भांगरभूंय | प्रतिनिधी
चडश्यांक तिख, मचमचीत, तेलकट, मसाल्याचीं खाणां खावपाक आवडटात. घरांत दाळ, रोस म्हणल्यार शिवराक आसल्याच जायते लोक जेविनात वा इल्लेशें जेवन उठटात. मात ते भायर पिझ्झा, बर्गर, कोक सामके रुचीन खातात. ह्या भायल्या खाणां- जेवणांत व्हड प्रमाणांत मीठ, मैदो, रंग वापरतात. हाका लागून वेगवेगळ्या रोगांचो, दुयेंसांचो धोको वाडटा. ते भायर जायते लोक जिमांत वचचे पयलीं वा उपरांत एनर्जी ड्रिंक घेतात, जें कुडीक सामकें माल आसता. पूण आमी तें पितात. देखून भोंवतणच्या वाठारांत जायतीं फास्ट फूड दुकानां पळोवंक मेळटात. फास्ट फूड खावन जायते जाण आपलो दीस सुरू करतात आनी सोंपयतात. पूण, विचार करात, पिझ्झा, बर्गर, कोक सारकिल्लें भायलें खाण खावप एक म्हयनो पुरायपणान बंद केल्यार कितें जातलें?
प्रक्रिया केल्लीं खाणां चड प्रमाणांत खाल्यार ताचें वेसन लागपाक शकता. अशा वेळार आमची कूड पोट भरपा खातीर सैमीक रितीन चड जेवण जेवपाक प्रेरीत जाता. कारण भायल्या खाणां-जेवणांत अश्यो कांय वस्तू घालतात, जाका लागून मनशाची खावपाची इत्सा वाडटा.
प्रक्रिया केल्ल्या खाणां- जेवणांत ऑडिटिव्ह आनी प्रिझर्वेटिव्ह आसता, जाका लागून ब्रेन केमिस्ट्री बदलता. ह्या खाणां- जेवणांत कॉर्न सिरप सारकिल्ले द्रव्याचो वापर करतात. तातूंत फ्रुक्टोज वा मोनोसोडियम ग्लुटामेट चड प्रमाणांत आसता. ताका लागून जेवण चड रुचीक जाता आनी चडांत चड खावपाची इत्सा वाडटा.
भायलें जेवण बंद केल्यार?
जेन्ना तुमी चड काळ कोल्ड्रीक्सं, पिझ्झा, बर्गर सारकिल्लीं खाणां खावप बंद करतात तेन्ना तुमची कूड ऍडिटिव्हज पसून स्वताक डिटॉक्सिफाय करपाक लागता. तकली दुखप, चिडचिडेपण आनी थकिल्ले वरीं दिसप हीं लक्षणां काळा प्रमाण उणीं जावंक लागतात. इतलेंच न्हय, पूण मनशाची शारिरीक उर्जेची पातळी वाडटा, पचन सुदारता, मूड सुदारता, तुमची कात मोव आनी सोबीत दिसता. फळां, भाजीपालो आनी हेर घरगुती खाणां चड रुचीक लागतात. ताची सैमीक रूच समाधान दिता. प्रक्रिया केल्लीं खाणां खावप बंद केल्यार वजन उणें जावपाक मदत जाता. बरोच काळ आशिल्लो दुयेंसांचो धोको उणो जाता आनी बरे भलायकेची आनी सुटसुटीत जीण जगपाक मेळटा.
प्रक्रिया केल्लीं खाणां चड काळ तिगून उरपा खातीर ताचेर विवीध तरांनी प्रक्रिया करतात. जेन्ना आमी हीं खाणां खातात तेन्ना ताका लागून पचन तंत्रांतले बरे बॅक्टेरिया स्थलांतरीत जातात आनी चिडचीड जाता. तशेंच तातूंत ट्रान्स फॅट्स आनी रिफायन्ड केल्ली साकर सारकिले घटक आसतात. हाका लागून हार्मोनल असंतुलन आनी पिंपल्सांची समस्या निर्माण जाता. अशे तरेन कांतीचे भलायकेचेरूय ताचो परिणाम जाता.
उच्च तंतू आशिल्ले आहार पचन तंत्राच्या निरोगीपणाक चालना दिता. पालेभाजयो, चरबीयुक्त नुस्तें आनी बदाम सारकिलें खाण खाल्यार कांत तिकतिकीत जावपाक मदत जाता. निरोगी आहार आनी बरी न्हीद दीर्घकाळ भलायकेचेर फायदे करतात. तातूंत ऑबेसीटी, टायप २ गोडेंमूत, काळजाचें दुयेंस आनी कॅन्सर अशा दिर्घकाळ चलपी दुयेंसांचो धोको उणो जाता.
हे जिन्नस खायात
धव्या तांदळाचे सुवातेर तुमी ब्रावन रायस, सोडाच्या जाग्यार हर्बल च्या, रेग्युलर बटरा जाग्यार नट बटर, ग्रील्ड, बेक फूड आनी हेर जायत्यो प्रक्रिया केल्ल्या खाणांच्या जाग्यार निरोगी खाणां खायात. बर्या वस्तूंचो वापर करून घरांत केक सारकिल्ले गोड पदार्थ तयार करूं येतात. तशेंच आयस्क्रीम बदला धंय खावं येता. ते भायर सदच्या जेवणांत सॅलडाचो आस्पाव करप हो बरे भलायकेचोच एक भाग. तशेंच सोडा, कोल्ड्रींक्सां बदला सैमीक निरोगी कोकम सिरप, लिंबाचे उदक आनी हेर घरगुती पेयां पियात. रातचे णवा पयलीं जेवात. बेगीन न्हिदात. सकाळीं फांतोडेर उठात. पाऊण वर वेगान चलात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
