भांगरभूंय | प्रतिनिधी
गोंय धाकटुलें राज्य. 3702 चौखण किलोमिटर आंवाठ. शेजराचो सिंधुदुर्ग जिल्हो पसून आमचे परस व्हडलो. 5207 चौखण किलोमिटर. म्हणटकच गोंयांत न्हंयो, चिखलाची जमीन, दोंगर, रानां सोडल्यार वसणुके खातीर जमीन ती कितली आसतली. तरीय गोंयांतली पूर्व- पश्चिमेचो मेळ आशिल्ली संस्कृताय, मुक्त, आधुनीक, शांत वातावरण, इंग्लिशीचो वावर, मोगाळ, सुसेगाद नीज गोंयकार…. अशा जायत्या कारणांक लागून हांगां व्हड संख्येन भायले लोक येतात. थोडे हांगाच स्थायीक जातात. कांय जाण दुसरें घर घेतात. पर्यटकांच्यो घिट्टी पळोवन वेवसाय करतात. मात, फाटल्या कांय वर्सांनी राज्यांत येवपी परप्रांतीयांचें ल्हार पळयल्यार गोंयचो सभाव, वळख व्हांवन वतली काय अशी भिरांत जाणकारांक दिसपाक लागल्या. भारतीयांक देशांत खंयूय वचून रावपाचो कायद्यान हक्क आसा. कोणूच तांकां आडावपाक शकना. पूण थळाव्यां परस तांचो आंकडो वाडप, राज्याच्या साधन- सुविधांचेर ताण येवप कितले मेरेन योग्य, हाचोय विचार जावप चुकीचें न्हय. शेंकड्यांनी वर्सां पयलीं आयिल्ले पारशी भाव दुदांत साकर विरघळची तशे भारतीयां मदीं एकरूप जाले. संख्येन सामके उणे आसून लेगीन तांणी अर्थीक, उद्देगीक, शिक्षणीक नदरेन आमचो, आतां तांचोय भारत वयर काडलो. तशे दुसऱ्या राज्यांनी वचपी करतात व्हय? काय आपापलीं जुंवीं करून रावतात? हाचोय अभ्यास करचो. आमी आनी तांणीय!!
आसगांवां फाटल्या साडेचार वर्सांत 1,364 कोटींचें 718 जमीन वेव्हार जाल्ल्याचें उक्तडार आयलां. जमनींचें मोल जांकां खबर आसात, तांच्या अदमासान उणींच चार हजार कोटीं परस चड मोलाचीं सेलडिडां जाल्यांत आसतलीं. विशेश म्हणल्यार ह्यो जमनी घेवपी चडशे परप्रांतीय. त्यो विकपी कोण तर आमीच गोंयकार आनी आमच्यो संस्था. आतां सगलेच एकमेकांक बोटां दाखयतात, ती गजाल वेगळी. अशें म्हणटात की 1980 च्या दसकांत एका सरकारी खात्यान जमीन विकली आनी पणजे जमनीचें मोल रातयां मळबाक तेंकलें. आसगांवांय अशेंच जालें. जमनी खपपाक लागल्यो आनी 2022 वर्सा मोल मळबाक तेंकलें. फाटल्या दोन वर्सांत तें आनिकूय वाडलां. मजगतीं, बोगस कागदां करून जमनी विकपाचीं प्रकरणां उक्तडार आयलीं. अटकूय जाली. ह्या ठकसेना मदीं कांय नीज गोंयकारूय आसात. ताका लागून आसगांवां जमनी खपपाचो वेग मात्सो मंद जाला. अंदूं स म्हयन्यांत 55 सेल डिडां नोंद जाल्यात. तातूंत 51,681 चौखण मिटर जमीन आनी हेर मालमत्तांचो आस्पाव आसा. 171 कोटींचो अर्थीक वेव्हार जाला. तातूंतल्यान सरकाराक 15 कोटी 30 लाख रुपया मेळ्ळ्यात. आतां आसगांवांक अशें कितें म्होंव लागलां, अशें कोणाकूय दिसतलें. हो गांव शांत, सैमसुंदर, दर्यावेळ- म्हापशें शारा पसून लागीं… देखून परप्रांतीयांक मोनेळ पडला आसतलो. पूण, हेर गांवांनीय असोच प्रकार जावंक नासतलो कित्या वयल्यान? राज्यांतल्या दर्यादेगांचेर कितल्यो जमनी विकल्यात आनी त्यो घेवप्यां मदीं कितले गोंयकार आसात, ताचो अभ्यास करचो पडटलो. जमनी घेवन तांणी थंय घरां, हाॅटेलां, आस्थापनां उबारल्यांत काय? थंय ते नेमको कितें वेवसाय करतात? हाचोय सोद घेवचो पडटलो.
आसगांवां कोणे सगल्यांत चड जमनी घेतल्यात? सरकारी आंकडेवारी प्रमाण, हातूंत 379 दिल्लीकार आसात. मुंबयचे 187, पुण्यांतले 18, हरयाणाचे 74, हैदराबादांतले 24, उत्तर प्रदेशांतले 22, कर्नाटकांतले 36 आनी हेर राज्यांतले 44 जाण आसात. 168 गोंयकारूय आसात. विदेशी नागरीक पसून जमनी घेवपांत फाटीं नात. अमेरिकन लोकांनी 9, इंग्लंड 8, कॅनडा 4, ऑस्ट्रेलिया, पुर्तुगाल, सिंगापूर आनी चीन दरेकी 2, बेल्जियम, जर्मनी, स्पेन आनी माॅरिशसच्या दरेकी 1 नागरिकान जमनी घेतल्या. ह्या सगल्यां परस थंय थळाव्या भाटकारांचो आंकडो चड आसतलो, अशी आस्त. फक्त जमनीच न्हय, तर आसगांव वाठारांत वेवसाय करपीय बरेच भायले आसात. अर्थीक गुंतवणूक करपाक लोक हालींसराक जमनी विकत घेवपाक लागल्यात. त्यो कांय वर्सांनी विकून दुडू जोडपाक लागल्यात. पूण, अशे गांवच्या गांव परप्रांतीयांनी विकते घेतले वा थंय जावपी निवासी प्रकल्पांनी ते येवन रावपाक लागले जाल्यार गोंयची वळख शेणटली. ताचे परस म्हत्वाचें म्हणल्यार हांगाच्या वीज, कोयर, उदक, येरादारी अशा साबार सुविधांचेर ताण येतलो. बैल कितलो व्हड आशिल्लो हें विचारपाक बेबकी पोट फुगोवन दाखयता आनी निमाणें तें फुटून मरता. आपलो आवाठ, सुविधा, लोकसंख्या, फुडार हाचो कसलोच विचार करिनासतना आपूण चडांत चड लोकांक आस्पावन घेवपाक शकता हें दाखोवपाची सर्त आमच्या माणकुल्या गोंयान लायली जाल्यार एक दीस तें गोंय, गोंयकार आनी गोंयकारपणाच्या आड येतलें, हें सांगपाक
पारखी नाका.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
