भांगरभूंय | प्रतिनिधी
दर वर्सा 9 ते 12 ऑगस्ट मेरेन डॉ. एस. आर. रंगनाथन हांचो वाडदीस ग्रंथपाल दीस म्हूण मनयतात. जशें विद्यार्थ्यांचे जिणेक आकार दिवपाक पालक, शिक्षक आसतात, तशीच ग्रंथपालाचीय म्हत्वाची भुमिका आसता.
दर वर्सा 9 ते 12 ऑगस्ट मेरेन डॉ. एस. आर. रंगनाथन हांचो वाडदीस ग्रंथपाल दीस म्हूण मनयतात. जशें विद्यार्थ्यांचे जिणेक आकार दिवपाक पालक, शिक्षक आसतात, तशीच ग्रंथपालाचीय म्हत्वाची भुमिका आसता. शिक्षणीक प्रवासांत ग्रंथपाल हो विद्यार्थ्याचो मार्गदर्शक आसता. कारण खंयच्याय विशयाचो संदर्भ घेवपा खातीर ताका ग्रंथपालाची मजत लागता.
ग्रंथपालांक सगळ्या विशयांचें गिन्यान आसपाक जाय. शिक्षकाक तो शिकयता त्या विशयाचें खोलायेन गिन्यान आसता. कारण तो खूब शिकिल्लो, वाचन करपी आसता. ताका विद्यार्थ्यांक चडांत चड गिन्यान दिवपाचे आसता. तो एक वा दोन विशयांत तरबेज आसता. पूण, ग्रंथपालांक सगल्या विशयांचें मुळावें गिन्यान आसचेंच पडटा, कारण जर विद्यार्थी वा आनीक कोणूय वाचपघरांत म्हायती मागपाक आयलो जाल्यार ताचो वेळ वगडायनासतना खंयच्याय विशयाचें पुस्तक दिवपाक मेळपाक जाय.
ग्रंथपालाची खूबदां सगल्यां कडल्यान आडनदर जाता. विद्यार्थी आपल्या यशाचें श्रेय आपल्या पालकांक आनी शिक्षकांक दितात, पूण ग्रंथपालाची सादी दखल लेगीत घेनात. तरीय ग्रंथपाल आपली सेवा प्रामाणीक आसची हे अपेक्षेन काम करता. तांकांय स्रय दिवपाक जाय.
वर्गांत शिक्षक भुरग्यांक शिकयता, पूण त्या विशयाचें खोलायेन गिन्यान वाचनालयांत आसता आनी अशी म्हायती दिवन ग्रंथपाल विद्यार्थ्यांक तांच्या अभ्यासांत मजत करता. खंयच्याय वेळार ग्रंथपाल विद्यार्थ्याक आपली कारकीर्द वेंचून काडपाक आदार करूं शकता.
समाजांत भुरग्यां मदीं वाचनाची संस्कृताय रुजोवपाक ग्रंथपाल व्हड वावर करतात. जेन्ना भुरग्यां मदीं वाचनाची संस्कृताय रुजता, तेन्ना तांकां वाचनाची आवड निर्माण जाता. कांय जाणांनी फुडारांत व्हड पावलां मारल्यांत. आयज वेगवेगळ्या गांवांनी वेगवेगळ्या पांवड्यार वेगवेगळीं वाचनालयां आसात. त्या सगळ्या वाचनालयांचे ग्रंथपाल इमाने इतबारे म्हणटात तशे सेवा करतात. तरीय कांय ग्रंथपाल उपेक्षीत उरतात आनी तांणी कितलीय बरी सेवा केली वा वाचकांक दिली तरी ताची नोंद जाताच अशें ना. कांय ग्रंथपाल कसलीच अपेक्षा दवरिनासतना सेवा करपाचें व्रत चालूच दवरतात. अशा सगल्या ग्रंथपालांक वाचनालय दिसाचीं परबीं!
मानसी बांदोडकार
96042 50238
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
