भांगरभूंय | प्रतिनिधी
मनीस खंय शिक्षणाक लागून आपले जिणे दर्जो वाडोवंक पावता. आपले वेगळेपण सिद्द करूंक पावता. तेच प्रमाण आपल्यो गरजोय पुराय करूंक पावता. कांय वर्सां मेरेन ही गजाल कोणाकय पटपा सारकी आशिल्ली. कित्याक काय म्हणल्यार शिक्षीत आशिल्ल्यांक नोकरी ही मेळटालीच. कोणाक पास जायना बराबर तत्काळ तर कोणाक मात्शी उसरां पूण नक्की मेळटाली. एका वेळार शिकप अर्द्यार सोडिल्ल्यांक लेगीत तांचे कुशळटाये प्रमाण सरकारी वा निमसरकारी नोकरी मेळपाची शें प्रतिशेंत शक्यताय आशिल्ली. त्या वेळार खाजगी वेवसायीक आनीक उद्देगीक क्षेत्रांय आतां सारकी आंकड्यान व्हड नाशिल्लीं. तरी पूण कितलेशेच गोंयकार अशा अस्थापनांनी वावरून आपलो संवसार बरे तरेन करताले. वेळार नोकरी मेळिल्ल्यान गोंयकार घर दार बांदून, दुचाकी सारकें वाहन घरा मुखार उबें करून प्रसन्नतायेन जियेताले.
दुसरे वटेन अशेय तरणाटे आशिल्ले जे आपलो स्वताचो वेवसाय सुरू करून हेरांकय रोजगार दिवन पुण्य कमयताले. जांचे आज्या पणजाले वेवसाय आशिल्ले ते घेवन बसताले. आपले बुद्दीक कश्टाची जोड दिवन वेवसायांत वाड करून चार पयशे सुगूर करूंक पावताले. अडी आडचल्ल्यांक हात दिवन वयर हाडपाचो यत्न करताले. हांगा परंपरीक वेवसाय करपीय बरेच लोक वावुरताले थवय, रेंदेर, पाडेली, कुमार, म्हालो, खारवी, चामार, दर्जी, कासांर आनीक हेर कितलेशेच उद्दोग धंदे करपी व्हड संखेन वावुरतना दिसताले. आतांचे पिळगेक सांगल्यार पटचें ना हे सगले वावुरपी गोंयकारूच आशिल्ले म्हूण. ते प्रामाणीकपणान आपलो वेवसाय करून आपलो आनीक आपल्या घराब्याचो उदरनिर्वाह करताले. समाजांत नांव जोडून आशिल्ले. आतां ह्या सगल्या क्षेत्रांत गोंया भायल्यांनीच बस्तान मांडलां. गोंयकारांनी अशा वेवसायांतल्यान हात फाटीं घेतल्यात तांची कारणां वेगळींवेगळीं आसूं येता.
गोंय मुक्त जाले उपरांत शिक्षणाचीं दारां उक्तीं जालीं सरकारान शिक्षणाच्या मळार बरोच वावर करून तळागळाक वावुरपी मनशां मेरेन ज्ञानप्राप्तीचें हें साधन पावयलें. हाचो परिणाम म्हणूं येता हळुहळू करून गोंयकार शिक्षणाचें म्हत्व जाणां जावंक पावले. तांणी भुरग्यांक आपल्या वेवसाया पसून पयस दवरले आनी तांकां शिक्षण वेंगावंक उत्साहीत केले. आपूण शिकूंक पावलो ना हाचे दुख्ख त्या पालकांक आसतालेंच आनी म्हूण आपल्या भुरग्यान खूब शिकून नांव वयर काडचें. अशी आस्त दवरून कसल्याच गजालींचो उणाव जावचो न्हय म्हूण स्वता कश्ट घेवन वावुरले. जाचे आमी साक्षिदार आसात. जस जशे साक्षरतायेचें म्हत्व लोकांक पटपाक लागले शिक्षण क्षेत्रांय उपाट भरून व्हांवंक लागली. वेगळेवेगळे शिक्षण घेतिल्ल्या तरणाट्यांचो आंकडो दिसान दीस वाडत आसा. तांतूंत उच्च शिक्षीत जाल्ल्यांचो आंकडो तर हिसपा भायर पावला. तांच्या शिक्षणा प्रमाण तांकां नोकरी मेळना जाल्ल्यान ते दुखावल्यात. दुसरे वटेन शिक्षकी पेशांत कॉन्ट्रेक्टार वावुरपी तरणाटी पिळगी तकलेर हात मारून घेवंक लागल्यात. सरकारान जाता तितले बेगीन शिक्षकांचीं नियमीत पदां भरचीं अशी ते मागणी करूंक लागल्यात. तांच्या म्हणण्या प्रमाण अनुदानीत शाळांनी जे शिक्षक वा शिक्षिका निवृत्त जाल्यात त्या पदांचेर सरकार कायम शिक्षकांची नेमणूक कित्याक करिनात काय? ह्या निवृत्त जाल्ल्या शिक्षकांनी सुमार 25 ते 30 वर्सां मेरेन त्या त्या स्कुलांनी सेवा दिल्ली आसा. ती सुवात कायम पदाचेर घेनासतना कॉन्ट्रेक्टाचेर घेवन सरकार कसलो न्याय करूंक सोदता हाची जाप तांकां मेळना.
