भांगरभूंय | प्रतिनिधी
गोंयांत डेंग्युची धाम पातळ्ळ्या. सगल्योच बातम्यो खबरां चॅनलांचेर वा दिसाळ्यांनी येनात, पूण दरेका गांवांत आतां डेंग्युचे दुयेंती सांपडपाक लागल्यात. मरण येवपाच्योय कांय घडणुको घडल्यात. आतां सरकारान डेंग्यू आड झुजपाक पालिका कायद्यांत सुदारणा करपाचें थारायलां. काल भलायकी आनी शार उदरगत मंत्र्यान तशी घोशणा केली. डेंग्युचेर नियंत्रण दवरतलो जाल्यार जळारांची पैदास आडावपाक जाय. घाणयारें वा नितळ दोनूय तरेचें उदक खंयच सांठून उरपाक जायना. जळारां फक्त गटारांनी जातात, असो भोवतेकांचो समज आसा. पूण तीं शुद्ध उदकांतूय जातात… आनी तातूंत जावपी जळारां हेरां परस चड घातक आसतात. तेन्ना भलायकी खात्यान झुजा पांवड्यार ही डेंग्यू समस्या हाताळपाची गरज आसा. मच्छरदाणी, जळारां धांवडावपाचीं उपकरणां दरेकलो वापरता काय ना, तें पळोवपाक जाय. दुयेंतींची तपासणी तर जावपाकूच जाय. पालिका, पंचायतींची नितळसाणीचे बाबतींत व्हडली जापसालदारकी आसा.
पालिका कायद्यांत सुदारणा जातकच जळारांक धांवडावपाचो धुंवर (फॉगींग) आनी वखद मारपाचें काम इमारतींतल्या लोकांक वा तांचे सोसायटीक करचें पडटलें. (काय हें काम करून घेवपाचें?) हे विशीचें विधेयक फुडल्या विधानसभा अधिवेशनांत येतलें. तशें केलल्ल्यान भलायकी खातें आनी पालिके वयलें वजें उणें जातलें, अशें सरकाराक दिसता. मात, ही यंत्रणा खंयच्यान हाडपाची? पालिके कडल्यान काय खाजगी? कांय सेवा पालिकेन नागरिकांक मुफत दिवपाच्यो आसतात. सध्या इमारती कुशीचीं गटारां उस्पुपाचें, तण, झिली, झाडां कापपाचें काम पालिका करता. खूब प्रमाणांत आशिल्लो कोयर व्हरपाचें कामूय पालिका करतात. तेंय बी फुकटांत. म्हणटकच धुंवर, वखदां फवारपाचें काम दुडू मोडून करपाची तयारी हावसींग सोसायट्यांक करची पडटली? गांवांतल्या कॉलनी, वाड्यांचेरूय फुडाराक होच निर्णय लागू जातलो काय? कारण हालींच्या कांय वर्सांनी सगल्यांकूच मुफत येवजण्यांची संवय जाल्या. इतली की खुद्द प्रधानमंत्र्यान देशांत रेवडी संस्कृताय आसा, अशी टिका कांय म्हयन्यां पयलीं केल्ली. पालिका लोकां कडल्यान वेगळेवेगळे कर घेता, म्हणटकच थोड्यांक हो निर्णय उस्तुरें वचपाची शक्यताय आसा.
पालिका लोकां कडल्यान वसूल करता ते कर आतां ऑनलायन पद्दतीन घेवपाचें सरकारान थारायलां. फुडल्या 15 दिसां भितर ह्या कामाक सुरवात करपाची मोख दवरल्या. चवथ लागीं पाविल्ल्यान हो निर्णय ताचे पयलीं चालीक लागत अशें दिसना. तरीय सप्टेंबर सोंपचे पयलीं सगलें ऑनलायन जावंक फावो. हो जमानो डिजीटलाचो. पालिकांनीच न्हय, तर पंचायती, सरकारी खात्यांनी आपल्यो चडांत चड येवजण्यो, सेवा ऑनलायन करपाक जाय. आतां सगले अर्ज ऑनलायन मेळटात. पूण, ते फकत डावनलोड करून भरपाचे आनी कार्यालयांत व्हरून दिवपाचे. घरांत बशिल्ले कडेन ते भरपाक, फी फारीक करपाक मेळना. पालिकांनी सात वर्सां परस चड काळ सेवेंत आशिल्ल्यांक कायम सेवेंत आस्पावन घेवपाचो निर्णय घेतला. वर्साचीं वर्सां तात्पुरत्या तत्वाचेर काम करपी तरणाट्यांक थाकाय दिवपी हो निर्णय. पूण एकाच जाग्यार खूब वर्सां काम करप्यांचें कितें? कॉमन कॅडर लागू करून तांची बदली करपाचो विचार फाटीं कांय फुडाऱ्यांनी उक्तायिल्लो. मुखार कांय जावंक ना. पालिका कर्मचाऱ्यांचोय ताका खर विरोध आसतलो.
सरकारा कडल्यान पालिकांक निधी मेळटा. राष्ट्रीय सण मनोवपाक वा कांय येवजण्यो, कामां खातीर. मात, तो वापरिनासतना तसोच पडून आसा, अशें सरकाराक दिसून आयलां. हो निधी कित्याक उरला, ताची चवकशी जाल्यार बरी. कारण उदरगतीच्या कामां खातीर कांय लाख आयले आनी ते पडून उरले वा परत गेले, हाचो अर्थ विकासकाम जावंक ना. ताचे खातीर कोणे फुडाकार घेवंक ना. गांवांची उदरगत करपाचें काम स्वराज्य संस्थांचें. म्हणटकच सरकारी निधी मेळटा, तो योग्य पद्दतीन वापरप ही तांची लागणूक. आदल्या तेंपार केंद्रा कडल्यान आयिल्लो निधीय राज्य सरकारांनी कांयच करूंक नाशिल्ल्यान परत वतालो खंय. हालींचीच गजाल सांगपाची म्हणल्यार, स्मार्ट सिटी खातीर दिल्लो निधी परत केंद्र सरकारा कडेन वचपाचो. उपरांत धडाधड कामां सुरू जालीं. तेन्ना पालिकांनी निधीचो वापर करचो, हे खातीर सरकाराकूच फुडाकार घेवचो पडटलो.
कांय पालिकांचे मास्टर प्लॅन तयार आसात. देखीक वाळपय, फोंडे. म्हापशें, मुरगांवाचे तयार जातात. हे सामके गरजेचें. शार कितलें मेरेन फुगपाक दिवपाचें, खंय – खंय कितल्यो आनी कसल्यो साधन सुविधा जाय, खंय वसणुक उबारपाक परवानगी दिवपाची. शेतां, जमनी, दोंगर फुडल्या पिळग्यां खातीर, खास करून पर्यावरणा खातीर सांबाळून दवरपाचे काय नात, ताचोय विचार जावपाक जाय. पालिका हीं उदरगतीचीं देवळां जावचीं, जंय सगल्यांनी पवित्र, निसुवार्थी भावनेन प्रामाणीक सेवा दिवची, विकासकामां करचीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
