भांगरभूंय | प्रतिनिधी
आयची जीण धांवपळीची, धकाधकीची जाल्या. सरकारी नोकरी लेगीत उण्या प्रमाणांत आसा आनी ती दरेकाक मेळटली अशेंय ना. खाजगी मळार नोकरी आसा पूण थंय नोकरी करून पेन्शन, वेगळेवेगळे फायदे सामक्या उण्या प्रमाणांत आसतात. हाचे पयलींच्या काळांत दरेक कुटुंबाक एक जमनीचो कुडको तरी आसतालो. आयज अशी परिस्थिती ना. जमीन जरी आसली तरी तातूंतल्यान उत्पन्न कितलें येतलें आनी ते खातीर खर्च कितलो जातलो अश्या घुस्पागोंदळांत खूबशे जाण सांपडल्यात. खूबशे फावटी सैमाची संकश्टां येतात. दिसानदीस शिक्षणाचो खर्च सुमारा भायर वाडला. तशेंच चले-चलयांक शिक्षणा खातीर शारांनी धाडचें पडटात. ते खातीर लेगीत व्हड खर्च येता.
भुरग्याचें शिक्षण आनी ते खातीर जावपी खर्च हालींच्या काळांत खूब मोटो आसा. तशेंच चलयांचें लग्न हे खातीर लेगीत व्हड प्रमाणांत पयसो खर्च करचो पडटा. दिसानदीस म्हारगाय आनी भलायकी विशयक खर्च वाडतच आसात. हें सगलें करून निवृत्तीच्या काळांत आपले कडेन थोडो पयसो आसप गरजेचें आसा. आपणाक जो पयसो मेळटा तो कांय प्रमाणांत खर्च करून तातूंतलो कांय हिस्सो गुंतवणूक करप फायदेशीर आसा.
सर्वसादारणपणा अशें म्हणटात की आपले जोडीचे 50 पयशे दीपट्ट्या खर्चा खातीर वापरचे. उरिल्ली 15 टक्के रक्कम शिक्षणा खातीर आनी उरिल्ली 20 टक्के रक्कम भलायकी तशेंच घराचे हप्ते बी हे खातीर वापरची. उरिल्ली 15 टक्के रक्कम फुडल्या आयुश्याच्या तरतुदी खातीर दवरची. तशेंच रक्कम सांठयतना सगल्या पर्यायांचो विचार करचो. कांय रक्कम पोस्टाच्या एनएसएस हातूंत कांय रक्कम बँकेंत ठेवीच्या स्वरुपांत, कांय रक्कम पोस्टाच्या रिकरींग खात्यांत जाल्यार कांय रक्कम शॅर्स हातूंत गुंतवणूक करपाक हरकत ना. फक्त एकीच कडेन गुंतवणूक करची न्हय. सगले कडेन मेळपी फायदे विचारांत घेवचे. बचत करपाचो विचार केलो ना जाल्यार सेवानिवृत्ती उपरांत कुटुंबाची परिस्थिती अवघड जावपाची शक्यताय न्हयकारूं येना.
हालीं निवृत्ती उपरांत लेगीत नोकरीचे खूबशे पर्याय उपलब्ध आसात. पूण ते सगल्यांकूच जमत अशें ना. जांची भलायकी बरी आसा, तशेंच कितंेंय करपाची इत्सा आसा तांणी नोकरी वा जमत जाल्यार कसलोय वेवसाय करपाक हरकत ना. बचती विशीं आनीक एक गजाल विचारांत घेवप गरजेचें आसा आनी ती म्हणल्यार थेंब्या थेंब्यान खंय तळें सांचता ही उक्ती सदांच लक्षांत दवरप गरजेची आसा. एकूणच जाका ऐन उमेदीच्या काळांत बचतीचें म्हत्व कळटा आनी जो ते नदरेन पावलां उबारता तो आपले सेवानिवृत्ती उपरांतचें आयुश्य समाधानान घालयता.
