भांगरभूंय | प्रतिनिधी
१ कील मिठांत ९० आनी साखरेंत ६८ मायक्रोप्लास्टिकचे कुडके सांपडले
नवी दिल्ली, खबरां संस्था: देशांत विकपी दर एका ब्रँडाच्या मीठ आनी साकर पॅकेटांनी मायक्रोप्लास्टीक आसता. मागीर हे ब्रँड ल्हान वा व्हड आनी पॅक केल्ले वा पॅक करूंक नाशिल्ले आसूं. ह्या सगळ्यांनी मायक्रोप्लास्टीक आसता. मंगळारा उजवाडाक आयिल्ल्या एका अभ्यासांत हो दावो केला.
‘मायक्रोप्लास्टीक्स इन सॉल्ट अँड शुगर’ ह्या नांवान तयार केल्लो हो अभ्यास टॉक्सिक्स लिंक नांवाचे पर्यावरण संशोधन संस्थेन तयार केला. टेबल मीठ, रॉक सॉल्ट, दर्यांतलें मीठ आनी थळावें कच्चें मीठ तशेंच ऑनलायन आनी थळाव्या बाजारांतल्यान विकत घेतिल्ल्या पांच तरेच्या साखरे सयत १० तरेच्या मिठांची चाचणी केल्या उपरांत हे संस्थेन हो अभ्यास सादर केलो.
मायक्रोप्लास्टीक म्हळ्यार कितें?
मायक्रोप्लास्टीक म्हळ्यार प्लास्टिकचे कण. मायक्रोप्लास्टिक्स तंतू, गुळयो आनी कुडक्यांच्या स्वरुपांत मेळटात. मीठ आनी साखरेच्या सगळ्या नमुन्यांनी विवीध तरेचे मायक्रोप्लास्टिक्स आशिल्ल्याचें ह्या अभ्यासांतल्यान मुखार आयलां. आनी हे अगळे तंतू, गुळयो आनी कुडक्यांच्या स्वरुपाचे आशिल्ले. ह्या मायक्रोप्लास्टिक्सांचो आकार ०.१ मिमी ते ५ मिमी आसता. मायक्रोप्लास्टिक्सचें सगळ्यांत चड प्रमाण आयोडीन युक्त मिठांत सांपडलें. जे भोवरंगांचे पातळ तंतू आनी फिल्म्सच्या स्वरूपांत आशिल्ले.
एक कील मिठात ९० कुडके
अहवाला प्रमाण, मिठाच्या नमुन्यांत एक कील मिठांत ६.७१ ते ८९.१५ मायक्रोप्लास्टिकचें प्रमाण कुडक्यांनी सांपडलें. आयोडीन युक्त एका कीलच्या मिठांत सगळ्यांत चड ८९.१५ मायक्रोप्लास्टिक्सचें प्रमाण सांपडलें. जाल्यार सगळ्यांत उणें सेंद्रीय रॉक सॉल्टांत ६.७० मायक्रोप्लास्टिक्सचे कुडके सांपडले. तशेंच एका कीलच्या साखरेच्या नमुन्यां मदीं मायक्रोप्लास्टिक्सचें प्रमाण ११.८५ ते ६८.२५ कुडके सांपडले. मायक्रोप्लास्टिक्सचें सगळ्यांत चड प्रमाण गैर-सेंद्रिय साखरेंत सांपडलें.
भारतीय दिसाक ११ ग्रॅम मीठ आनी १० चमचे साखर घेतात
मायक्रोप्लास्टिक्स हो संवसारीक चिंतेचो विशय. कारण तें भलायकी आनी पर्यावरण ह्या दोगांकूय लुकसाण करपाक शकता. हे ल्हानशेक प्लास्टिकचे कण जेवण, उदक आनी हवेंतल्यान मनशाच्या शरिरांत प्रवेश करपाक शकतात. हालींच्या संशोधनांर फुफ्फुस, काळीज, आवयच्या दुदांतूय तशेंच जल्मल्ल्या भुरग्यां मदीं मायक्रोप्लास्टिक सांपडलां.
फाटल्या अभ्यासांत, भारतीय सदांच १०.९८ ग्रॅम मीठ आनी सुमार १० चमचे साखर वापरतात. जें संवसारीक भलायकी संघटणेच्या मर्यादे परस खूब चड आशिल्ल्याचें मुखार आयलां.
टॉक्सिक्स लिंकचे सहयोगी संचालक सतीश सिन्हा हांणी, ह्या अभ्यासांत आमी तपाशिल्ल्या मीठ आनी साखरेच्या सगळ्या नमुन्यांनी व्हडा प्रमाणांत मायक्रोप्लास्टिक्स मेळ्ळें. ही चिंता करपा सारकी गजाल. मायक्रोप्लास्टिकचो मनशाचे भलायकेचेर दीर्घकाळ परिणाम जाता. ह्या जावपी परिणामांचेर संशोधन करपाची गरज आसा अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
