरवात केल्या. उण्या व्याजान रीण दिलां. म्हान उद्देगपती रतन टाटान ताका आपयलो आनी चर्चा केली आनी वेपारांत कांय वाठारांनी गुंतवणूक करून ताका उर्बा दिली. गरिबां मेरेन, गांवांनी हीं जेनेरीक वखदां पावनात ही अर्जूनाची आनी रतन टाटाची खंत. असले हुस्के फक्त निवळ काळीज आशिल्ल्या सज्जनांकूच जातात. नाजाल्यार हांव, म्हजी बायल, बाबू आनी बाय ह्या चौकोनांतूच सगलें वर्तूळ आनी गणीत घुंवत रावता जिणेचें. अर्जूनान कितल्याशाच जाणांचे जिणेंत उजवाड हाडला. ताचो उपक्रम वाडत आसा. राष्ट्रपतींनी आनी प्रधानमंत्र्यांनी ताका आपोवन व्हेलो आनी ताची तोखणाय करून ताका मुखार वचपाक प्रेरणा दिली. लाखांनी लोकांक परवडटा अशा दरांत वखदां दिवपाक अर्जूनालो उपक्रम यशस्वी थारलो. म्हणून ताका मेळपाक मिडियावाले येतात, लेखक येतात, तरणाटे येतात. अर्जूनान तरणाट्यांक तांच्या तांच्या वाठारांनी जेनेरीक फार्मसी युनीट सुरू करपाक उत्तेजन दिलां. ताका लागून फार्मसी मळावेले खूब जाण ताका जोडत आसात.
भारतांतली सगल्यांत नेटान वाडपी अर्जूनाची फार्मा कंपनी ‘जेनेरीक आधार’ कितल्याशाच जाणांची आशा थारल्या. जेनेरीक आधारान ह्या परंपरीक वखदां उद्देगांत क्रांती घडोवन हाडल्या. अर्जूनाली जेनेरीक आधार कंपनी भारतांत फार्मसी फ्रँचायजी सुरू करून तरणाट्या उद्देजकांक घटाय दिता.
फ्रँचायजीच्या मालकांक आनी तांचे वरवीं निमाण्या गिरायकांक फायदो जाता.
अर्जून देशपांडेची पिराय आज फक्त 22. कापाझदाद ताची. 16 वर्सांच्या कंवळे पिरायेचेर ताणें ध्येय थारायलें आनी हेवटेन तेवटेन पळेनासतना जेनेरीक आधार ही कंपनी सुरू केली. ताणें स्थापन केल्ल्या ‘जेनेरीक आधार’ हे कंपनीची उलाढाल आसा फक्त पंदराशें कोटी रुपया!
गरजू आनी गरीब लोकांक सवाय दरांत वखदां मेळचीं होच कंपनीचो हेत आशिल्लो. ते खातीर ताणें वखदां तयार करपी कंपनींची भेट घेतली. तांचे कडल्यान सवाय वखदां विकत घेवन ‘जेनेरीक आधार’ नांवाच्या मेडिकल दुकानांतल्यान ताची विक्री सुरू केली. जीं वखदां उत्पादकां कडल्यान विकत घेवन मोट्यो मोट्यो फार्मा कंपनीं आपलें लेबल लावन खूब म्हारग मोलांत विकतात, तींच वखदां जेनेरीक आधार स्टोरांत सामक्या सवाय दरांत मेळटात. ह्या वेव्हारांत मदीं कोणूच मध्यस्थ वा दलाल आनी हेर खर्च नाशिल्ल्यान तांकां हीं वखदां इतल्या कमी मोलांत विकप शक्य जाता.
अर्जून देशपांडेचें सपनूच मळबाक वेंगावचें. धडपड निरंतर. आयचे घडयेक देशभरांत ‘जेनेरिक आधार’ चीं तीन हजार मेडिकल दुकानां आसात. हीं वखदां विकत घेवपी लोकांचे हजारांनी रुपया वाटावतात. आयच्या ह्या क्रूर फटकिर्या जगांत जण एकलो आपलो फायदो आनी सुवार्थ पळेता. कमिशनाची टक्केवारी सोदता. पूण अर्जूनान आज धा हजार परस चड लोकांक प्रत्यक्ष – अप्रत्यक्षपणान रोजगार दिला.
आज मेरेन अर्जूनाक जायते प्रतिश्ठीत पुरस्कार मेर्ळ्ळयात. ताका आयआयटी मुंबय, आयआयटी दिल्ली तशेंच जपान सारक्या अती प्रगत देशांनी मानान आपोवन व्हेला. ताचें व्याख्यान आयकुपाक लोकांची गर्दी जाता. तरणाट्यां मदीं फोल्गी वृत्ती वाडल्या असो एक सूर आसा आनी तातूंत तथ्य ना अशें न्हय. अशा ह्या तरणाट्यांच्या विश्वांत अर्जून देशपांडे हो चकचकत आसा. ताका आपल्या देशाचो अभिमान आसा आनी देशांतल्या गरिबां विशीं कळवळो आसा. तांची जिणे शैली सुदारची अशें ताका दिसता. तो म्हणटा भारत हो भारत, ताका व्हडली शक्त करुया आनी तें शक्य आसा. अमेरिका देशाचें अनुकरण करपाची गरज ना अशें ताचें म्हणणें.
अर्जून जपानाक वता, देशांतल्या आयआयटी आनी हेर संस्थांनी वता. तो रावता मुंबय लागीं ठाण्याक. गोंय कितलेंशें पयस आसा? अर्जूनाची देख गोंयच्या तरणाट्यांक दिवपा खातीर ताका गोंयांत कित्याक आपयनात काय? सरकारी पांवड्यार युवा महोत्सव जातात तशेंच बाकीचेय कांय युवा महोत्सव जातात थंय अर्जून देशपांडेक कित्याक आपयनात काय? कारणां जायतीं. एक कारण म्हळ्यार हो अर्जून कोण, ताचो वावर कितें तें खबर ना. गोंयांत ज्यो कार्यावळी जातात ताका सुमार ना. आतां ऑक्टोबरांतल्यान हो धुंवर सुरू जातलो. तरणाट्या उद्देजकांची जोडणी अर्जून देशपांडे कडेन केल्यार जेनेरीक आधार गोंयांत मोट्या प्रमाणांत गांवांनी पावोवं येता. ही सरपळी वाडोवं येता. तरणाट्यां मदीं आपले कर्तबगारीन आत्मविश्वास वाडलो काय आपशींच बाकिच्यांक नेट येतलो. खूब कितें करूं येता. एकूच जाय. पयशे? च्ये… जाय फकत वान्सा.
मुकेश थळी
फोंडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.