हालीं खूबशीं भुरगीं विदेशांत स्थायीक जातात आनी आवय-बापूय गांवांत वा नोकरेचे सुवातेर आसतात. ताका लागून वेगळेच प्रस्न निर्माण जाल्यात. जाण्टेपणांत वखदां आनी भलायकी हे खातीर सदांच पयसो लागता. तो भुरगीं दितलींच अशें गृहीत धरतात. पूण खूबश्या जाणांची अशी परिस्थिती नासता. ते खातीर मॅडीकल स्कीम बी हातूंत लेगीत पयसो दवरप गरजेचें आसा. एकूणच नोकरेंत आसतना भलायकी, भुरग्यांचें शिक्षण, चले, चलयांचीं लग्नां, सेवानिवृत्ती उपरांतचे आयुश्य आनी गरजो हाचो विचार गरजेचो आसा.
संवसारांत भारत तंबाकू उत्पादनांत दुसरो
भारत तंबाकूचो जगांतलो दुसरो सगल्यांत मोटो गिरायक आनी उत्पादक देश आसा. तंबाकूच्या अतीसेवनान दर वर्सा 80 लाख लोकांक मरण येता. ही आंकडेवारी खरेंच हुस्को करपा सारकी आसा. विशेश म्हणल्यार ल्हान भुरग्या सावन व्हड मनश्या मेरेनच्या सगल्या लोकांक तंबाकूचें वेसन आसा. संवसारांत सुमार 3.7 कोटी भुरगीं तंबाकूचें सेवन करतात. भारतांत लेगीत सुमार 13 ते 15 ह्या पिराये गटांत सुमार 8.4 टक्के भुरगीं तंबाकूचें सेवन करतना दिसून येता. चड करून तरणाट्यां मदीं ई सिगार वा हुक्को हाचेंय प्रमाण वाडिल्लें दिसून येता. तंबाकू खाल्ल्यान तात्पुरतें सूख वा आनंद मेळिल्ल्याचें दिसता. खूबशे कडेन हुक्को बार लेगीत आसा. हुक्को ओडप जिवाक सामकें हानिकारक आसा. ई सिगाराच्या अती वापराक लागून फुफ्फुसाचें दुयेंस वा कांक्र जावपाची शक्यताय चड आसता. एका सिगारांत सुमार 7000 प्रकारचे घटक कॅमिकल्स आसतात. ह्या सगल्यांत म्हत्वाचें म्हणल्यार निकोटीन आसता. ताका लागून फुफ्फुसाचें तशेंच मेंदवाचीं आनी काळजाचीं दुयेंसां जातात. गुरवार बायल जर सिगार ओडटा आसत जाल्यार ताचो सहाजिकूच ताच्या भावी अपत्याचेर ताचो मोटो परिणाम जाता. तंबाकूच्या सेवनाक लागून स्वास घेवपी नळयेंत लेगीत सूज येता. वट्ट तंबाकूक लागून भलायकीचें सुमारा भायर लुकसाण जाता. आयजकाल म्हाविद्यालयांतले चले, चलयो सर्रास सिगार ओडटना दिसून येता. हें लक्षण सामकें गंभीर आसा. तांच्या पालकांक ही गजाल खबर नासता. 31 मे दिसा संवसारीक तंबाकू निशेध दीस मनयतात. ह्या वर्सा लेगीत तंबाकू वापरा पसून नवे पिळगेक कशें वाटावं येतलें हाचो विचार त्या दिसा व्हड प्रमाणांत जालो. हें संकश्ट खूब व्हड आसा. ताचे पसून लोकांक पयस करूंक जाय, जाल्यारूच तांकां बरी भलायकी मेळटली. तंबाकूचे दुश्परिणाम लोकांक सांगून आनी ताचे घात पटोवन ते पयस करूंक जाय. जाल्यारूच तरणाटी पिळगी वेसना पसून पयस उरतली आनी तांची भलायकी बरी उरतली.
शांताराम वाघ
9623452553
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
