भांगरभूंय | प्रतिनिधी
पणजी : पेडणें तालुको विकास परिशदे वतीन राजस्थान कॅडराचे गोंयचे आयएएस अधिकारी आशुतोष आपा तेली पेडणेंकार हांचो १२ मार्च २०२५ दिसा स. भाऊसायब बांदोडकार यादस्तीक पुरस्कार दिवन भोवमान करतले. अशी घोशणा ऍड. रमाकांत खलप हांणी केली.
रमाकांत खलप हांणी सांगलें :
भाऊसायबांच्या कार्याची याद करतना गोंयचें नांव पर्जळोवपी गोंयकारांक तांचें शिक्षण, समाजा खातीर योगदान, तांच्या कर्तुत्वांचो भोवमान जावचो म्हणून पुरस्कार भेटोवचो हे भावनेंतल्यान मनांत विचार घोळटाले. तेन्ना येवपी १२ मार्च २०२५ (भाऊंचे जयंती निमतान) दिसा ‘भाऊसायब बांदोडकार यादस्तीक पुरस्कार’ दिवपाचो निर्णय घेतला.
तांणी म्हणलें, भाऊ पेडण्यां जल्माक आयले. तांणी पेडणेंच्यानूच नांव जोडपाक सुरवात केली. मांद्रेंचे आमदार आसतनाच ते मुख्यमंत्री जाले. हाका लागून अंदूंचो पुरस्कार पेडणेंच्याच एका कर्तुपी तरणाट्याक भेटोवपाचो योग येवप हें पेडणेंकारांचें भाग्यूच.
मजगतीं, प्रशासकीय सेवांक गोंयकारांचो जाय तसो प्रतिसाद मेळना अशी खंत खलप हांणी उक्तायली.
आशुतोष तेली पेडणेंकार हांचे विशीं
फाटल्या २२ वर्सां सावन राजस्थानांत प्रशासकी सेवा दिवपी आशुतोष हांणी २००१ वर्सा यूपीएससी पास केलें. ह्या काळांत तांणी राजस्थानांत जायत्या पदांचेर रावन काम केलें. तांचे बापूय सेवानिवृत्त पुलीस अधीक्षक आपा तेली हांणीच तांकां भारतीय प्रशासकी सेवेंत रुजू जावपाची उर्बा दिली. विद्यार्थी दशेंत जायते आयपीएस अधिकार्यां कडेन संवाद सादून आनी यूपीएससी परिक्षे विशीं जाणून घेवन आशुतोष हांणी यूपीएससीची परिक्षा दिली. २००१ वर्सा परिक्षा पास जाले उपरांत, २००२ सावन ८ वर्सां तांणी राजस्थानांत कलेक्टर पदार सेवा दिली.
गोंयच्या तरणाट्यांची प्रशासकीय सेवे विशीं इत्सा ना, अशें तांकां एके मुलाखतींत विचारिल्लें तेन्ना तांणी जायत्या गजालींचेर उजवाड घालो. गोंयचे तरणाटे प्रशासकीय सेवे कडेन करियर ऑप्शन म्हणून पळयनात. जायते शिक्षकूय अशा परिक्षां विशीं अनवळखी आसतात. ताका लागूनय योग्य संद आसूनय विद्यार्थी परिक्षा दिनात. शिक्षकां सयत पालकांनीय फुडाकार घेवन हे दिकेन विद्यार्थ्यांक घडयल्यार गोंयकारूय जीपीएससी/ यूपीएससी परिक्षा पास जातले, अशें तांणी म्हणिल्लें.
गोंयच्या विद्यार्थ्यांक ल्हानपणांतूच सर्त परिक्षां खातीर तयार करपाची गरज आसा. गोंयकार मातूय सुसेगाद ना. गोंयच्या जायत्या जाणांनी प्रशासकीय सेवेंत योगदान दिलां. देशांतल्या हेर राज्यांनी आशिल्ल्या ईकोसिस्टम प्रमाण गोंयांतूय प्रशिक्षण आनी मार्गदर्शन केंद्रां जावपाची अपेक्षा तांणी उक्तायिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