सरकारी मुळाव्या शाळानी शिक्षकांची नियुक्ती जाली माध्यमीक आनीक उच्च माध्यमीक शाळांनी अजून भरती जावंक ना. ते भायर अनुदानीत स्कुलांनी सरकार फक्त कॉन्ट्रेक्टाचेर शिक्षक आनी हेर कर्मचाऱ्यांची नेमणूक करूंक अनुमती दिता. हें समा न्हय शिकून सांवरून शिक्षकी पेशांत आपलो फुडार घडोवंक सोदपी ह्या तरणाट्यांनी कोणाच्या तोंडा कडेन पळोवप असोय प्रस्न ते विचारूंक लागल्यात. भारत देश हो तरणाट्यांचो देश हें पालुपदच आमी आयकुपाचें कांय कितें असोय प्रस्न ही तरणाटी पिळगी विचारूंक लागल्या. तांच्या हक्काची जापसालकी सरकारान घेवन तांची इत्सा पुराय केली ना जाल्यार ही तरणाटी पिळगी मार्ग भरकटकूंक लागली जाल्यार सगल्यांक मारक थारूं येता. घडये कॉन्ट्रेक्टाचेर नियुक्ती केली म्हणटकच तांचो फुडार जालो असो समज आमी करून घेतला आसत तर तो चुकीचो समज जातलो. आनी हो समज आतांच सुदारूंक ना जाल्यार फुडाराक हे तरणाटे वायट मार्ग आपणावंक लागले जाल्यार दुशण कोणाक दिवचें सरकाराक वा शिकपाक उर्बां दिवपी तांच्या आवय बापायक? आमी हो देश तरणाट्यांचो अशे ओगीच म्हणनात लागीं लागीं हांगा पन्नास प्रतिशें तरणाटी पिळगी आसा. तांचे कुडींत जें रगत शिंवशीवता ताचो लाव दशााक मेळूं नाका व्हय, तांकां दिका दाखोवन देश मुखार व्हरूंक तांचे बळगे आनीक गिन्यानाचो फावो तसो उपेग करून घेवं येता काय ना. जो मेरेन तांकां कायम स्वरुपी नोकरी मेळना तांचो फुडार काळखांतच. ते भायर दिसान दीस तांची पिराय वाडत वता हाचेर कोणे विचार केला व्हय.
स्वंयपूर्ण गोंय जावचे म्हूण सरकारान बरी पावलां मारल्यांत, पूण ताचो लाव शिक्षकी पेशांत येवंक सोदपी तरणाट्यांक जावप शक्य ना. म्हणटकच ज्या अनुदानीत शाळा स्कुलांनी शिक्षक वा शिक्षकेत्तर कर्मचारी निवृत्त जाल्यात ते सुवातेर कायम रुपी शिक्षकांची वा हेर कर्मच्याऱ्यांची नियुक्ती सुरू करची अशी ह्या तरणाट्यांची मागणी आयज आसा आनी ती सरकारान मान्य करची. अशें पुराय गोंयकारांक दिसप सभावीक जावन आसा. हांव तर म्हणीन कॉन्ट्रेक्टाचेर शिक्षकांची नेमणूक करप म्हणल्यार विद्यार्थ्यांचेरूय अन्याय करप. ते भायर ह्या कंत्राटी शिक्षकांक ‘सवो वेतन आयोग’ नेमा प्रमाण 80% पगार मेळटा. तांच्या मता प्रमाण 100 टक्के काम आनी पगार 20 टक्के उणो. नवे शिक्षणीक धोरण चालीक लावंक सरकार दुडू मोडटा काय ना, ते भायर वेगळेवेगळे सुवाळे मनोवंक सरकारी खजानो उजार जाताच न्हय. मागीर शिक्षकांची नियुक्ती कित्याक फाटीं पडटा. जे कोण टीइटी परिक्षा उत्तीर्ण जाल्ले आसात तांकां तरी कायम नोकरी कित्याक मेळची न्हय अशें ह्या शिक्षीत तरणाट्यांचे पालक विचारूंक लागल्यात.
एच मनोज
9822441417
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
