भांगरभूंय | प्रतिनिधी
व्हिटॅमिन डी हें एकूच जीवनसत्व, जें तुमची कुड स्वता तयार करपाक शकता. हे खातीर आमकां फकत सुर्याचो उजवाड जाय. जशी वनस्पत सूर्याच्या वतान स्वता खातीर जेवण तयार करता, तशीच आमची कुडय स्वता खातीर व्हिटॅमिन डी तयार करता. पूण अजापाची गजाल म्हळ्यार सुर्याचो उजवाड फुकट आसून लेगीत संवसारांतल्या सुमार अर्द्या लोकांक व्हिटॅमिन डीचो उणाव जाणवता. ही गजाल आमच्या देशांत चड गंभीर आसा. टाटा १ एमजी लॅबाच्या अभ्यासा प्रमाण भारतांतल्या सुमार ७६% लोकांक व्हिटॅमिन डीचो उणाव जाणवता. हाचो अर्थ दर ४ लोकां मदल्या ३ जाणां मदीं व्हिटॅमिन डी कमी आसा.
भारताची भौगोलीक स्थिती पळयल्यार ट्रॉपिक ऑफ कॅन्सर आमच्या देशाच्या मध्यभागांतल्यान वता. म्हणल्यार आमच्या देशाक वर्सभर चड सुर्याचो उजवाड मेळटा. अशे परिस्थितींत इतल्या व्हड प्रमाणांत भारतीयांक व्हिटॅमिन डीचो उणाव जाणवता. ह्या उणावाचें कारण कितें असो प्रस्न सध्या उप्रासता.
हार्वर्ड मेडिकल स्कुलाच्या म्हणण्या प्रमाण एकंदरीत व्हिटॅमिन डी आमच्या कुडींतल्या २०० परस चड ल्हान व्हड गजालीं खातीर जापसालदार आसता. स्टॅनफर्ड मेडिकल स्कुलान २०१९ वर्सा केल्ल्या अभ्यासा प्रमाण व्हिटॅमिन डी उणावाक लागून घातक दुयेंसांचो धोको १८% वाडटा. अशे परिस्थितींत भारतांत इतल्या व्हड प्रमाणांत ताचो उणाव जाल्यार फुडाराक रोगाच्या आलेखांत वाड जावं येता.
निरोगी कूड आनी घटमूट हाडां खातीर डी जीवनसत्व खूब म्हत्वाचें. तशेंच आमच्या जाण्टेपणाचो खरो आदार म्हळ्यार व्हिटॅमीन डी. तो दोतोरा भशेन आमची जतनाय घेता. जायते फावटीं आमच्या कुडींत कितें तरी उणें आसता आनी तें कितें हें आमकां कळना.
धर्तरेच्या ज्या वाठारांनी सरळ सुर्याचो उजवाड पडना, थंय सुर्याचीं किरणांय उणीं पावतात. आमच्या कुडींत ह्या किरणांच्या आदारान व्हिटॅमिन डी तयार जाता. हाका लागून थंड देशांतल्या लोकांक व्हिटॅमिन डीचें सप्लिमेंट्स घेवचें पडटा.
उणावाचें कारण हवा प्रदुशण
रस्त्यार दीस- रात चलपी वाहनांचो धुंवर, कारखान्यांतल्यान येवपी धुंवर हीं वायु प्रदुशणाचीं कारणां. हाका लागून हवेंतल्या कार्बन कणांचें प्रमाण वाडटा. सुर्याच्या उजवाडा वांगडा येवपी UVB किरणां ते शोशून घेतात. कांय UVB किरणां ओझोन थरन सोंसतात. जर आमी प्रदुशीत वाठारांत रावतात जाल्यार आमकां व्हिटॅमीन डीच्या उणावाचो त्रास जावपाची दाट शक्यताय आसता.
सनस्क्रीन लायिल्ल्यान व्हिटॅमिन डीचो उणाव जाणवता. सनस्क्रीन आमकां सुर्याच्या किरणां पसून वाटायता. वांगडा सनस्क्रीन UVB किरणांय ब्लॉक जातात. त्यामुळे व्हिटॅमिन डीचो उणाव जाणवता.
व्हिटॅमिन डी निर्मिती खातीर कांतीचें तापमानूय जापसालदार
थंड कांती परस उबदार कांत व्हिटॅमिन डी चड तयार करता. ताका लागून गिमांत आमची काञत चड प्रमाणांत व्हिटॅमिन डी तयार करता.
हार्वर्ड मेडिकल स्कुलाच्या अभ्यासा प्रमाण फॅट टिश्यू व्हिटॅमीन डी सोंसून घेतात. जेणे करून व्हिटॅमिन डीचो उणाव आसल्यार कुडीक ताचो उपेग करूं येता. पूण ह्याच अभ्यासांत चड वजनाच्या लोकांक व्हिटॅमिन डीचो उणीव आसता अशेंय दिसून आयलां कारण कुडींत सांठयल्ली चरबी व्हिटॅमिन डी सोंसून घेता.
पिराय वाडत वता तशी कांतीक व्हिटॅमिन डी तयार करपाक आदार दिवपी पदार्थ आमच्या कुडींत उणे जावपाक लागतात. हाका लागून व्हिटॅमीन डीचो उणाव जाण्ट्यांमदीं चड प्रमाणांत दिसता. ही गरज भागोवपा खातीर दोतोर पुरक पदार्थ घेवपाची शिफारस करतात.
मजगतीं, फिग्द आनी मुत्रपींडाचे भलायकेचोय सरळ संबंध व्हिटॅमिन डीच्या शोशणा कडेन आसता.
उणाव कसो भरून काडचो?
एका अभ्यासा प्रमाण भारतीयांक व्हिटॅमिन डीची सामान्य पातळी तिगोवन दवरपा खातीर दर दिसा १ वर तरी सुर्याचो उजवाड जाय पडटा. दनपरां १ वर सुर्याच्या उजवाडांत रावल्यार व्हिटॅमिन डीची पातळी तिगून उरूंक शकता. हांगासर आमच्या कातीचो जो भाग सुर्याच्या उजवाडाच्या थेट संपर्कांत येता तो भाग तितलेंच व्हिटॅमिन डी तयार करता हें लक्षांत दवरचें पडटलें. कपडे घालून सुर्याक बसून कांयच फायदो ना.
गिमाच्या दिसांनी दनपरां वताक वचचें न्हय. मात सकाळचो सुर्याचो उजवाड सध्या खातीर पुरो. गिमाच्या दिसांनी ताचो उणाव फोर्टिफायड तृणधान्य, दूद, चीज, मशरूम, तांतयां आनी नुस्तें खावन भरूं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
